មន្ត្រីគណបក្សសង្គ្រោះជាតិ មិនបានបញ្ជាក់ច្បាស់ពីព័ត៌មាននៃជំនួបរវាងគណបក្សប្រឆាំង និងគណបក្សប្រជាជនកម្ពុជា ដើម្បីពិភាក្សាពីកំណែទម្រង់ការបោះឆ្នោត។
ប្រធានក្រុមគណៈកម្មការចម្រុះគណបក្សសង្គ្រោះជាតិ លោក សុន ឆ័យ ប្រាប់VODនៅព្រឹកថ្ងៃព្រហស្បតិ៍នេះថា គណបក្ស មិនមានជំនួបជាមួយគណៈប្រតិភូជប៉ុន ឬគណបក្សប្រជាជនកម្ពុជាទេ គឺគ្រាន់តែជួបជាមួយអង្គការមួយនៅទីស្នាក់ការគណបក្សសង្គ្រោះជាតិ។
សារព័ត៌មានក្នុងស្រុក បានដកស្រង់សម្តីមន្ត្រីគណបក្សសង្គ្រោះជាតិ លោក គួយ ប៊ុនរឿន កាលពីថ្ងៃពុធថា គណបក្ស នឹងជួបជាមួយគណបក្សប្រជាជនកម្ពុជាជាលក្ខណៈឯកជនមួយនៅវេលាម៉ោង៩និង៣០នាទី។ លោកថា លោកបានទាក់ទងលោកព្រុំ សុខា រដ្ឋលេខាធិការក្រសួងមហាផ្ទៃ ហើយបានរៀបចំកិច្ចប្រជុំនៅទីតាំងសម្ងាត់មួយ។ លោកបញ្ជាក់ថាចំណុចផ្តោតនៃកិច្ចប្រជុំ គឺអំពីកំណែទម្រង់នៃការបោះឆ្នោត ឲ្យមានគោលបំណងត្រួសត្រាយផ្លូវសម្រាប់ជំនួបកំពូលរវាងលោកហ៊ុន សែន និងលោក សម រង្ស៊ី។
VOD មិនអាចទាក់ទងលោក ជាម យៀប តំណាងរាស្ត្រគណបក្សប្រជាជនកម្ពុជា ដើម្បីអត្ថាធិប្បាយលើបញ្ហានេះនៅឡើយទេ។
ជំនួបមានលក្ខណៈលាក់លាមនេះ ធ្វើឡើងស្របពេលដែលគណៈប្រតិភូជប៉ុន បានមកសិក្សាពីកំណែទម្រង់ការបោះឆ្នោតនៅកម្ពុជា។
កាលពីថ្ងៃអង្គារ ប្រធានគណបក្សសង្គ្រោះជាតិ លោក សម រង្ស៊ី បានសរសេរជាសេចក្តីជូនដំណឹងមិនផ្លូវការមួយ ហើយត្រូវបានបង្ហោះនៅលើហ្វេសប៊ុករបស់គណបក្សថា នៅថ្ងៃនេះ លោក បានទាក់ទងលោកស ខេង ដើម្បីប្រាប់ថា តំណងរាស្ត្រគណបក្សសង្គ្រោះជាតិ លោក សុន ឆ័យ ឬលោក គួយ ប៊ុនរឿន នឹងទាក់ទងតំណាងគណក្សប្រជាជនកម្ពុជា ដើម្បីបន្តការចរចា។លោក សម រង្ស៊ី បញ្ជាក់ថា«យើងសង្ឃឹមថានឹងឈានទៅដល់កិច្ចព្រមព្រៀងលម្អិតមួយក្នុងពេលឆាប់ៗ ដើម្បីបញ្ចប់បញ្ហាជាប់គាំងនយោបាយបច្ចុប្បន្ន ដូចបានចែងក្នុងសេចក្តីប្រកាសរួម ដែលមានគោលការណ៍ជាស្រេចឯកភាពដោយបក្សទាំងពីរ»។
កាលពីថ្ងៃអង្គារ មន្ត្រីគណបក្សសង្គ្រោះជាតិ បានជួបជាមួយគណៈប្រតិភូរបស់ប្រទេសជប៉ុន១០រូបដែលមានជំនាញលើការបោះឆ្នោត ដើម្បីសិក្សាពីចំណុចនៃកំណែទម្រង់ការបោះឆ្នោតនៅកម្ពុជា។លោក សុន ឆ័យ បញ្ជាក់ថា«ទីមួយគេស្រាវជ្រាវសិន ឲ្យដឹងថាតើប្រទេសកម្ពុជា ខ្វះខាតអី ត្រូវការអ្វីខ្លះ បន្ទាប់ស្រាវជ្រាវហើយ គេនឹងធ្វើរបាយការណ៍មួយទៅរាជរដ្ឋាភិបាល ដើម្បីរៀបចំជាគម្រោងជំនួយដើម្បីជួយលើកិច្ចការកំណែទម្រង់ការបោះឆ្នោតនៅកម្ពុជា»។លោក សុន ឆ័យ បន្តថា គណៈប្រតិភូជប៉ុន មិនលើកយកបញ្ហានយោបាយមកនិយាយទេ គឺគ្រាន់តែចង់យល់ពីបញ្ហាកំណែទម្រង់ការបោះឆ្នោត។ភាគីជប៉ុន ក៏ចង់ឲ្យមានការជួបគ្នាជាត្រីភាគីនៅពេលឆាប់ៗមុនពេលត្រឡប់ទៅជប៉ុនវិញ។ លោកថា ប្រទេសជប៉ុនមកកម្ពុជានៅពេលនេះ ដោយសារមិនអាចរង់ចាំការត្រូវរ៉ូវនៃការដោះស្រាយបញ្ហានយោបាយរវាងគណបក្ស ដូច្នេះគេចង់ដឹងថាតើកិច្ចការអ្វីនៃកំណែទម្រង់ ដែលអាចធ្វើទៅបាន៕
No comments:
Post a Comment
yes