អង្គការសិទ្ធិមនុស្សអន្តរជាតិ (Human Rights Watch) ជំរុញឲ្យសមាជិកក្រុមប្រឹក្សាសិទ្ធិមនុស្សUN គួរ តែថ្កោលទោសរដ្ឋាភិបាលកម្ពុជា ដោយសារការបរាជ័យក្នុងការសន្យាសារជាថ្មីក្នុងការធានាឲ្យមានការគោរពសិទ្ធិមនុស្ស។
HRW បានលើកឡើងបែបនេះ នៅក្នុងសេចក្តីថ្លែងការណ៍មួយ ចេញផ្សាយនៅថ្ងៃទី២៧ខែមករា ឆ្នាំ ២០១៤ ដែលបានលើកឡើងពីស្ថានភាពនៃការរំលោភសិទ្ធិមនុស្សនៅកម្ពុជា នាពេលថ្មីៗនេះ។
សេចក្តីថ្លែងការណ៍របស់HRW ឲ្យដឹងថា សមាជិកអង្គការសហប្រជាជាតិ គួរតែដាក់គំនាបទៅលើរដ្ឋាភិបាលកម្ពុជា ដោយសារការបរាជ័យក្នុងការរក្សាការប្តេជ្ញា និងការសន្យាជាថ្មី ក្នុងការគោរពសិទ្ធិមនុស្ស។សេចក្តីថ្លែងការណ៍បន្តថា នៅថ្ងៃទី២៨ខែមករា ឆ្នាំ២០១៤ ប្រទេសកម្ពុជា នឹងមានវត្តមាននៅចំពោះមុខក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្ស៊ឺណែវ ដើម្បីលើកឡើងពីយន្តការលើកកម្ពស់សិទ្ធិមនុស្ស ហៅថាយូ.ភី.អ (UPR=Universal Periodic Review) ។
លោក Juliette de Rivero ប្រធានប្រចាំទីក្រុងហ្ស៊ឺណែវរបស់HRW មានប្រសាសន៍ថា រដ្ឋាភិបាលដឹកនាំដោយលោក ហ៊ុន សែន បានរំលោភសិទ្ធិមនុស្សជារៀងរាល់ថ្ងៃដោយការប្រឆាំងយ៉ាងហិង្សាទៅលើក្រុមប្រឆាំង សហជីព សកម្មជន និងអ្នកផ្សេងទៀតពីការប្រមូលផ្តុំ ដើម្បីទាមទារការផ្លាស់ប្តូរផ្នែកនយោបាយ។ លោក បន្តថា ប្រទេសជាសមាជិកក្រុមប្រឹក្សាសិទ្ធិមនុស្សនៅអង្គការសប្រជាជាតិ គួរតែថ្កោលទោសការបង្ក្រាបយ៉ាងសាហាវ និងទទូចឲ្យមានការចូលរួមរបស់រដ្ឋាភិបាលកម្ពុជាក្នុងកំណែទម្រង់ដ៏ស៊ីជម្រៅមួយ។
នៅដើមខែមករា ឆ្នាំ២០១៤នេះ រដ្ឋាភិបាលកម្ពុជា បានប្រើប្រាស់យន្តការថ្មីៗ ដើម្បីទប់ស្កាត់ និងចាត់វិធានការទៅលើការតវ៉ារបស់ក្រុមប្រឆាំងនឹងរដ្ឋាភិបាល រួមមានការបង្ក្រាបកាលពីថ្ងៃទី០២និងទី០៣ខែមករា ដែលបណ្តាលឲ្យមនុស្ស៥នាក់ ស្លាប់ ការបោសសម្អាតបាតុករពីទីលានប្រជាធិបតេយ្យ ដោយមិនឲ្យមានការតវ៉ា ការហាមមិនឲ្យមានការប្រមូលផ្តុំ និងសម្តែងមតិនៅទីលានប្រជាធិបតេយ្យ រហូតមានការប៉ះទង្គិច ការគំរាមកំហែង ការប្រមូលផ្តុំរបស់អ្នកគាំទ្រគណបក្សសង្គ្រោះជាតិ នៅខេត្តកំពង់ចាម និងការបង្ក្រាបទៅលើបាតុករ ដែលដឹកនាំដោយលោក ម៉ម សូណង់ដូជាដើម។
កាលពីថ្ងៃអាទិត្យ អនុប្រធានគណបក្សសង្គ្រោះជាតិ លោក កឹម សុខា ឲ្យដឹងទៀតថា ក្រោយពីការប្រកាសលុបចោលវេទិកាសំណេះសំណាល រថយន្តរបស់កងទ័ពនៅខេត្តកំពង់ចាម បានបរយ៉ាងលឿន ដេញពីក្រោយ និងមកពីខាងមុខប្រុងនឹងបុករថយន្តរបស់លោក ដែលករណីនេះ លោកសង្ស័យថា ជាការប៉ុនប៉ងគំរាមរូបលោកផ្ទាល់។
នៅថ្ងៃចន្ទនេះ សម្ព័ន្ធក្រុមអង្គការសិទ្ធិមនុស្ស ចំនួន៤ ជំរុញឲ្យសហគមន៍អន្តរជាតិ លើកបញ្ហានៃការរំលោភសិទ្ធិមនុស្ស និងករណីបង្ក្រាបលើសេរីភាពប្រមូលផ្តុំ ការបញ្ចេញមតិនៅកម្ពុជា ទៅពិភាក្សាក្នុងកិច្ចប្រជុំក្រុមប្រឹក្សាសិទ្ធិមនុស្ស អង្គការសហប្រជាជាតិ ដែលគ្រោងធ្វើឡើងនៅថ្ងៃអង្គារស្អែកនេះ។
សេចក្តីថ្លែងការណ៍របស់សម្ព័ន្ធអង្គការ សិទ្ធិមនុស្សចំនួន៤ រួមមាន CCHR, Article 19 សមាគមប៊ិចអន្តរជាតិ និងសមាគមអ្នកបោះពុម្ពផ្សាយអន្តរជាតិ ចុះថ្ងៃទី២៧ ខែមករានេះ ឲ្យដឹងថា យូភីអ គឺជាដំណើរការមួយ ដែលរដ្ឋជាសមាជិកនៃអង្គការសហប្រជាជាតិ ត្រូវបានក្រុមប្រឹក្សាសិទ្ធិមនុស្សអង្គការសហប្រជាជាតិ វាយតម្លៃជាប្រចាំ។ សម្ព័ន្ធអង្គការសិទ្ធិមនុស្ស យល់ឃើញថា នេះជាឱកាសមួយ ដែលសហគមន៍អន្តរជាតិ គប្បីលើកពិភាក្សាពីស្ថានភាពសិទ្ធិមនុស្សនៅកម្ពុជា ជាពិសេសវិធានការរបស់រដ្ឋាភិបាលកម្ពុជា ដែលបានធ្វើឡើងបំបិទសេរីភាពបញ្ចេញមតិរបស់សកម្មជន អ្នកការពារសិទ្ធិមនុស្ស និងអ្នកសារព័ត៌មាន ដែលហ៊ានចេញមុខរិះគន់។
ក្នុងសេចក្តីថ្លែងការណ៍នេះ នាយកប្រតិបត្តិនៃអង្គការមាត្រា១៩ លោក ថូម៉ាស់ ហ៊ូគ មានប្រសាសន៍ថា «ក្រោយពី ការបោះឆ្នោតនៅឆ្នាំ២០១៣ ប្រជាពលរដ្ឋកម្ពុជាលែងនៅស្ងៀមទៀតហើយ។ ឥឡូវនេះ ប្រជាពលរដ្ឋរាប់ម៉ឺននាក់ កំពុងតែប្រថុយជីវិតរបស់ខ្លួនក្នុងការបញ្ចេញមតិ និងទាមទារឲ្យមានសង្គមមួយដែលខ្លួនចង់បាន។ បែបបទប្រតិបត្តិការរបស់រដ្ឋាភិបាល ក្នុងការបង្ក្រាបមកលើសំឡេងប្រឆាំង មិនគួរកើតមានបន្តទៀតនោះទេ។ វាគួរតែដល់ពេលក្នុងការគោរពសេរីភាពបញ្ចេញមតិ និងសិទ្ធិមនុស្ស។ នេះជាសារដែលសហគមន៍អន្តរជាតិគួរតែនៅទីខាងក្រោយ»។
សម្រាប់ប្រទេសកម្ពុជា លោក ឱម យិនទៀង ប្រធានគណៈកម្មាធិការសិទ្ធិមនុស្សកម្ពុជា នឹងចូលរួមក្នុងកិច្ចប្រជុំនោះ៕
No comments:
Post a Comment
yes