សភាអឺរ៉ុប ស្នើឲ្យតំណាងជាន់ខ្ពស់ និងអនុប្រធាននៃគណៈកម្មការ លោកស្រី Catherine Ashton ត្រួតពិនិត្យយ៉ាងយកចិត្តទុកដាក់លើបញ្ហានៅកម្ពុជា បន្ទាប់ពីរកឃើញស្ថានភាពមិនប្រក្រតីកើតឡើងជាបន្តបន្ទាប់នៅកម្ពុជា។
បន្ទាប់ពីកិច្ចប្រជុំពេញអង្គ សភាអឺរ៉ុប បានយល់ស្របនឹងសេចក្តីសម្រេចមួយចំនួនស្តីពីស្ថានភាពនៅកម្ពុជា ដែលចុះកាលបរិច្ឆេត នៅថ្ងៃទី១៤ខែមករា។សភាអឺរ៉ុប បានស្វាគមន៍ចំពោះទស្សនកិច្ចរបស់អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្ស លោកសុរិយា ស៊ូប៊ែឌី និងអំពាវនាវឲ្យរដ្ឋាភិបាលកម្ពុជា ពង្រឹងលទ្ធិប្រជាធិបតេយ្យ នីតិរដ្ឋ ការគោរពសិទ្ធិមនុស្ស និងសិទ្ធិមូលដ្ឋាន រួមមានសេរីភាពនៃការបញ្ចេញមតិ និងការជួបជុំ។
សភាអឺរ៉ុប បានថ្កោលទោសចំពោះការកាត់ទោសទាំងឡាយណា ដែលមានលក្ខណៈនយោបាយ ប្រឆាំងនឹងការរិះគន់នយោបាយ ប្រឆាំងនឹងគណបក្សជំទាស់ សកម្មជនសិទ្ធិមនុស្ស សកម្មជនដីធ្លីនៅកម្ពុជា និងជំរុញឲ្យសកម្មជនសិទ្ធិមនុស្ស និងអ្នកការពារសិទ្ធិដីធ្លី គួរតែបានអនុវត្តការងាររបស់គេ ដោយមិនមានការគំរាមកំហែង និងការយាយី។
សេចក្តីសម្រេច បានស្នើអាជ្ញាធរកម្ពុជា ដោះលែង និងប្រាប់ពីព័ត៌មាននៃកន្លែង២៣នាក់ ដែលត្រូវបានឃុំខ្លួន និងថ្កោលទោសការប្រើប្រាស់កម្លាំងមិនសមរម្យ និងហួសប្រមាណ ដែលបណ្តាលឲ្យមានអ្នកស្លាប់ និងរងរបួសកាលពីថ្ងៃទី០២និងទី០៣ខែមករា។
សភាអឺរ៉ុប បារម្ភពីជម្លោះដែលកំពុងបន្ត ទៅលើភាពមិនប្រក្រតីនៃដំណើរការបោះឆ្នោត ដោយអំពាវនាវឲ្យគណបក្សនយោបាយ ធ្វើការជាមួយគ្នា ដើម្បីបង្ហាញពីកំហុសឆ្គង ដែលកើតឡើង និងយល់ស្របទៅលើជំហានក្នុងការធ្វើឲ្យប្រសើរនូវដំណើរការបោះឆ្នោត កំណែទម្រង់បញ្ជីឈ្មោះ បរិស្ថានប្រព័ន្ធផ្សព្វផ្សាយ កំណែទម្រង់គជប កំណែទម្រង់កំណែទម្រង់ប្រព័ន្ធតុលាការ សភា និងកិច្ចប្រឹងប្រែងក្នុងការពង្រឹងអភិបាលកិច្ចល្អ និងលទ្ធិប្រជាធិបតេយ្យ។
សភាអឺរ៉ុប អំពាវនាវមានការពិភាក្សាបន្តលើជម្លោះការងារក្នុងការទាមទារដំឡើងប្រាក់ឈ្នួល ដោយប្រើប្រាស់គ្រប់មធ្យោបាយដោយសន្តិវិធី តាមអាចធ្វើទៅបាន ដើម្បីរកដំណោះស្រាយលើភាពខុសគ្នា។សភាអឺរ៉ុប ក៏បានអំពាវនាវឲ្យបញ្ឈប់ការកោះហៅលោកសម រង្ស៊ី ប្រធានគណបក្សសង្គ្រោះជាតិ និងអនុប្រធាន លោក កឹម សុខា និងលោក រ៉ុង ឈុន មេដឹកនាំសហជីព។
No comments:
Post a Comment
yes