មេធាវី អ៊ុក វ៉ាន់ដេត នាយកប្រចាំប្រទេសអង្គការស្ពានយុត្តិធម៌អន្តរជាតិ
លោក មេធាវី អ៊ុក វ៉ាន់ដេត ជានាយកប្រចាំប្រទេសនៃអង្គការស្ពានយុត្តិធម៌អន្តរជាតិ។ លោកមេធាវីផ្តល់កិច្ចសម្ភាស ជាមួយកាសែត ភ្នំពេញ ប៉ុស្តិ៍ ពាក់ព័ន្ធនឹងការងារអនុវត្តច្បាប់ការពង្រឹងនីតិរដ្ឋនៅ កម្ពុជា និងជុំវិញការផ្តល់សេវាផ្លូវច្បាប់ដល់ប្រជាពលរដ្ឋក្រីក្រនៅក្នុងព្រះរាជាណាចក្រ មានខ្លឹមសារដូចខាងក្រោម៖
តាមការអង្កេតរបស់លោកផ្ទាល់ តើការកសាងសំណុំរឿងរបស់នគរបាលយុត្តិធម៌ចំពោះ ជនសង្ស័យ មានការបង្ខំឲ្យសារភាពឬប្រើទារុណកម្មផ្ទុយពីនីតិវិធីច្បាប់ដែរទេកន្លងមក?
ចំពោះបញ្ហានេះ នៅកន្លែងខ្លះ មន្ត្រីនគរបាលយុត្តិធម៌ខ្លះគេ គោរពនិងអនុវត្តតាមច្បាប់ត្រឹមត្រូវកន្លែងខ្លះ មន្រ្តីនគរបាលយុត្តិធម៌ មួយចំនួនគាត់ ក៏មិនគោរពច្បាប់បានត្រឹមត្រូវដែរ។ មូលហេតុ ទី១: គឺដោយសារការចេះដឹងរបស់គាត់នៅមានកម្រិត ទី២: ដោយសារតែពួកគាត់ពាក់ព័ន្ធនឹងផលប្រយោជន៍របស់ភាគីម្ខាង ធ្វើឲ្យគាត់ភ្លេចតួនាទីគាត់ជាអព្យាក្រឹត។ តែរឿងដែលពាក់ព័ន្ធនឹងនយោបាយ គាត់មិនពាក់ព័ន្ធនោះទេ តែពាក់ព័ន្ធតែនឹងផលប្រយោជន៍ពួកគេតែប៉ុណ្ណោះ។
តើនគរបាលយុត្តិធម៌មានការចោទប្រកាន់ឬកសាងសំណុំរឿងខុសដែរទេ ពេលបញ្ជូនទៅស្ថាប័នអយ្យការ?
តួនាទីរបស់មន្រ្តីនគរបាលមិនមែនជាតួនាទីចោទប្រកាន់ទេ។ គាត់គឺគ្រាន់តែជាអ្នកបង្កការសង្ស័យ និងធ្វើរបាយការណ៍ពីការសង្ស័យនោះនិងកសាងសំណុំរឿងបញ្ជូនទៅព្រះរាជអាជ្ញា ដើម្បីធ្វើការសម្រេចចោទប្រកាន់តាមច្បាប់ប៉ុណ្ណោះ។ ការកសាងសំណុំរឿងចោទប្រកាន់របស់គាត់នោះ គឺគ្រាន់តែជាការចោទប្រកាន់បឋម។
តើរាល់សំណុំរឿង ដែលបានចោទប្រកាន់បឋមពីនគរបាលយុត្តិធម៌នោះ ព្រះរាជអាជ្ញា ឬ តំណាងអយ្យការចាំបាច់ត្រូវតែតម្កល់ទុកឬរក្សាការចោទប្រកាន់ឬយ៉ាងណា?
វាអាស្រ័យទៅលើអង្គហេតុ។ ពេលខ្លះព្រះរាជអាជ្ញាឬតំណាងអយ្យការ ក៏ទម្លាក់ការចោទប្រកាន់និងមិនចោទប្រកាន់តាមអ្វីដែលនគរបាល យុត្តិធម៌ បានចោទប្រកាន់បឋមនោះដែរ។
តើជនជាប់ចោទ ឬ អ្នកទោស ដែលជាប់ពន្ធនាគារនៅទូទាំង ២៤ ខេត្ត-រាជធានី នោះទទួលបានមេធាវីការពារសិទ្ធិគ្រប់គ្រាន់តាមច្បាប់ដែរទេ?
នៅក្នុងប្រទេសយើង សេវាមេធាវីសម្រាប់ជនក្រីក្រនោះ គឺមិនគ្រប់គ្រាន់ទាល់តែសោះ។ មូលហេតុ គឺដោយសារមេធាវី ភាគច្រើនគាត់បំពេញការងារតែនៅក្នុងទីក្រុង រីឯបទល្មើសភាគច្រើនបានកើតឡើងនៅតាមខេត្តឆ្ងាយទីជនបទដាច់ស្រយាល។ ដូច្នេះ កង្វះខាតមេធាវី គឺមានច្រើនណាស់នៅក្នុងប្រទេស កម្ពុជា យើងបច្ចុប្បន្ននេះ។ បើគិតតាមករណីក្នុងមួយឆ្នាំៗគឺមានរាប់ម៉ឺនករណី តែយើងការពារបានតែប្រហែលពី ២០០០ ទៅ ៣០០០ ករណីតែប៉ុណ្ណោះ។ ដូច្នេះ ប្រមាណ ៦០ ភាគរយដែលមិនមានមេធាវីនៅក្នុងខេត្ត-ក្រុងដាច់ស្រយាល។
ដើម្បីជួយផ្តល់សេវាច្បាប់ ឬ ផ្តល់មេធាវីការពារដល់ជនជាប់ចោទឬអ្នកទោសខាងលើ តើអង្គការរបស់លោកបានធ្វើអ្វីខ្លះ?
ដោយសារតែមានតម្រូវការ និងភាពចាំបាច់នេះ យើងមានមេធាវីម្នាក់សម្រាប់ធ្វើការនៅ ២ ខេត្ត ឬ សម្រាប់តុលាការ ២។ ដូច្នេះ យើងឃើញថា សព្វថ្ងៃនេះសេចក្តីត្រូវការរបស់ប្រជាជនយើងគឺនៅខ្វះខាតច្រើនណាស់ ហើយបើទោះជាយើងខិតខំប្រឹងប្រែងយ៉ាងនេះក៏ដោយ ក៏យើងមិនអាចទទួលទម្ងន់នៃសេចក្តីត្រូវការនេះគ្រប់គ្រាន់នោះដែរ។
សព្វថ្ងៃនេះអង្គការរបស់លោកមានមេធាវី ចំនួនប៉ុន្មាននាក់ដែរ សម្រាប់ជួយជនក្រីក្រ?
ខ្ញុំមានមេធាវីតែ ១២ រូបទេ ហើយធ្វើការលើវិសាលភាពចំនួន ២០ ខេត្ត-ក្រុង នៅទូទាំងព្រះរាជាណាចក្រ កម្ពុជា។ យើងជួយបានប្រហែលតែ ៣០ ភាគរយទេនៃតម្រូវការរបស់ប្រជាជនយើង។ គឺយើងជួយបានតែករណីណាដែលវាចាំបាច់តែប៉ុណ្ណោះ ដូចជា ករណីជនជាប់ចោទបទឧក្រិដ្ឋ និងជនជាប់ចោទជាអនីតិជននិងមួយចំនួនទៀតពាក់ព័ន្ធនឹងរឿងក្តី មជ្ឈិមនិងការផ្តល់ការប្រឹក្សាផ្នែកច្បាប់ ដល់ប្រជាពលរដ្ឋ។ ចំពោះសេវាផ្តល់មេធាវី និងការប្រឹក្សាច្បាប់នេះគឺមិនយកកម្រៃនោះទេ។
តើលោកយល់ថា ការកាត់ក្តីរបស់តុលាការគ្រប់ជាន់ថ្នាក់សព្វថ្ងៃនេះ លុះដោយគតិច្បាប់និងយោងតាមមាត្រាច្បាប់ពាក់ព័ន្ធដែរទេ? មកពីហេតុអ្វី?
ចៅក្រមដែលបានរៀនសូត្របានថ្នាក់ខ្ពស់គាត់សម្រេចបានត្រឹមត្រូវ ប៉ុន្តែចៅក្រមមួយចំនួន ដែលគាត់មានចំណេះដឹងទាប និងមិនបានចូលរួមប្រជុំ ឬវគ្គបណ្តុះបណ្តាល បន្ថែម ឬ បង្កើនចំណេះដឹងរបស់គាត់ទៅតាមការវិវឌ្ឍរបស់ប្រទេសជាតិនោះ គឺសម្រេចក្តីមិនត្រឹមត្រូវ។ នេះមិនមែនដោយសារតែឆន្ទៈរបស់គាត់ទេ តែគឺដោយសារតែចំណេះដឹងរបស់គាត់។ ចំណែកបញ្ហាពាក់ព័ន្ធនឹងអំពើពុករលួយ ស៊ីសំណូកសូកប៉ាន់នោះ ខាងអង្គការខ្ញុំ មិនបានធ្វើការស្រាវជ្រាវឬពាក់ព័ន្ធទេ ហេតុដូច្នេះ ខ្ញុំសុំមិននិយាយបញ្ហានេះទេ។
តើលោកយល់យ៉ាងណាដែរចំពោះការអនុវត្តច្បាប់ នៅក្នុងព្រះរាជាណាចក្រ កម្ពុជា យើង សព្វថ្ងៃ? បានកម្រិតណាដែរ?
ការឈានទៅដល់នីតិរដ្ឋនោះ គឺនៅឆ្ងាយណាស់។ តែយើងឃើញមានការអនុវត្តមួយចំនួននោះមានការល្អប្រសើរដែរហើយ តែដើម្បីឈានទៅដល់ ប្រទេសនីតិរដ្ឋនោះ យើងត្រូវស៊ីពេលយ៉ាងតិចណាស់ ក៏ ២០ ឬ ៣០ ឆ្នាំទៀត ពីព្រោះ កត្តាទី១: ប្រព័ន្ធឬបុគ្គលិករបស់យើងដែលបម្រើការផ្នែកវិស័យយុត្តិធម៌នេះមានការខ្វះខាត (បុគ្គលិកមិនគ្រប់) ទី២: ចំណេះដឹងរបស់គាត់មិនទាន់មានការឯកភាពគ្នានៅឡើយទេ។ ម្នាក់យល់ផ្សេងក្រុម ១ យល់ផ្សេងនិងក្រុម ១ ទៀតយល់ផ្សឹង។ ទី៣៖ កត្តាស្ថានភាពហិរញ្ញវត្ថុដែលនៅជាបន្ទុករបស់ពួកគាត់នៅឡើយ។ ទី៤ រដ្ឋនៅមិនទាន់បានលូកដៃចូលទៅក្នុងការកែទម្រង់ប្រព័ន្ធយុត្តិធម៌ឲ្យបានការស៊ីជម្រៅនៅឡើយទេនាពេលបច្ចុប្បន្ននេះ៕
No comments:
Post a Comment
yes