លោក វន់ ពៅ ជជែកជាមួយសមត្ថកិច្ច រីឯលោកថេង សាវឿន ថតរូប
រូបថត ភ្នំពេញ ប៉ុស្តិ៍
សកម្មជនសិទ្ធិមនុស្ស ២នាក់ ក្នុងចំណោម ២១នាក់ ដែលបានឃុំ ខ្លួនបណ្តោះអាសន្ននៅក្នុងពន្ធនាគា ត្រពាំងផ្លុង ទាក់ទិនទៅនឹងការបង្ក្រាបដោយហិង្សាពីសំណាក់កងកម្លាំងសមត្ថកិច្ចក្នុងអំឡុងកម្មករតវ៉ាប្រាក់ខែគោល ១៦០ ដុល្លារបានអំពាវនាវឲ្យតុលាការ ពន្លឿននីតិវិធីរបស់ខ្លួននៅខណៈសុខភាពកំពុងចុះដុនដាបពីមួយថ្ងៃទៅមួយថ្ងៃក្រោយពីតុលាការបានបដិសេធការស្នើសុំនៅក្រៅឃុំចំនួន ២ លើក។
លោក ថេង សាវឿន មន្ត្រីសម្របសម្រួលបណ្តាញកសិករបានថ្លែងចេញពីពន្ធនាគារ ត្រពាំងថ្លុង ថា លោកស្នើសុំឲ្យតុលាការកំពូលមេត្តាពន្លឿននីតិវិធីដើម្បីឲ្យពួកលោកឆាប់បានទទួលសិទ្ធិនៅក្រៅឃុំ អាចនឹងទៅទទួលការព្យាបាលជំងឺ។
លោកបានថ្លែងឲ្យដឹងទៀតថា៖ «មុនថ្ងៃចាប់ខ្លួនខ្ញុំ ខ្ញុំបានឈឺរលាកបំពងករួចទៅហើយ ហើយក្រោយថ្ងៃឃុំខ្លួនខ្ញុំធ្វើឲ្យខ្ញុំរលាកកាន់តែខ្លាំងពុំអាចហូបអ្វីបានរហូតដល់ថ្ងៃ ទី១៤ កុម្ភៈ ខ្ញុំក្អកចេញឈាមមកជាមួយ»។
លោកបានថ្លែងឲ្យដឹងទៀតថា អ្វីដែលតុលាការបានសម្រេចចំពោះរូបលោកគឺជារឿងមួយអយុត្តិធម៌បំផុត ដោយសារតែនៅក្នុងថ្ងៃនោះលោកពុំបានធ្វើអ្វីសោះក្រៅពីឈរកាន់កាមេរ៉ាថតរូបមួយស្រាប់តែគេមកចាប់រូបលោកហើយវាយយ៉ាងដំណំតែម្តង។ លោកថា៖ «ខ្ញុំសូមឲ្យតុលាការកំពូលមេត្តាពិនិត្យឲ្យបានហ្មត់ចត់ក្នុងសំណុំរឿងខ្ញុំពីព្រោះខ្ញុំមិនបានពាក់ព័ន្ធអ្វីទាំងអស់។ ខ្ញុំគឺជាជនរងគ្រោះ វាអយុត្តិធម៌ណាស់សម្រាប់រូបខ្ញុំ»។
ភរិយារបស់ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ គឺអ្នកស្រី ប្រាក់ សុវណ្ណារី ដែលបានទៅសួរសុខទុក្ខប្តីរបស់អ្នកស្រីកាលពីព្រឹកម្សិលមិញ បាននិយាយថា ស្ថានភាពប្តីរបស់អ្នកស្រីកំពុងតែធ្ងន់ធ្ងរទៅៗដោយសារតែពុំមានថ្នាំព្យាបាល ពីព្រោះគាត់ត្រូវណាត់ពេទ្យនៅ ថៃ ដើម្បីយកថ្នាំ កាលពីថ្ងៃ ទី១៨ កុម្ភៈ កន្លងមក។
អ្នកស្រីថ្លែងថា៖ «ប្តីរបស់ខ្ញុំគាត់បានផ្តាំផ្ញើថា សុំឲ្យមេធាវីជួយពន្លឿននីតិវិធីរបស់តុលាការដើម្បីឲ្យគាត់មានឱកាសទទួលបានថ្នាំព្យាបាលបើមិនដូច្នេះទេគាត់អាចនឹងប៉ះពាល់ដល់ជីវិត។ ខ្ញុំកាន់ដៃស្តាំរបស់គាត់គឺញ័រៗ ខ្ញុំបារម្ភខ្លាំងណាស់»។ អ្នកស្រីថ្លែងថា នៅពេលនេះអ្នកស្រីនិងគូដណ្តឹងរបស់ ថេង សាវឿន កំពុងស្នើសុំឲ្យមេធាវីជួយពួកគាត់ទាំងពីរនាក់ឲ្យចេញក្រៅឃុំមុន គេដើម្បីព្យាបាលឲ្យបានទាន់ពេល។
លោក ហម ស៊ុនរិទ្ធ មេធាវីការពារក្ដីឲ្យលោក ថេង សាវឿន និង លោក វន់ ពៅ មកពីអង្គការមជ្ឈមណ្ឌលច្បាប់សម្រាប់អប់រំសហគមន៍បានឲ្យដឹងថា លោកបានទំនាក់ទំនងទៅសាលាឧទ្ធរណ៍ក្នុងករណីនេះហើយតែគេមិនទាន់ទម្លាក់សំណុំរឿងនេះនៅឡើយទេ។ លោកថ្លែងថា៖ «យើងមិនដឹងថា តើពេលណាទើបគាត់ទម្លាក់សំណុំរឿងនោះទេ»។
លោក ឃុន លាងម៉េង ចៅក្រមជម្រះសាលាឧទ្ធរណ៍ពុំអាចទំនាក់ទំនងសុំការពន្យល់បានទេកាលពីម្សិលមិញ។
កាលពីថ្ងៃ ទី១៤ ខែ កុម្ភៈ លោក វន់ ពៅ បានផ្ញើលិខិតចេញពីពន្ធនាគារតាមរយៈភរិយារបស់លោក ឲ្យធ្វើការផ្សព្វផ្សាយ និងចែករំលែកតាមបណ្តាញសង្គម ហ្វេសប៊ុក ដោយលោកនិយាយថា លោកបានដឹងយ៉ាងច្បាស់ពីយុទ្ធនាការ និងទុក្ខលំបាករបស់ពលរដ្ឋ កម្មករ និងអង្គការសង្គមស៊ីវិលដែលបានទាមទាររកយុត្តិធម៌ទាំងក្នុង និងក្រៅប្រទេស ដើម្បីឲ្យតុលាការដោះលែងរូបលោក និងអ្នកទាំង ២២នាក់ ដែលទាំងនេះស្តែងឲ្យឃើញពីឆន្ទៈមោះមុត ដើម្បីយុត្តិធម៌ សន្តិភាពសម្រាប់ប្រទេសជាតិទាំងមូល។
លោកបន្តថា៖ «បើទោះបីជាខ្ញុំជាប់ឃុំ តែព្រលឹង ឆន្ទៈ និងស្មារតីរបស់ខ្ញុំ មិនត្រូវបានឃុំគ្រងឡើយ»។
កាលពីថ្ងៃ ទី១១ ខែ កុម្ភៈ សាលាឧទ្ធរណ៍ បានបដិសេធបណ្តឹងសុំនៅក្រៅឃុំរបស់ជនជាប់ចោទទាំង ២១ នាក់ ដោយតម្កល់សេចក្តីសម្រេចរបស់សាលក្រមសាលាដំបូងរាជធានីភ្នំពេញ ទុកជាបានការដោយសារសំណុំរឿងមានសហចារីច្រើនអាចប៉ះពាល់ដល់ដំណើរការសវនាការនិងប៉ះពាល់ដល់សណ្តាប់ធ្នាប់សាធារណៈ។ អ្នកទាំងនោះត្រូវបានចោទប្រកាន់ពីបទប្រើហិង្សាដោយចេតនា និងបំផ្លិចបំផ្លាញទ្រព្យសម្បត្តិរបស់អ្នកដទៃ៕
No comments:
Post a Comment
yes