ធនាគារជាតិនៃកម្ពុជា ក្រោមការណែនាំរបស់លោកនាយករដ្ឋមន្ត្រី ហ៊ុន សែន នៅថ្ងៃអង្គារនេះ ប្រកាសដាក់ឲ្យប្រើប្រាស់ក្រដាសប្រាក់៥០០០០រៀលថ្មី ដែលមានរូបព្រះបរមរតនកោដ្ឋ ចាប់ពីថ្ងៃទី០៦ខែឧសភានេះតទៅ។
សេចក្តីប្រកាសព័ត៌មានរបស់ធនាគារជាតិនៃកម្ពុជា ចុះថ្ងៃអង្គារនេះ ឲ្យដឹងថា ការដាក់ឲ្យប្រើប្រាស់នេះ គឺដើម្បីចូលរួមអបអរសាទរព្រះរាជពិធីបុណ្យចម្រើនព្រះជន្មព្រះករុណាព្រះបរមនាថ នរោត្តម សីហមុនី គម្រប់ព្រះជន្មាយុ៦១ យាងចូល៦២ ព្រះវស្សា ដែលនឹងប្រព្រឹត្តទៅនៅថ្ងៃទី១៣-១៤-១៥ខែឧសភា។សេចក្តីប្រកាសបន្តថា លោកនាយករដ្ឋមន្ត្រីហ៊ុន សែន បានអនុញ្ញាតឲ្យធនាគារជាតិនៃកម្ពុជា បោះផ្សាយទន្ទឹមគ្នានឹងធនប័ត្រផ្សេងទៀត និងដាក់ឲ្យចរាចរណ៍ធនប័ត្រគំរូថ្មីប្រភេទ៥០០០០រៀល ជាផ្លូវការ ចាប់ពីថ្ងៃទី៦ ឧសភា នេះតទៅ ។
លក្ខណៈទូទៅ ៖ ទំហំធនប័ត្រ (ក្រដាសប្រាក់) បណ្តោយ១៥៥មីល្លីម៉ែត្រ និងទទឹង៧២មីលី្លម៉ែត្រ និងពណ៌ចម្បង គឺពណ៌ស្លាទុំ និងពណ៌ត្នោត ។
ផ្ទៃខាងមុខ
-ផ្នែកកណ្តាល ៖ ខាងស្តាំត្រូវបានរំលេចឡើងនូវព្រះឆាយាល័ក្ខណ៍មើលពីមុខបញ្ឆិតចំហៀងខាងឆ្វេងនៃអតីត ព្រះមហាក្សត្រ ព្រះបរមរតនកោដ្ឋ ខាងឆ្វេងមានលេខ «៥០០០០» នៅពីលើគេ បន្ទាប់មកគឺជាហត្ថលេខារបស់ទេសាភិបាល និងអគ្គបេឡា ព្រមទាំងរូបជើងពានទ្រព្រះខ័នព័ទ្ធជុំវិញដោយកម្រងផ្កា និងក្បាច់ភ្ញីទេស និងនៅខាងក្រោមមានលេខ-មាលា ដែលបោះពុម្ពដោយទឹកខ្មៅពណ៌ខ្មៅ រូបចម្លាក់នាគក្បាល៧ ដែលយកគំរូតាមរូបចម្លាក់ថ្មនៅប្រាសាទបាលីលេយ្យជិតអង្គរធំ និងអក្សរ «ប្រាំម៉ឺនរៀល» ព្រមទាំងអក្សរ «អ្នកក្លែងក្រដាស ប្រាក់ នឹងត្រូវផ្តន្ទាទោសតាមច្បាប់» នៅគែមខាងក្រោមនោះ និងមានខ្សែសុវត្ថិភាពទំហំ១,២មីលី្លម៉ែត្រកាត់ទទឹងក្រដាសប្រាក់ពីលើដល់ក្រោម ។
-ផ្នែកខាងស្តាំ ៖ ជ្រុងលើមានអក្សរ «ធនាគារជាតិនៃកម្ពុជា» ព្រមទាំងមានលេខ-មាលា ដែលត្រូវបានបោះពុម្ពដោយទឹកខ្មៅពណ៌ក្រហមនៅពីក្រោមនោះ និងជ្រុងខាងក្រោមមានលេខ «៥០០០០» និង «50000» នៅបន្តបន្ទាប់គ្នា ។
-ផ្នែកខាងឆ្វេង ៖ មានលេខ “50000” ព្រាលៗ ដែលត្រូវបានបោះពុម្ពតាមបន្ទាត់បញ្ឈរ ព្រមទាំងមាននិមិត្តសញ្ញាពិសេសសម្រាប់ជនពិការភ្នែកនៅពីក្រោមនោះ និងនៅកៀនខាងឆ្វេងមាន Hologram ទំហំ១០មីលី ម៉ែត្រ ប្រកបដោយបច្ចេកវិទ្យាទំនើប និងស្តង់ដារកម្រិតខ្ពស់កាត់ទទឹងក្រដាសប្រាក់ពីលើដល់ក្រោម ។
ផ្ទៃខាងខ្នង
-ផ្នែកកណ្តាល ៖ ត្រូវបានរំលេចឡើងនូវរូបភាពប្រាសាទបាគង នៃក្រុមប្រាសាទរលួសក្នុងខេត្តសៀមរាប និងមានអក្សរ «ប្រាំម៉ឺនរៀល» នៅពីក្រោមនោះ ។
-ផ្នែកខាងស្តាំ ៖ មានរូបភាពកូនដំរីឈរទម្លាក់ប្រមោយចុះក្រោម ដែលយកគំរូតាមរូបចម្លាក់ថ្មនៅប្រាសាទកោះកេរ ក្នុងឃុំស្រយ៉ង់ ខេត្តព្រះវិហារ និងមានលេខ «៥០០០០» នៅពីក្រោមនោះ ព្រមទាំងលេខ «50000» ដែលត្រូវបានបោះពុម្ពតាមបន្ទាប់បញ្ឈរនៅកៀនខាងស្តាំ។
-ផ្នែកខាងឆ្វេង ៖ ខាងលើមានអក្សរ «ធនាគារជាតិនៃកម្ពុជា» និង “NATIONAL BANK OF CABODIA” នៅបន្តបន្ទាប់គ្នា ព្រមទាំងលេខ «២០១៣» នៅពីក្រោមនោះ និងនៅជ្រុងខាងក្រោមមានលេខ «៥០០០០» ។
កន្លងទៅ អនុប្រធានគណបក្សសង្រ្គោះជាតិ លោក កឹម សុខា មានប្រសាសន៍ថា រាជរដ្ឋាភិបាលកម្ពុជា កំពុងតែពិបាកក្នុងការបើកប្រាក់ខែដល់មន្រ្តីរាជការ ហើយលោកដាក់ជាចម្ងល់ចោទលើរដ្ឋាភិបាលថា កំពុងតែលួចបោះពុម្ពលុយបន្ថែម៕
No comments:
Post a Comment
yes