តំណាងអ្នកភូមិបឹងកក់អ្នកស្រី ទេព វន្នីបានចោទប្រកាន់ចៅសង្កាត់ស្រះចកថា កាលពីថ្ងៃព្រហស្បតិ៍ ម្សិលមិញ ចៅសង្កាត់ស្រះចក លោក ឆាយ ធីរិទ្ធ បានគម្រាមចាប់ខ្លួនពួកគាត់ដាក់គុកនិងបានចាប់ខ្លួនពលរដ្ឋបឹងកក់ចំនួន៣នាក់ឃុំពេញមួយថ្ងៃនៅប៉ុស្ដិ៍នគរបាល សង្កាត់ស្រះចក ខណៈពេលដែលពួកគាត់ព្យាយាមផ្ដិតយកសេចក្ដីប្រកាសជូនដំណឹងរបស់អាជ្ញាធរ សង្កាត់ដែលបានបិទជាសាធារណៈនៅការិយាល័យដើម្បីជូនដំណឹងដល់ប្រជាពលរដ្ឋបឹងកក់ដែលបានបង្ហាញពីព្រំប្រទល់ដី ដែលពលរដ្ឋបឹងកក់ទទួលបានតាមអនុក្រឹត្យរបស់រាជរដ្ឋាភិបាលទំហំ១២,៤៤ហិកតា ធ្វើការអភិវឌ្ឍន៍នៅនិងកន្លែងដោយខ្លួនឯងនោះ ។
អ្នកស្រីទេព វន្នី បានឲ្យដឹងទៀតថា ក្នុងខណៈនោះដែរក៏មានអធិការនគរបាលខណ្ឌដូនពេញលោក ហ៊ុន សុធី បានស្ទុះមកធាក់ស្ដ្រីម្នាក់ដែលទើបនឹងសម្រាលកូនរួចបណ្ដាលឲ្យរងរបួសផងដែរ ។ ករណីនេះអ្នកស្រី ទេព វន្នី បានអះអាងថាពួកគាត់នឹងដាក់ពាក្យបណ្ដឹងប្ដឹងទៅសាលាដំបូងរាជធានីភ្នំពេញនៅដើមសប្ដាហ៍ក្រោយនេះដើម្បីឲ្យជួយរកយុត្ដិធម៌ជូនពួកគាត់ ។
ស្ដ្រីឈ្មោះ ឆេង លាភដែលបានអះអាងថា រូបគាត់ត្រូវបានរូបលោក ហ៊ុន សុធី អធិការប៉ូលិសខណ្ឌដូនពេញបានវាយឲ្យរងរបួសនោះបានបន្ដឲ្យដឹងថា ក្នុងពេលនោះរូបគាត់កំពុងកើតមានអាការៈឈឺចុកចាប់ស្ពឹករោយនៅលើដងខ្លួនហើយក៏ មិនទាន់បានចេញទៅប្រកបរបរចិញ្ចឹមជីវិត បានដូចធម្មតានៅឡើយទេ ។
ជាមួយគ្នានេះដែរវរជនខ្មែរមិនអាចធ្វើការទំនាក់ទំនងសុំការឆ្លើយតបជុំវិញករណីចោទប្រកាន់ខាងលើនេះពីលោកចៅសង្កាត់ស្រះចក ឆាយ ធីរិទ្ធ និងលោកអធិការប៉ូលិសខណ្ឌដូនពេញ ហ៊ុន សុធី បានទេនៅថ្ងៃនេះ ៕
ពីគេហទំព័រ៖ វរជនខ្មែរ
No comments:
Post a Comment
yes