ការបង្ក្រាបទៅលើបាតុករ ទាមទាររបស់វិទ្យុសំបុកឃ្មុំ នៅព្រឹកថ្ងៃ
ទី ២៧មករា ២០១៤
បាតុកម្មបិទផ្លូវរបស់លោកម៉ម សូណង់ដូ និងអ្នកគាំទ្រជាច្រើនរយនាក់ នៅទីបំផុតទៅត្រូវបានក្រុមសមត្ថកិច្ចប៉េអឹម ប្រើគ្រាប់បែកផ្សែង និងវាយបង្ក្រាប នៅមុខក្រសួងព័ត៌មាន លើកំណាត់ផ្លូវព្រះមុនីវង្ស។ មនុស្សយ៉ាងហោចណាស់៥នាក់ បានរងរបួសនៅក្នុងហេតុការណ៍បង្ក្រាបបាតុកម្មនេះ។ ក្រុមសង្គមស៊ីវិល បានថ្កោលទោសចំពោះការបង្ក្រាបដោយហិង្សានេះ ប៉ុន្តែមន្ដ្រីប៉េអឹម លើកឡើងថា ប្រសិនបើបាតុកម្មនេះ ធ្វើឡើងដោយមិនមានការបិទផ្លូវ នោះក៏គ្មានការបង្ក្រាបនេះ កើតឡើងដែរ។
ក្រុមកងរាជអាវុធហត្ថជាច្រើនរយនាក់ នៅម៉ោង១០ព្រឹកថ្ងៃចន្ទនេះ បានបើកប្រតិបត្តិការបង្ក្រាបលើហ្វូងបាតុករ ដែលអង្គុយតវ៉ាបិទកំណាត់ផ្លូវព្រះមុនីវង្ស មុខក្រសួងព័ត៌មាន។ ជាបាតុកម្មតវ៉ា ទាមទារឲ្យក្រសួងព័ត៌មានផ្ដល់ហ្វ្រេកង់ផ្សាយទូរទស្សន៍ និងកម្លាំងផ្សាយបន្តដល់វិទ្យុសំបុកឃ្មុំតាមបណ្ដាខេត្ត។
សំឡេងគ្រាប់បែកផ្សែងផ្ទុះឡើងបន្តបន្ទាប់ តាមដោយផ្សែងស ហុយពាសពេញផ្លូវ។ បាតុកររត់ប្រសាច ពេលឃើញវត្តមានរបស់កងរាជអាវុធហត្ថ ប្រដាប់ដោយខែល និងដំបងផងនោះ ដើរតម្រង់មករកខ្លួន។ បន្ទាប់ពីប្រើគ្រាប់បែកផ្សែង កងកម្លាំងប៉េអឹម បានបណ្ដេញក្រុមបាតុករ រហូតដល់មន្ទីរពេទ្យកាល់ម៉ែត្រ ទើបត្រឡប់ចូលទៅក្នុងបរិវេណសាលារាជធានីភ្នំពេញវិញ។ នៅក្នុងការបង្ក្រាបនោះដែរ លោក ម៉ម សុណង់ដូ ប្រធានវិទ្យុសំបុកឃ្មុំ ត្រូវបានអង្គរក្សរបស់លោក ជម្លៀសចេញពីកន្លែងកើតហេតុដោយសុវត្ថិភាព។
មនុស្សយ៉ាងហោចណាស់៥នាក់ រងរបួសនៅក្នុងការបង្ក្រាបបាតុករ នៅមុខក្រសួងព័ត៌មាន នាព្រឹកថ្ងៃចន្ទទី២៧មករា។ នេះបើតាមលោក នី ចរិយា ប្រធានផ្នែកស៊ើបអង្កេតសិទ្ធិមនុស្សរបស់សមាគមអាដហុក។ លោកឲ្យដឹងបន្ថែមថា ក្នុងចំណោមអ្នកទាំង៥ដែលរបួសនោះ មាន៣នាក់រងរបួសធ្ងន់ ដោយបែកក្បាល។ ក្រៅពីនោះ ក៏មានការចាប់ខ្លួនមនុស្សពីរនាក់ ប៉ុន្តែក្រោយមកក៏ត្រូវបានអាជ្ញាធរដោះលែងមកវិញ។ ចំណែកលោកអំ សំអាត ប្រធានផ្នែកស៊ើបអង្កេតរបស់អង្គការលីកាដូវិញ បានមានប្រសាសន៍ប្រាប់ថា អ្នករបួសមានរហូតដល់ទៅ៧នាក់ឯណោះ។
នៅវេលាម៉ោង៩ព្រឹក ថ្ងៃចន្ទនេះ ក្រុមបាតុករជាច្រើនរយនាក់ បានហែក្បួនចេញពីចំណុចស្ពាននាគ ក្បែរវត្តភ្នំ ដោយមានទាំងលើកបដា និងស្រែកទាមទារហ្វ្រេកង់ទូរទស្សន៍ និងកម្លាំងផ្សាយតាមបណ្ដាខេត្តផង។ ក្រុមអ្នកតវ៉ា បានដើរមួយជុំវត្តភ្នំ កាត់តាមស្ថានទូតអាមេរិក និងបានទៅបិទផ្លូវនៅមុខក្រសួងព័ត៌មាន នៅម៉ោង៩ និង១៥នាទីព្រឹក ដោយមានការរារាំងជាច្រើនដំណាក់កាល ពីសំណាក់ក្រុមសមត្ថកិច្ច និងក្រុមសន្តិសុខខណ្ឌដូនពេញ។
គួរជម្រាបជូនថា អាជ្ញាធររាជធានីភ្នំពេញ កាលពីថ្ងៃទី២៦មករា បានផ្ញើលិខិតទៅកាន់លោកម៉ម សុណង់ដូ ប្រធានវិទ្យុសំបុកឃ្មុំ ដោយបានបញ្ជាក់រួចហើយថា មិនអនុញ្ញាតឲ្យធ្វើបាតុកម្ម នៅថ្ងៃទី២៧មករានេះទេ។ ហើយថា ប្រសិនបើមានការប៉ះទង្គិចណាមួយនោះ លោកម៉ម សូណង់ដូ ត្រូវទទួលខុសត្រូវចំពោះមុខច្បាប់។
ប៉ុន្តែលោក ម៉ម សូណង់ដូ នៅព្រឹកថ្ងៃទី២៧មករានេះ មុនពេលចាប់ផ្ដើមក្បួនបាតុកម្ម បានមានប្រសាសន៍ថា លោកចូលរួមបាតុកម្មនេះ ក្នុងនាមជាអ្នកគាំទ្រ មិនមែនជាអ្នកដឹកនាំទេ។ ហេតុនេះ លោកមិនទទួលខុសត្រូវលើហេតុការណ៍ប៉ះទង្គិចណាមួយ ដែលអាចនឹងកើតមានឡើយ។
ក្រុមសង្គមស៊ីវិល បានថ្កោលទោសចំពោះការបង្ក្រាបដោយហិង្សានេះ ប៉ុន្តែ មន្ដ្រីប៉េអឹមនៅក្នុងប្រតិបត្តិការចុះបង្ក្រាបនេះ លើកឡើងថា ប្រសិនបើបាតុកម្ម ធ្វើឡើងដោយមិនមានការបិទផ្លូវ នោះក៏គ្មានការបង្ក្រាបនេះ កើតឡើងដែរ៕
No comments:
Post a Comment
yes