លោកសម រង្ស៊ី ប្រធានគណបក្សសង្គ្រោះជាតិ (រូបថត តាំង វីដា)
លោក សម រង្ស៊ី ប្រធានគណបក្សសង្គ្រោះជាតិ នឹងធ្វើដំណើរទៅក្រៅប្រទេស នៅល្ងាចថ្ងៃទី២៣ខែមករានេះ ដើម្បីចូលរួមក្នុងកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រជាជាតិ និងជួបមន្ត្រីជាន់ខ្ពស់មួយចំនួននៅបណ្តាប្រទេសប៉ែកអឺរ៉ុប។
បេក្ខជនជាប់ឆ្នោតគណបក្សសង្គ្រោះជាតិមណ្ឌលភ្នំពេញ លោកស្រី ជូឡុង សូម៉ូរ៉ា មានប្រសាសន៍ប្រាប់វីអូឌី នៅព្រឹកថ្ងៃព្រហស្បតិ៍នេះថា លោក សម រង្ស៊ី នឹងចាកចេញពីប្រទេសកម្ពុជា នៅម៉ោង ៧:៣០នាទីល្ងាចនេះទៅកាន់ប្រទេសស្វីស ដើម្បីចូលរួមកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រជាជាតិ និងស្តាប់របាយការណ៍ស្តីពីសិទ្ធិមនុស្សនៅកម្ពុជា បន្ទាប់មកលោកនឹងបន្តទៅប្រទេសអាល្លឺម៉ង់ និងបារាំង ដើម្បីជួបជាមួយបណ្តាមន្ត្រីជាន់ខ្ពស់ ដែលមានរយៈពេលមួយសប្តាហ៍។
ការចេញទៅក្រៅប្រទេសរបស់ លោក សម រង្ស៊ី ប្រធានគណបក្សសង្គ្រោះជាតិ ធ្វើឡើងនៅចំពេលដែលស្ថានការណ៍នយោបាយនៅកម្ពុជា មានភាពតានតឹង និងខណៈដែលសហគមន៍អន្តរជាតិ ចេញសេចក្តីថ្លែងការណ៍ថ្កោលទោស ករណីដែលអាជ្ញាធរកម្ពុជា បានបង្ក្រាបទៅលើក្រុមបាតុករ និងកម្មករ កាលពីដើមឆ្នាំ២០១៤ បង្កឲ្យមានអ្នកស្លាប់ និងរបួស ព្រមទាំងមានការចាប់ឃុំខ្លួនសកម្មជនសិទ្ធិមនុស្សមួយចំនួន ពីសំណាក់អាជ្ញាធររដ្ឋាភិបាល៕
No comments:
Post a Comment
yes