មជ្ឈមណ្ឌលសិទ្ធិមនុស្សកម្ពុជា បានចូលរួមមរណទុក្ខអ្នកកាសែតម្នាក់ ឈ្មោះ សួន ចាន់ ធ្វើការនៅកាសែតមួយឈ្មោះថា «មារគាកម្ពុជា» ដែលត្រូវគេព្រួតវាយស្លាប់នៅខេត្តកំពង់ឆ្នាំង កាលពីថ្ងៃទី២ កុម្ភៈ កន្លងទៅ ហើយបានអំពាវនាវឲ្យរដ្ឋាភិបាលស៊ើបអង្កេត និងចាប់ខ្លួនជនល្មើសយកមកកាត់ទោសឲ្យបាន។
មជ្ឈមណ្ឌលសិទ្ធិមនុស្សកម្ពុជា បានចេញសេចក្ដីប្រកាសព័ត៌មានមួយនៅថ្ងៃទី៣ កុម្ភៈ នេះថា ការសម្លាប់អ្នកកាសែតរូបនេះ ជាសញ្ញាថា សេរីភាពបញ្ចេញមតិ និងសេរីភាពសារព័ត៌មាននៅកម្ពុជា ធ្លាក់ចុះយ៉ាងខ្លាំង ហើយនិទណ្ឌភាពនៅតែបន្តនៅកម្ពុជា។
មន្ត្រីសម្របសម្រួលគម្រោងការពារសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា លោក ឆាយ ឈុនលី បញ្ជាក់ថា៖ «ករណីនេះរំលឹកយើងថា ស្ថានភាពបញ្ចេញមតិ ជាពិសេសសេរីភាពសារព័ត៌មាននៅកម្ពុជា កំពុងប្រឈមនឹងគ្រោះថ្នាក់ធ្ងន់ធ្ងរ។ អ្នកសារព័ត៌មានតែងត្រូវបានគេយាយីរំខាន ប្ដឹងឡើងតុលាការ ដោយហេតុផលនយោបាយ និងរងទុក្ខ ត្រូវគេសម្លាប់...»។
លោក សួន ចាន់ អ្នកយកព័ត៌មានឲ្យកាសែត "មារគាកម្ពុជា" ដែលគេមិនសូវឃើញបោះពុម្ពផ្សាយ ត្រូវបានមនុស្សមួយក្រុមវាយសម្លាប់ ដែលអាជ្ញាធរមូលដ្ឋានសង្ស័យថា ការសម្លាប់នេះ គឺជាក្រុមអ្នកនេសាទខុសច្បាប់នៅខេត្តកំពង់ឆ្នាំង ព្រួតគ្នាលួចវាយសម្លាប់នៅថ្ងៃទី២ កុម្ភៈ ដោយសារលោកបានរាយការណ៍ព័ត៌មានអំពីការនេសាទត្រីខុសច្បាប់នៅក្នុងខេត្តនេះ៕
No comments:
Post a Comment
yes