រោងចក្រ អានហ៊្វុល ហ្កាមិន (ANFUL Garment factory) ស្ថិតក្នុងឃុំសំបួរ ស្រុកសំរោងទង ខេត្តកំពង់ស្ពឺ កម្មករបានដួលសន្លប់ជាថ្មីទៀត នៅពេលចាប់ផ្ដើមចូលធ្វើការដំបូងនៅព្រឹកថ្ងៃព្រហស្បតិ៍ ទី ២៧ តុលា និងបន្ទាប់ពីការឈប់សម្រាក ២ ថ្ងៃ។
២៧-តុលា-២០១១៖ កម្មការិនីរោងចក្រ អានហ៊្វុល ហ្កាមិន
កំពុងទទួលការព្យាបាល។
កម្មករសន្លប់ត្រូវបានគេបញ្ជូនទៅព្យាបាលនៅមន្ទីរពេទ្យបង្អែកខេត្តកំពង់ស្ពឺ និងនៅមណ្ឌលសុខភាពចោមចៅ ក្នុងស្រុកអង្គស្នួល ខេត្តកណ្ដាល ដែលនៅជិតរោងចក្រនោះ។
ប្រធានសជីពសេរីកម្មករនៃព្រះរាជាណាចក្រកម្ពុជា លោក ជា មុនី មានប្រសាសន៍ក្រោយការអង្កេតតាមដានលើករណីកម្មករដួលសន្លប់របស់កម្មករចក្រ អានហ៊្វុល ហ្កាមិន (ANFUL Garment factory) ថា យ៉ាងហោចណាស់មានកម្មករជាង ២០០ នាក់បានឈឺសន្លប់ជាថ្មីទៀត។
លោកបានសន្និដ្ឋានថា ការដួលសន្លប់ជាលើទីពីរនេះ ដោយសារកម្មករនៅមានកម្លាំងខ្សោយ បន្ទាប់ពីការពុលដួលសន្លប់លើកទីមួយ កាលពីថ្ងៃទី ២៤ តុលា ហើយបរិយាកាសនៅក្នុងរោងចក្រ នៅមានក្លិនជាតិពុលបណ្ដាលពីការដាក់ថ្នាំការពារក្រណាត់ កាលពីថ្ងៃអាទិត្យ ទី២៣ តុលា។
ស្របពេលជាមួយគ្នានេះដែរ លោកស្នើសុំទៅភាគីខាងរោងចក្រ និងអាជ្ញាធរពាក់ព័ន្ធពន្យារពេលឲ្យកម្មករឈប់សម្រាកបានមួយសប្ដាហ៍ទៀត ដើម្បីឲ្យកម្មករមានសុខភាពរឹងមាំ និងសុំឲ្យមានការអង្កេតឲ្យបានច្បាស់លាស់ ថាតើការសម្អាតក្លិន ដែលមានជាតិពុលនៅក្នុងរោងចក្រនោះធ្វើបានត្រឹមត្រូវតាមលក្ខណៈបច្ចេកទេស ដែលធានាដល់សុវត្ថិភាពកម្មករពេលចូលធ្វើការវិញនោះ ឬក៏យ៉ាងណា។
កម្មករដែលបានដួលសន្លប់ ហើយត្រូវបានក្រុមគ្រូពេទ្យនៅមណ្ឌលសុខភាពចោមចៅជួយសង្គ្រោះហើយបានដឹងខ្លួនវិញ ថ្លែងឲ្យដឹងថា ពេលពួកគេមកពីផ្ទះមានកម្លាំងធម្មតា ប៉ុន្តែ ពេលចូលមកដល់ក្នុងរោងចក្រ ពួកគេហាក់មានអារម្មណ៍ចាប់ផ្ដើមតឹងទ្រូងទន់ដៃជើង ហើយដួលលែងដឹងខ្លួនតែម្ដង។
លោកវេជ្ជបណ្ឌិតប្រចាំមណ្ឌលសុខភាព "បែកចាន" លោក ជា សុគន្ធ ដែលបានពិនិត្យព្យាបាលកម្មករសន្លប់ បានបញ្ជាក់ថា ពួកគាត់ភាគច្រើនបានខ្វះជាតិស្ករក្នុងឈាម ធ្វើឲ្យអ្នកជំងឺទន់ដៃជើង វិលមុខជាដើម។
តែទោះជាយ៉ាងណាក្ដី លោកបញ្ជាក់ថា នេះជាតាមដានអាការៈរោគបឋម ដើម្បីព្យាបាលសង្គ្រោះបន្ទាន់ ដោយអ្នកជំនាញមិនទាន់យកឈាមអ្នកជំងឺ ទៅពិនិត្យក្នុងមន្ទីរពិសោធន៍តាមលក្ខណៈបច្ចេកទេសនៅឡើយទេ។
លោកបញ្ជាក់ថា តាមបច្ចេកទេស ប្រភេទជាតិពុលមួយចំនួន ក៏អាចធ្វើឲ្យមានប្រតិកម្មក្នុងឈាម ឬធ្វើឲ្យឈាមមានចលនាមិនប្រក្រតីបានដែរ។
វិទ្យុអាស៊ីសេរីមិនទាន់អាចទាក់ទងភាគីខាងរោងចក្រ និងមន្ត្រីក្រសួងការងារ ដើម្បីឆ្លើយតបទាក់ទងនឹងការស្នើសុំរបស់លោក ជា មុនី បាននៅឡើយទេ នៅល្ងាចថ្ងៃព្រហស្បតិ៍ ទី ២៧ តុលា ហើយក្រុមកម្មករក៏មិនទាន់បានដឹងថា តើពួកគាត់នឹងត្រូវបានឈប់សម្រាកបន្តទៀត ឬក៏យ៉ាងណានោះទេ។
ប៉ុន្តែ ប្រធានការិយាល័យអធិការកិច្ច កិច្ចការនីតិកម្ម នៃក្រសួងការងារ និងបណ្ដុះបណ្ដាលវិជ្ជាជីវៈ លោក ម៉េង ហុង មានប្រសាសន៍បញ្ជាក់កាលពីថ្ងៃទី ២៥ តុលាថា ក្រសួងមានគណៈកម្មការសិក្សាស្រាវជ្រាវទប់ស្កាត់ករណីសន្លប់នេះ បានចុះអង្កេតដល់រោងចក្រហើយ និងបានដាក់វិធានការ ៤ ចំណុច។ ទីមួយ ឲ្យរោងចក្រផ្អាកដំណើរការ ២ ថ្ងៃ គឺថ្ងៃទី ២៥ និង ២៦ តុលា។ វិធានការទី២ ត្រូវសម្អាតទាំងអស់ ទាំងបរិវេណទីធ្លា ធ្វើយ៉ាងណាកុំឲ្យមានក្លិនជាតិពុលទៀត។ ទី៣ រោងចក្របើកម៉ាស៊ីនត្រជាក់កន្លះម៉ោងមុនកម្មករចូលធ្វើការ និងវិធានការទី៤ គឺឲ្យប្រធានក្រុមក្លីនិកនៅក្នុងរោងចក្រ ត្រូវតែតាមដានសកម្មភាពកម្មករ បើមានកម្មករណាមិនស្រួល ត្រូវបញ្ជូនទៅមន្ទីរពេទ្យជាបន្ទាន់ ហើយកម្មករណាមិនស្រួលគាត់ចង់ទៅផ្ទះ ក៏ត្រូវអនុញ្ញាតឲ្យគាត់បានទៅផ្ទះដែរ។
ប៉ុន្តែ វិធានការនេះ នៅមិនទាន់មានប្រភពណាមួយបញ្ជាក់អះអាងថា ភាគីរោងចក្របានអនុវត្តន៍បានត្រឹមត្រូវតាមបទបញ្ជានេះ ឬក៏យ៉ាងណានោះទេ៕
ពីវិទ្យុ អាស៊ីសេរី
No comments:
Post a Comment
yes