ជនជាតិវៀតណាម១៥នាក់ លួចចូលកាប់ឈើក្នុងព្រៃសហគមន៍ស្រុកពេជ្រាដា ខេត្តមណ្ឌលគិរី ត្រូវប្រជាពលរដ្ឋសហគមន៍ចាប់បានទាំងមនុស្ស ទាំងវត្ថុតាងប្រគល់ឲ្យប្រគល់ឲ្យប៉ុស្តិ៍រដ្ឋបាលឃុំប៊ូស្រា។
ប្រជាសហគមន៍ជនជាតិដើមភាគតិចចំនួនបីភូមិ គឺភូមិពូលុ ភូមិឡាំមេះ និងភូមិទូចារ ក្នុងឃុំប៊ូស្រា ចំនួន៦៦នាក់ កាលពីម៉ោង៤ព្រឹកព្រលឹមថ្ងៃសៅរ៍ ទី៨ មីនា ម្សិលមិញ បានចុះល្បាតការពារព្រៃសហគមន៍ និងចាប់បានជនជាតិវៀតណាម១៥នាក់ ដែលកំពុងធ្វើសកម្មភាពកាប់ឈើដោយខុសច្បាប់នៅចំណុចអូរជឺដាច ដោយប្រមូលបានវត្ថុតាងមួយចំនួន ដូចជា គោយន្តច្នៃចំនួន ៤គ្រឿង រណាយន្ត ឬត្រុងសោន័រ ៧គ្រឿង កាំភ្លើងធុនអ៊ឹមសី (M16) ១ដើម ម៉ូតូ ៩គ្រឿង និងឈើគគីរកាត់រួចប្រមាណ ៤ម៉ែត្រគូប។
VOD មិនទាន់អាចទាក់ទងអាជ្ញាធរស្រុកពេជ្រាដា និងខេត្តមណ្ឌលគិរី ដើម្បីសុំការអត្ថាធិប្បាយទាក់ទងនឹងបញ្ហាជនជាតិវៀតណាមខុសច្បាប់ទាំងអស់នោះ ដែលលួចចូលមកកាប់ឈើនៅក្នុងដីខ្មែរនេះនៅឡើយទេ។
ប្រជាសហគមន៍ជនជាតិដើមភាគតិច កំពុងរង់ចាំមើលចំណាត់ការរបស់សមត្ថកិច្ច លើករណីនេះ។ ពួកគាត់អះអាងថា កន្លងមកពួកគាត់មិនដែលចាប់បានជនជាតិវៀតណាមដូចពេលនេះទេ ដោយសារពួកគេរត់គេចយករួចខ្លួន ដោយបន្សល់ទុកតែវត្ថុតាងប៉ុណ្ណោះ៕
No comments:
Post a Comment
yes