ប្រជាពលរដ្ឋប្រមូលគ្នានៅតំបន់បូរីកីឡា បន្ទាប់ពីទទួលដំណឹងថាមានអាជ្ញាធរ ចុះមកធ្វើសកម្មភាពនៅតំបន់ដែលពួកគាត់រស់នៅ (រូបថត៖ ណាត សុភាព)
ប្រជាសហគមន៍បុរីកីឡា ឲ្យដឹងនៅថ្ងៃព្រហស្បតិ៍នេះថា ពួកគេប្តេជ្ញាបន្តកាន់កាប់អាគារទី៩ ស្ថិតនៅសង្កាត់វាលវង់ ខណ្ឌ៧មករា បើទោះជាមានការរាំងពីសមត្ថកិច្ចក៏ដោយ។
ការអះអាងនេះ ធ្វើឡើងបន្ទាប់ពីតំណាងប្រជាសហគមន៍ចំនួន១២នាក់ ត្រូវបានអនុញាតិឲ្យចូលទៅជួបអភិបាលរាជធានីភ្នំពេញ លោក ប៉ា សុជាតិវង្ស នៅព្រឹកថ្ងៃព្រហស្បតិ៍នេះ។
អ្នកតំណាងសហគមន៍បុរីកីឡា អ្នកស្រី ឆាយ គឺមហ៊ន មានប្រសាសន៍ថា គាត់បានសួរ ទៅអភិបាលរាជធានីភ្នំពេញថា តើលោកព្រមសាងសង់អាគារចំនួន២បន្ថែមទៀត ជូនអ្នកដែលសេសសល់ ពីការបណ្តេញចេញជាង១០០គ្រួសារ ដែរឬទេ? អ្នកស្រីថា អភិបាលរូបនេះ មិនបានឆ្លើយតបនឹងសំនួរឲ្យចំគោលដៅទេ ដោយឆ្លើយថា លោកនឹងសាងសង់តង់ឲ្យអ្នកដែលសេសល់ទាំងនោះ សម្រាប់រស់នៅ បណ្តោះអាសន្នទៅវិញ។
អ្នកស្រី ឆាយ គឺម ហ៊ន បញ្ជាក់ថា ពួកគាត់មិនអាចទទួលយកការដោះស្រាយដោយត្រឹមតែសង់តង់ ជាជម្រកបណ្តោះអាសន្ននេះទេ។ អ្នកស្រី បន្តថា ពួកគាត់នឹងចាកចេញពីគំនរសំរាម ទៅរស់នៅអាគារទី៩ ដែលសង់រួចបានប្រមាណ៨០ភាគរយ ស្នាក់នៅបណ្តោះអាសន្ន រហូតមានដំណោះស្រាយ «ខ្ញុំមិនត្រូវការជម្រកបណ្តោះអាសន្នទេ អ្វីដែលនាងខ្ញុំត្រូវការ គឺត្រូវការឲ្យគាត់សាងសង់អគារទី៩ ទី១០ ឲ្យបានឆាប់បើមិនអញ្ចឹងទេ នៅក្នុងពេលនេះ ពួកខ្ញុំនឹងទៅត្រឡប់ទៅវិញនេះ គឺពួកខ្ញុំមិនអាចចុះពីលើអគារទី៩ ទី១០ទេបង ព្រោះខ្ញុំរស់នៅលើគំនរសំរាមតទៅទៀតលែងបានហើយ»។
អនុប្រធានអង្កេតសិទ្ធិមនុស្ស និងជំនួយផ្នែកច្បាប់ នៅសមាគមអាដហុក លោក ណៃ វ៉ាន់ដា យល់ថា ក្រុមហ៊ុន និងសាលារាជធានី ត្រូវដោះស្រាយជូនអ្នកបុរីកីឡាឲ្យបានឆាប់ មិនគួរពន្យាពេលបែបនេះទេ។ លោកបន្តថា បើសាលារាជធានីមិនដោះស្រាយជូនប្រជាសហគមន៍ទេ នឹងធ្វើឲ្យការរំលោភសិទ្ធិមនុស្សកាន់តែធ្ងន់ធ្ងរ «ខ្ញុំគិតថា ប្រសិនជាក្នុងកាលៈទេសៈនេះ ស្ថានភាពសិទ្ធិមនុស្ស ស្ថានភាពនយោបាយ កំពុងមានបញ្ហារកាំរកូស ប្រទាំងប្រទិសអញ្ចឹង បន្ថែមអ្វីដែលអាជ្ញាធរធ្វើទៅលើប្រជាពលរដ្ឋ ក្រីក្រ អត់ផ្ទះ អត់សម្បែងនោះ ខ្ញុំគិតថា ផលអាក្រក់នោះវាអាចកើតមាន ចំពោះសង្គមជាតិយើង»។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា បើប្រជាសហគមន៍ ព្រមទទួលយកការសាងសង់តង់បណ្តោះអាសន្ន សាលារាជធានីនីងធ្វើឲ្យ ប៉ុន្តែបើប្រជាសហគមន៍ទាំងនោះមិនព្រមយកនោះ ជាសិទ្ធិរបស់ពួកគេ «ហើយនេះជាការសម្រេចចិត្តរបស់គាត់ ដែលគាត់មិនដឹងជាគាត់មានអ្នកណានៅពីខាងក្រោយ ធ្វើការញ៉ុះញ៉ង់ទេ ប៉ុន្តែអ្វីដែលសំខាន់សម្រាប់យើង គឺយើងក្នុងនាមជាមនុស្សធម៌ យើងចង់ឲ្យគាត់រស់នៅបណ្តោះអាសន្ននោះ ទៅតាមស្ថានភាពនាពេលបច្ចុប្បន្ននេះទេ។ ខ្ញុំមិនដឹងទេ រឿងបញ្ហាសាងសង់បន្ថែម គ្រាន់ថែមអគារ ឬមិនបន្ថែមអគារនោះ មិនទាន់ជាលទ្ធភាពរបស់ខ្ញុំឆ្លើយជូនបានទេ គឺទុកឲ្យក្រុមការងារ ធ្វើការសិក្សាសិន។ អ្វីដែលយើង ធ្វើការដោះស្រាយចំពោះមុខ គឺរឿងបញ្ហាដោះស្រាយជម្រកបណ្តោះអាសន្នជូនគាត់»។
VOD មិនអាចសុំការបំភ្លឺ ពីប្រធានក្រុមហ៊ុនផានអ៊ីម៉ិច លោកស្រី ស៊ុយ សុផាន បានទេ នៅរសៀលថ្ងៃព្រហស្បតិ៍នេះ។
សហគមន៍បុរីកីឡា មានជម្លោះដីធ្លីជាមួយក្រុមហ៊ុនផានអ៊ីម៉ិច ជាច្រើនឆ្នាំមកហើយ ដោយខាងក្រុមហ៊ុនផានអ៊ីម៉ិច បានសន្យាថានឹងសាងសង់អាគារចំនួន១០ សម្រាប់ជាថ្នូរនឹងការយកដីតំបន់បុរីកីឡាទៅអភិវឌ្ឍន៍ ប៉ុន្តែក្រុមហ៊ុននេះ សង់បានតែ ៨អាគារ ជាហេតុនាំឲ្យពលរដ្ឋដែលមិនទទួលបានសំណង ផ្ទុះការតវ៉ា រហូតមកដល់បច្ចុប្បន្ននេះ៕
No comments:
Post a Comment
yes