រូបភាពសាលាដំបូងរាជធានីភ្នំពេញ ថ្ងៃទី១៤ ខែមករា ឆ្នាំ២០១៤
(រូបភាពដោយ តាត ឧត្ដម)
តាមរដ្ឋធម្មនុញ្ញ នៃព្រះរាជាណាចក្រកម្ពុជា មាត្រា ១២៨ ថ្មី ចែងថា “អំណាចតុលាការជាអំណាចឯករាជ្យ។ អំណាចតុលាការ ធានារក្សាអនាគតិ និង ការពារសិទ្ធិសេរីភាពរបស់ប្រជាពលរដ្ឋ។ អំណាចនេះត្រូវប្រគល់ឲ្យតុលាការកំពូល និងសាលាជម្រះក្ដីគ្រប់ផ្នែក”។ និងតាមមាត្រា ១៣០ ថ្មី ចែងថា “គ្មានអង្គការណាមួយនៃអំណាចនីតិប្បញ្ញត្តិ ឬនីតិប្រតិបត្តិអាចទទួលអំណាចតុលាការអ្វីបានឡើយ”។
នៅក្នុងពិធីសម្ពោធភូមិកុមារ អេស អូ អេស នៅខេត្តក្រចេះ កាលពីថ្ងៃទី១៨ ខែមករា កន្លងទៅ លោកនាយករដ្ឋមន្ត្រី ហ៊ុន សែន បានមានប្រសាសន៍ពាក់ព័ន្ធនឹងករណីប្រព្រឹត្តបទល្មើសជាក់ស្ដែងរបស់មនុស្សប៉ុន្មាននាក់ ដែលលោកមិនបញ្ចេញឈ្មោះ ហើយដែលតុលាការមិនចាប់ខ្លួន ព្រោះជាអ្នកនយោយបាយ «ខ្ញុំកូណាខ្ញុំប្រាប់ស៊ូប៊ែឌី បើនិយាយឲ្យត្រឹមត្រូវតាមច្បាប់ បើកុំទុកទ្វារដើម្បីសម្របសម្រួលខាងនយោបាយ ត្រូវចាប់ខ្លួនភ្លាម ព្រោះនេះជាបទល្មើសជាក់ស្ដែង ត្រូវចាប់ខ្លួនភ្លាម ប៉ុន្មាននាក់នុ៎ង។ ប៉ុន្តែទុកផ្លូវសម្រាប់ការសន្ទនាខាងនយោបាយ យើងមិនចាប់ខ្លួនទេ ហើយពេលចូលតុលាការហើយ តុលាការក៏មិនបានចេញដីកាឃុំខ្លួនទេ។ សូមឲ្យយល់ផង កុំទទឹងទិស»។
នៅក្នុងបណ្ដាញសារព័ត៌មានសង្គម ក៏មានការរិះគន់រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ផងដែរ ដែលសេចក្ដីជូនដំណឹង (សជណ) មានអំណាចលុបលើសេចក្ដីសម្រេចរបស់តុលាការកំពូល។
ចំពោះករណី សេចក្ដីជូនដំណឹង (សជណ) ដែលមានអំណាចលុបលើសេចក្ដីសម្រេចរបស់តុលាការកំពូល លោកមេធាវី សុខ សំអឿន យល់ថា វាក៏ពិបាកនឹងចាត់ទុកថា ជាការរំលោភលើឯករាជ្យភាពរបស់តុលាការផងដែរ។ លោកថា បើសិនជាតុលាការមិនធ្វើតាម សជណ ហើយតុលាការមានទោស ឬក៏ថា បើអ្នកធំបញ្ជាមក ហើយតុលាការធ្វើតាម អាហ្នឹងទើបអាចចោទប្រកាន់ ពីករណីរំលោភលើឯករាជ្យភាពរបស់តុលាការបាន។ ប៉ុន្តែលោកយល់ថា ករណី (សជណ) នេះក៏ឆ្លុះបញ្ចាំងឲ្យឃើញពីអសមត្ថភាពរបស់តុលាការផងដែរ។
ទោះយ៉ាងណា លោកមេធាវី សុខ សំអឿន បានធ្វើការសន្និដ្ឋានថា ករណី (សជណ) គឺស្ថិតនៅចន្លោះរវាងឯករាជ្យភាព និង អសមត្ថភាពរបស់តុលាការ។
ចំណែកប្រធានការិយាល័យបច្ចេកទេសផ្នែកស៊ើបអង្កេត នៃអង្គការលីកាដូ លោក អំ សំអាត មានប្រសាសន៍ថា នៅស្រុកខ្មែរ ជាទូទៅអ្នកណាក៏យល់ថា ប្រព័ន្ធតុលាការមិនទាន់ឯករាជ្យដែរ ជាពិសេសគឺការយកតុលាការជាឧបករណ៍នយោបាយ និងបញ្ហាផ្សេងៗទៀត បូករួមទាំងនិទណ្ឌភាពផង។ លោកបញ្ជាក់ថា ចំណុចទាំងអស់នេះហើយ ដែលធ្វើឲ្យប្រទេសយើងមិនទាន់មាននីតិរដ្ឋពិតប្រាកដ។
និយាយទៅដល់ករណី សជណ មានអំណាចលុបលើសេចក្ដីសម្រេចរបស់តុលាការ លោកថា ហ្នឹងហើយដែលបង្ហាញយ៉ាងច្បាស់ថា តុលាការមិនឯករាជ្យ ព្រោះគេមិនអនុវត្តតាមច្បាប់ បែរជាសេចក្ដីជូនដំណឹងមកធ្វើជាធំជាងច្បាប់ទៅវិញ«សជណ វាគ្រាន់តែសេចក្ដីជូនដំណឹងមួយទេ វាមិនអាចទៅលុបសេចក្ដីសម្រេចរបស់តុលាការបាននោះទេ»។
នៅក្នុងពិធីរំឭកខួបលើកទី១០ នៃការធ្វើឃាតប្រធានសហជីពសេរីកម្មករកម្ពុជា លោកជា វិជ្ជា កាលពីថ្ងៃទី២២ ខែមករា កន្លងទៅ ប្រធានគណបក្សសង្គ្រោះជាតិ លោកសម រង្ស៊ី បានអំពាវនាវឲ្យបញ្ចប់វប្បធម៌និទណ្ឌភាពនៅកម្ពុជា ដើម្បីឲ្យសង្គមជាតិមានភាពសុខដុមរម្យនាពិតប្រាកដ ដោយលោកសង្កត់ធ្ងន់លើករណីឃាតកម្មលើលោក ជា វិជ្ជា លោក រស់ សុវណ្ណរ៉េត លោកហ៊ី វុទ្ធី ដែលជាសហការីរបស់លោកជា វិជ្ជា ក៏ដូចជាករណីឃាតកម្មលើអ្នកស្រឡាញ់ប្រជាធិបតេយ្យផ្សេងទៀត រួមទាំងសកម្មជនព្រៃឈើ លោក ឈុត វុទ្ធីផងដែរ«យើងត្រូវតែបញ្ចប់វប្បធម៌ហិង្សា ហើយត្រូវតែបញ្ចប់វប្បធម៌និទណ្ឌភាព គឺអ្នកសម្លាប់គេ សម្លាប់លោកជា វិជ្ជា រកមុខអត់ឃើញ សម្លាប់លោកហ៊ី វុទ្ធី លោករស់ សុវណ្ណរ៉េត រកមុខអត់ឃើញ សម្លាប់លោកឈុត វុធ្ធី រកមុខអត់ឃើញ គឺសម្លាប់គេច្រើនណាស់។ ល្មមហើយ ល្មមបញ្ចប់វប្បធម៌ហិង្សា ហើយវប្បធម៌និទណ្ឌភាពហ្នឹងហើយ ដើម្បីនាំមកនូវសន្តិភាពពិតប្រាកដ»។
ក្នុងដំណើរទស្សនកិច្ចលើកទី១០ របស់អ្នករាយការណ៍ពិសេសសិទ្ធិមនុស្សអង្គការសហប្រជាជាតិប្រចាំកម្ពុជា លោកសុរិយា ស៊ូប៊ែឌី ក៏បានអំពាវឲ្យរដ្ឋាភិបាលកម្ពុជា ធ្វើកំណែទម្រង់លើប្រព័ន្ធតុលាការផងដែរ។
តាមការយល់ឃើញរបស់អ្នកវិភាគមួយចំនួនយល់ថា ឧបសគ្គដែលធ្វើឲ្យស្ថាប័នតុលាការនៅកម្ពុជាមិនឯករាជ្យ ដោយសារចៅក្រមមួយចំនួនជាមន្ត្រីជាន់ខ្ពស់របស់គណបក្សប្រជាជនកម្ពុជា ដែលជាគណបក្សកាន់អំណាច៕
No comments:
Post a Comment
yes