សិស្សានុសិស្ស និស្សិត ក្រុមកាយឫទ្ធិ មន្ត្រីរាជការ កងរាជអាវុធហត្ថ និងមន្ត្រីតំណាងទូតបរទេសនានានៅកម្ពុជា សរុបចំនួនជាង ៥ពាន់នាក់ បានមកចូលរួមប្រារព្ធបុណ្យខួបឯករាជ្យជាតិកម្ពុជា លើកទី៥៨ នៅព្រឹកថ្ងៃទី៩ ខែវិច្ឆិកា ឆ្នាំ២០១១។
ព្រះមហាក្សត្រ ព្រះបាទបរមនាថ នរោត្តម សីហមុនី នៅថ្ងៃទី៩ ខែវិច្ឆិកា ឆ្នាំ២០១១ បានយាងជាអធិបតីដុតទៀនជ័យ នៅឯវិមានឯករាជ្យ ដើម្បីប្រារព្ធខួបលើកទី៥៨ នៃបុណ្យឯករាជ្យជាតិ។
លោកនាយករដ្ឋមន្ត្រី ហ៊ុន សែន និងប្រធានសភាជាតិ លោក ហេង សំរិន បានធ្វើបដិសណ្ឋាកិច្ចព្រះមហាក្សត្រនៅឯវិមានឯករាជ្យ។
គេមិនបានឃើញមានវត្តមានរបស់អតីតព្រះមហាក្សត្រ ព្រះបាទ នរោត្តម សីហនុ និងព្រះរាជអគ្គមហេសី នរោត្តម មុនីនាថ សីហនុ និងប្រធានព្រឹទ្ធសភា លោក ជា ស៊ីម យាងនឹងមកចូលរួមទេ។
លោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់ រដ្ឋាភិបាលដទៃទៀត មិនបានធ្វើអត្ថាធិប្បាយណាមួយជុំវិញថ្ងៃបុណ្យឯករាជ្យជាតិនេះទេ។ មានការស្រែកជយឃោស ការច្រៀងចម្រៀងស្នេហាជាតិ និងការប្រគំភ្លេងរបស់អង្គភាពត្រែទ័ព។
មន្ត្រីរាជការឈ្មោះ ឃឹម ចិន្តា ៣៩ឆ្នាំ មកពីក្រសួងអភិវឌ្ឍន៍ជនបទបានមានប្រសាសន៍ថា ប្រជាពលរដ្ឋមានអារម្មណ៍កក់ក្ដៅជាងឆ្នាំមុនៗ ដោយសារតែនៅឆ្នាំនេះអតីតព្រះមហាក្សត្រ និងព្រះមហាក្សត្រ គង់នៅក្នុងប្រទេសជុំគ្នា៖ «សប្បាយរីករាយណាស់ដែលបានចូលរួមខួបអបអរសាទរខួបលើកទី៥៨ បុណ្យទិវាឯករាជ្យជាតិ»។
គ្រូបង្រៀននៅសាលាសមាគមចិន នៅទីក្រុងភ្នំពេញ លោក ទិត វណ្ណឈីន អាយុ ៤១ឆ្នាំ ដែលបានដឹកនាំក្រុមសិស្សចំនួន ៥០០នាក់ មកចូលរួមក្នុងពិធីនេះបានមានប្រសាសន៍ថា រូបលោក និងសិស្សសាលាដទៃទៀតមានការរីករាយ៖ «ថ្ងៃនេះមានឱកាសបានចូលរួមខួបលើកទី (៥៨) បុណ្យឯករាជ្យនេះ គឺខ្ញុំទាំងគ្រូ ទាំងសិស្ស គឺមានភាពសប្បាយរីករាយខ្លាំងណាស់ ដែលមានឱកាសចូលក្នុងពិធីនេះ»។
អតីតព្រះមហាក្សត្រ ព្រះបាទ នរោត្ត សីហនុ បានទាមទារទទួលបានឯករាជ្យជាតិពីអាណានិគមនិយមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣។
ក្រៅពីការប្រារព្ធបុណ្យឯករាជ្យជាតិនេះ គណៈកម្មាធិការរៀបចំបុណ្យជាតិបានរៀបចំរួចហើយនៅខែតុលា និងខែវិច្ឆិកា ឆ្នាំ២០១១ នូវបុណ្យចម្រើនព្រះជន្មអតីតព្រះមហាក្សត្រ គម្រប់ព្រះជន្ម ៨៩ យាងចូល ៩០ព្រះវស្សា និងខួបលើកទី២០ ដែលអតីតព្រះមហាក្សត្រ បានយាងចូលប្រទេសកម្ពុជាវិញ ក្រោយពីភាគីជម្លោះខ្មែរនានា បានចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស (Paris) ថ្ងៃទី២៣ ខែតុលា ឆ្នាំ១៩៩១៕
ពីវិទ្យុ អាស៊ីសេរី
No comments:
Post a Comment
yes