លោកស្រី យីង ឡាក់ ចាប់ដៃអ្នកគាំទ្របន្ទាប់ពីសន្និសីទកាសែត
(រូបថតពី បាងកកប៉ុស្តិ៍)
នៅក្នុងអំឡុងពេលតុលាការធ្វើសេចក្ដីសម្រេច ជាប្រវត្តិសាស្ត្រនេះ ក្រុមអាវក្រហម ដែលគាំទ្រលោកស្រី ចាប់ផ្ដើមសម្ដែងកំហឹង ហើយគម្រាងធ្វើចលនាមួយ ដើម្បីនាំលោកស្រីយីងឡាក់ វិលមករកជីវិតនយោបាយវិញ ខណៈលោកស្រីជម្រាបលាអ្នកគាំទ្រ ដោយការញញឹមស្ងួត។
ថ្លែងនៅក្នុងសន្និសីទកាសែត លោកស្រីមានប្រសាសន៍អរគុណ អ្នកគាំទ្រលោកស្រី ជាមួយការជម្រាបលា ប្រកបដោយមោទនភាព ដែលលោកស្រីបានធ្វើជានាយករដ្ឋមន្ត្រីរបស់រាជាណាចក្រថៃ មានរយៈពេល ២ឆ្នាំ ៩ខែ និង២ថ្ងៃ។ លោកស្រីនិយាយថា លោកស្រីនៅតែមានការគាំទ្រពីប្រជាជនថៃ ទោះស្ថិតនៅក្នុងស្ថានភាពបែបនេះក្ដី។
ទោះជាបែបនេះក្ដី លោកស្រីយីងឡាក់ បានសម្រេចទទួល យកសាលដីការបស់តុលាការរួចទៅហើយ។
តើការចាកចេញរបស់លោកស្រី យីងឡាក់ អាចធ្វើឲ្យវិបត្តិនយោបាយនៅថៃ វិលទៅរកស្ថានភាព ប្រក្រតី និងមានការសះសាជាតិដែរឬទេ?
អ្នកវិភាគនិងអ្នកសង្កេតការណ៍ថៃ មានការគិតខុសៗគ្នា។ អ្នកខ្លះ មានសុទិដ្ឋិនិយមថា ស្ថានការណ៍នឹងស្ងប់ស្ងាត់ ហើយការសះសាជាតិអាចកើតមាន ប៉ុន្តែក្រុមនេះ ព្រមានថា វាអាស្រ័យលើលោកស្រី យីងឡាក់ និងគ្រួសារត្រកូលស៊ីណាវាត្រា ថាតើត្រូវដកខ្លួនឆ្ងាយពីជិវិតនយោបាយ ដ៏គ្រោះថ្នាក់ទៀត ឬបន្តប្រលូកទៀត។
លោក Thitinan Pongsudhirak នាយកវិទ្យាសា្ថន សន្តិសុខ និងការសិក្សាអន្តរជាតិ នៅសាកលវិទ្យាល័យ Chulalongkorn ក្រុងបាងកក មានប្រសាសន៍ថា ភាគីទាំងពីរ សុទ្ធតែមានទំនុកចិត្តខាងនយោបាយរៀងខ្លួនៗ ក្នុងការប្រជែងគ្នា លើសមរភូមិ មួយគឺដើម្បីប្រជាប្រិយភាពពីប្រជាជន។ លោកពន្យល់ថា អ្នកនយោបាយប្រជែងគ្នានេះ ត្រូវតែគិតថា ពួកគេ មិនអាចឈ្នះលើគ្នាបានឡើយ។ លោកថាករណីនេះ វាគ្រាន់តែកំណត់ពេលវេលា ដើម្បីវិលរកសមភូមិថ្មីមួយឡើងវិញប៉ុណ្ណោះ ហើយបើមិនមានដំណោះស្រាយ សន្តិភាព និងយោគយល់គ្នា គឺស្ថានការណ៍កាន់តែអាក្រក់ជាងមុន។
សេចក្ដីសម្រេចរបស់តុលាការ កាលពីថ្ងៃពុធ បានបង្គាប់ឲ្យ គណៈរដ្ឋមន្ត្រីលោកស្រី យីងឡាក់ ចំនួន៩រូប ត្រូវចាកចេញពីតំណែង ហើយក្នុងនោះមានទាំងរដ្ឋមន្ត្រីការបរទេស លោក សូរ៉ាពង្ស ទុកវិចក្រចៃគុល ដែលជាមនុស្សសំខាន់ជាងគេ នៅក្នុងគណបក្សភឿថៃ របស់លោកស្រី យីងឡាក់។ អ្នកនយោបាយថៃ ទាំង១០រូបនេះ គឺរួមទាំងលោកស្រីយីងឡាក់ អាចបាត់បង់ឱកាសធ្វើនយោបាយ រហូតដល់៥ឆ្នាំ។ លោកអាប់ភីស៊ីត មេដឹកនាំបក្សប្រឆាំងបានហៅសេចក្ដីសម្រេច របស់តុលាការរដ្ឋធម្មនុញ្ញ ថាជាសញ្ញានៃការ បន្ថយភាពតានតឹងខាងនយោបាយ។
បែបនេះក្ដី តើលោកស្រីយីងឡាក់ អាចវិលចូលនយោបាយវិញដែរឬទេ?
អ្នកសង្កេតការណ៍ ព្រមានថា លោកស្រី យីងឡាក់ ទំនងជាពិបាកវិលមករកជីវិតនយោបាយវិញ ព្រោះតែលោកស្រី នៅប្រឈមនឹងករណីមួយទៀត គឺករណីបណ្ដោយឲ្យមានរឿងអាស្រូវពុករលួយ នៅក្នុងគម្រោងទិញស្រូវ ដែលធ្វើឲ្យកសិករថៃ ខាតបង់ប្រាក់រាប់ពានលានបាត។ ករណីនេះ នាំឲ្យលោកស្រី ប្រឈម និងកំហុសមួយទៀត គឺសំណុំរឿងព្រហ្មទណ្ឌ ហើយអាចនាំឲ្យលោកស្រី ត្រូវបានរាំរាំងការធ្វើនយោបាយ ៥ឆ្នាំ ប្រសិនបើគណៈកម្មាការប្រឆាំងអំពើ់ពុករលួយ ធ្វើការចោទជាផ្លូវការប្រឆាំង លោកស្រី។
មិនទាន់មានប្រតិកម្មភ្លាមៗ ពីលោកថាក់ស៊ីន បងប្រុសរបស់លោកស្រី យីងឡាក់ នៅឡើយ។ លោក ថាក់ស៊ីន ដែលជាចលករមួយដ៏សំខាន់ នៅពីក្រោយលោកស្រី យីងឡាក់ នៅមិនទាន់មានប្រតិកម្មអ្វីឡើយ ករណីប្អូនស្រីលោក ត្រូវបានដកហូតតំណែង។ រាជាណាចក្រថៃ ស្ថិតនៅក្នុងស្ថានភាពហិង្សា នយោបាយ ចាប់តាំងពីឆ្នាំ២០០៦ គឺជាឆ្នាំដែល លោកថាក់ស៊ីន ត្រូវបានបណ្ដេញពីតំណែងនាយករដ្ឋមន្ត្រី ដោយការធ្វើរដ្ឋប្រហារ។ ឥឡូវលោកកំពុងគេចខ្លួននៅក្រៅប្រទេស ពីបទបំពានអំណាចរដ្ឋ និងពុករលួយ។ ករណីនេះ នាំឲ្យលោកមានទោសពីរឆ្នាំ។
អ្នកសង្កេតការណ៍ មើលឃើញថា ភាពស្ងប់ស្ងាត់របស់លោកថាក់ស៊ីន គឺជាសញ្ញាមួយនៃការបន្ថយកំហឹង របស់ក្រុមប្រឆាំងលោក ដែលមកពីក្រុមអាវលឿង។ តែបែបនេះក្ដី ក្រុមប្រឆាំង មិនបានច្រៀងរាំសប្បាយ ចំពោះការដកហូតអំណាចលោកស្រី យីងឡាក់ក្ដី តែក្រុមនេះ បានប្រកាស ធ្វើការដើរតាមដងផ្លូវ រហូតមានការចេញសេចក្ដីសម្រេច មួយ បញ្ឈប់ទាំងស្រុក ត្រកូលលោកថាក់ស៊ីន ពីជិវិតនយោបាយថៃ៕
No comments:
Post a Comment
yes