ប្រធានសហភាពសហជីពកម្ពុជា លោក រ៉ុង ឈុន
សកម្មភាពតវ៉ារបស់កម្មករនៅក្នុងប្រទេសបានស្ងប់ស្ងាត់មួយរយៈ ប៉ុន្តែប្រធានសហភាពសហជីពកម្ពុជា កំពុងស្ថិតនៅក្រោមការកោះហៅរបស់សាលាដំបូងរាជធានីភ្នំពេញ ឱ្យចូលបំភ្លឺពីរឿងតវ៉ារបស់កម្មករនៅសប្ដាហ៍ក្រោយនេះ។ ប្រធានសហភាពសហជីពកម្ពុជា នឹងទៅតុលាការតាមការកោះហៅ។
ប្រធានសហភាពសហជីពកម្ពុជា លោក រ៉ុង ឈុន បានអំពាវនាវឲ្យអ្នកគាំទ្រលោក និងអ្នកសង្កេតការណ៍ជាតិ និងអន្តរជាតិ ទៅចូលរួមឲ្យបានច្រើន សង្កេតការណ៍ក្នុងពេលលោកចូលទៅតុលាការតាមការកោះហៅសាកសួរ នៅថ្ងៃទី១៤ មករា។
លោក រ៉ុង ឈុន អះអាងថា ដីកាកោះហៅរបស់សាលាដំបូងរាជធានីភ្នំពេញ នៅថ្ងៃទី៣ មករា ដែលឲ្យលោកចូលទៅបំភ្លឺពីបទញុះញង់ឲ្យប្រព្រឹត្តបទឧក្រិដ្ឋ ឬប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គមនោះ មិនឆ្លុះបញ្ចាំងការពិតទេ គឺលោកគ្រាន់តែប្រើប្រាស់តួនាទីសហភាពសជីពការពារកម្មករទាមទារប្រាក់ឈ្នួល ១៦០ដុល្លារក្នុងខែ។
លោក រ៉ុង ឈុន ថ្លែងបន្តថា លោកមិនព្រួយបារម្ភទេ ពីព្រោះអ្វីដែលលោកបានធ្វើ មិនខុសច្បាប់ទេហើយមានមនុស្សជាច្រើននៅបណ្ដាប្រទេសជាមួយចំនួន ដូចជា នៅខាងអឺរ៉ុប និងអាស៊ី បានគាំទ្រដល់ការទាមទារដំឡើងប្រាក់ខែគោល ១៦០ដុល្លាររបស់កម្មករ ហើយបានថ្កោលទោសអាជ្ញាធរសន្តិសុខរដ្ឋាភិបាល ដែលបានប្រើកម្លាំងហួសហេតុបង្ក្រាបកម្មករក្នុងពេលតវ៉ា កាលពីថ្ងៃទី៣ មករា បណ្ដាលឱ្យអ្នកតវ៉ាទាំងនោះស្លាប់ ៤នាក់ និងជិត ៤០នាក់ ត្រូវបានចាប់ខ្លួន និងអ្នកតវ៉ានឹងកងកម្លាំងអាជ្ញាធរមួយចំនួនទៀតរងរបួស៕
No comments:
Post a Comment
yes