ឯកសារប្រវត្តិសង្ខេបស្តីពីសិទិ្ធមនុស្ស
តើសិទ្ធិមនុស្សមានប្រភពមកពីណាខ្លះ ?
តាមការពិតសិទ្ធិមនុស្សបានកើតឡើងតាំងពីយូរយាណាស់មកហើយ គឺមានប្រភពមកពីទស្សនៈខាងសាសនា និងខាងទស្សនៈវិជ្ជា ។
ទស្សនៈសាសនា
នៅក្នុងពិភពលោកយើងនេះមានសាសនាច្រើនណាស់ ដោយឡែកនៅក្នុងទ្វីបអាស៊ីអាគ្នេយ៍យើងនេះមានសាសនាជាច្រើន ដូចជា សាសនាគ្រឹស្ត សាសនាអ៊ីស្លាម សាសនាហិណ្ឌូ សាសនាយូដា សាសនាកុងជឺ ពុទ្ធសាសនាជាដើម ។ អត្ថន័យនៃគោលការណ៍អប់រំសាសនាទាំងអស់នេះមានដូចជាៈ
§ ព្រះធម៌នៃព្រះពុទ្ធសាសនា បានចែងថា “បាណាតិបាតា” មិនសំលាប់សត្វ មានន័យថាមនុស្សលោកគ្រប់រូបមានជីវិតរស់នៅ” ។
§ ទ្រឹស្តីនៃគ្រឹស្តសាសនា ចែងថា “ មនុស្សលោកត្រូវចេះស្រឡាញ់គ្នាទៅវិញទៅមកដូចជាម្ចាស់ស្រឡាញ់អ្នកដូចព្រះជាម្ចាស់ ” “មនុស្សទាំងអស់ ត្រូវស្រឡាញ់គ្នាដូចជាខ្ញុំម្ចាស់ស្រឡាញ់អ្នករាល់គ្នា ហើយត្រូវមានចិត្តសប្បុរស និងមេត្តាធម៌រវាងគ្នា” ។
§ សាសនាអ៊ីស្លាម មហាម៉ាត់ទូន្មានថា មនុស្សត្រូវចេះគោរពគ្នា ត្រូវចេះស្រឡាញ់គ្នានិងត្រូវមានភាពស្មើគ្នា ដូចជាព្រះបានចែងថា “មនុស្សទាំងអស់ មានភាពស្មើគ្នាប្រៀបដូចទៅនិងធ្មេញនៃក្រាស់សិតសក់” ។
§ សាសនាកុងជឺ បានទូន្មានថា “ កុំធ្វើអី្វទៅលើអ្នកដ៏ទៃនូវអ្វីដែលអ្នកមិនចង់ឲ្យគេធ្វើចំពោះខ្លួនឯង “ បានសេចក្តីថាមនុស្សយើងត្រូវធ្វើអ្វីប្រព្រឹត្តនូវសកម្មភាពអ្វីក៏ដោយ ត្រូវជៀសវាងកុំឲ្យមានការប៉ះពាល់ដល់តម្លៃនិងសេចក្តីថ្លៃថ្នូរជាពិសេសត្រូវគិតដល់ផលប្រយោជន៍អ្នកដ៏ទៃ ។
§ សាសនាហិណ្ឌូ ទូន្មានថា “ មនុស្សលោកគប្បីប្រព្រឹត្តនិងអំពើទាំងឡាយណាដែលជាកុសល និងប្រកបដោយសីលធម៌ល្អប្រសើរ “ ។
គោលការណ៍អប់រំនៃសាសនាទាំងអស់នេះគឺ បានបង្ហាញអោយឃើញថាមានគោលបំណងប្រហាក់ប្រហែលគ្នាគឺ “ គោរពជីវិត ត្រូវមានសេចក្តីស្រឡាញ់ភក្តីភាពមានយុតិ្តធម៌ មានសមភាពនិងគ្មានការរើសអើង “ ។
ទស្សនៈនៃទស្សនៈវិជ្ជា
v ប្រវត្តិសាស្ត្រនៃសិទ្ធិមនុស្ស
នៅសតវត្សទី១៧ និង ១៨ ទស្សនៈវិទូសេរីនៅក្នុងពិភពលោកបានចាប់ផ្តើមគិតគូអំពី បញ្ហានៃពិភពលោកនិងចាប់ផ្តើមរិះរកមធ្យោបាយសមស្រប ដើម្បីដោះស្រាយបញ្ហាពិភពលោក ។ នៅសតវត្សទី១៧ ទស្សនៈវិទូឈ្មោះ ចន ឡុក (John Locke) ដែលជាទស្សនៈវិទូអង់គ្លេស ត្រូវបានគេទទួលស្គាល់ថាជាមាតានៃសិទ្ធិធម្មជាតិព្រោះលោក ចន ឡុក (John Locke) បាន លើកឡើងនូវសិទ្ធិជាមូលដ្ឋានរបស់មនុស្សសំខាន់ៗបីគឺ ទី១ សិទ្ធិមានជីវិតរស់នៅ ទី២ សិទ្ធិមានសមត្ថភាព និងទី៣ សិទ្ធិមានទ្រព្យសម្បត្តិ ។ មានទស្សនៈវិទូម្នាក់ទៀត ឈ្មោះ ត្រូត្យូស (Grotius) ជាជនជាតិដាច់ (Dutch) នៅសតវត្សទី ១៥ ក៏បានលើកឡើងនូវទស្សនៈដូច ទស្សនៈ របស់លោក ចន ឡុក (Locke) ដែរ ។ ដោយសារ តែមានគំនិតផ្តួចផ្តើមនៃទស្សនៈ វិទូសេរីទាំងនេះ ហើយទើបជំរុញអោយមានចលនាបដិវត្តនៃទី្វបអឺរ៉ុបផ្ទុះឡើងជាបន្តបន្ទាប់ ដូចជាៈ
§ នៅដើមសវត្សទី ១៨ បដិវត្តអាមេរិកកាំងបានផ្ទុះឡើង បដិវត្តនេះមានសារៈសំខាន់ណាស់ព្រោះបានបង្ហាញនូវចលនាតស៊ូរបស់ប្រជាពលរដ្ឋដើម្បីទាមទារឯករាជ្យ សេរីភាពនិងសមភាព ។ ចលនានៃបដិវត្តនេះ ត្រូវបានទទួលជោគជ័យដោយរដ្ឋធម្មនុញ្ញអាមេរិកកាំងថ្មីមួយត្រូវបានគេបង្កើតឡើងស្របទៅតាមសំណូមពរប្រជាពលរដ្ឋ ។ ជោគជ័យនៃបដិវត្តនេះគឺជាពន្លឺនៃមូលដ្ឋានសិទ្ធិមនុស្ស ដែលបានកើតឡើងនៅទី្វបអឺរ៉ុប ។
§ ក្រោយមកនៅឆ្នាំ ១៧៨៩ មានចលនាបដិវត្តប្រទេសបារាំងដ៏ខ្លាំងក្លាមួយកើតឡើង ។ ចលនាបដិវត្តនេះបង្កើតឡើងដោយវណ្ណៈកណ្តាលនៃប្រជាជនបារាំង ក្នុងគោលបំណងលុបបំបាត់ចោលនូវវណ្ណៈអភិជន ។ បន្ទាប់មកដោយសារចលនានៃបដិវត្តនេះបានសំរេចជោគជ័យដូចគ្នានិងចលនាបដិវត្តអាមេរិកកាំងនោះរដ្ឋធម្មនុញ្ញថ្មីរបស់ប្រទេសបារាំងក៏បានកើតឡើងដែរ ។ រដ្ឋធម្មនុញ្ញនេះបានចែងទាក់ទងទៅនិងសិទ្ធិមនុស្ស សិទ្ធិពលរដ្ឋ និងសិទ្ធិនយោបាយ ។
§ នៅសតវត្សទី ១៩ មានទស្សនៈវិទូពីរូបទៀតគឺលោក ម៉ាក្ស (Mark) និងលោក អង់ ហ្គើល “Engles” ជាទស្សនៈវិទូអង់គ្លេសបានបញ្ជាក់បន្ថែមទៅលើសិទ្ធិសេរីភាព និងសមភាពរបស់មនុស្សគ្រប់រូបជាពិសេសទាក់ទងទៅនិង សិទ្ធិសេដ្ឋកិច្ចនិងសិទ្ធិសង្គម ។ គំនិតផ្តួចផ្តើមនៃទស្សនៈវិទូទាំងពីរនេះគឺការផ្តល់កំណើត អោយបដិវត្តឧស្សាហកម្ម ដែលកើតឡើង ដោយសារមានការគាំទ្រយ៉ាងពេញទំហឹងពីសំណាក់កម្មករ ដើម្បីទាមទារនូវសិទ្ធិសេរីភាពនិងសមភាពរបស់ពួកគេនៅក្នុងសង្គម ។
និយាយជារួមមក ការលើកឡើងនូវគំនិត និងទស្សនៈខាងលើ ដោយសារតែការមើលឃើញនូវមនុស្សនៅសកលលោកយើងនេះ បានប្រឈមទៅនិងបញ្ហាជាច្រើន បញ្ហាទាំងនោះ ទាក់ទងទៅនិងការគំរាមគំហែងមកលើអ្នកទន់ខ្សោយ ការឈ្លានពាន ការកាប់សម្លាប់មនុស្ស ក្រៅច្បាប់ឥតគណនា ការចាប់រំលោភបំពានពីសំណាក់ប្រទេសធំៗមកលើប្រទេសតូចតាចពី អ្នកមានអំណាចយ៉ាងឃោឃៅនិងព្រៃផ្សាយជាទីបំផុត ។
នៅថ្ងៃទី១០ ធ្នូ ឆ្នាំ១៩៤៨ គំនិត និងទស្សនៈទាំងឡាយរបស់ទស្សៈវិទូទាំងនោះ ក៏បានចងក្រងទៅជាច្បាប់ ជាមាត្រា ហើយបានប្រកាសជាផ្លូវការ និងចាប់ផ្តើមធ្វើការផ្សាយយ៉ាងទូលំទូលាយនូវសេចក្តីថ្លែងការជាសកលមានចំនូន៣០មាត្រាដែលមានខ្លឹមសារសង្ខេបខ្លះៗដូចតទៅនេះ...
តម្លៃសង្គមនិងតម្លៃសីលធម៌នៃសិទ្ធិមនុស្ស
១. តម្លៃសង្គមនិងតម្លៃសីលធម៌នៃសិទ្ធិមនុស្សចំពោះជីវិត
ចំពោះតម្លៃសង្គម និងតម្លៃសីលធម៌នៃសិទ្ធិមនុស្សចំពោះជីវិត បានលើកយកមកអះអាងតាមរយៈគោលការណ៍សាសនា និងតាមគោលការណ៍ទស្សនៈវិជ្ជា ដែលបានទទួលស្គាល់ជាទូទៅចំពោះសេចក្តីថ្លៃថ្នូរ និងតម្លៃជាប់ពីកំណើតរបស់មនុស្សដូចទ្រឹស្តីនៃព្រះពុទ្ធសាសនាបានចែងថា មនុស្សកើតមកមិនបាននាំយកអ្វីមកជាមួយក្រៅអំពី តម្លៃនៃសេចក្តីថ្លៃថ្នូរ ហើយពេលស្លាប់ទៅវិញ ក៏មិនបាននាំយកអ្វីទៅក្រៅពីតម្លៃនិងសេចក្តីថ្លៃថ្នូរដែរ។ ម្យ៉ាងទៀតបុគ្គលម្នាក់ៗត្រូវបានគេទទួលស្គាល់នូវសិទ្ធិស្មើភាពគ្នារបស់មនុស្សនៅក្នុងសង្គមមនុស្ស ។
ដូច្នេះមនុស្សមានសិទ្ធិរស់រានមានជីវិត មានសេរីភាពនិងសន្តិសុខផ្លាស់ប្តូរ ដូចដែលរដ្ឋធម្មនុញ្ញនៃអង្គការសហប្រជាជាតិ បានប្រកាសនូវសិទ្ធិជាមូលដ្ឋានរបស់មនុស្សដោយផ្អែកលើតម្លៃនិងសេចក្តីថ្លៃថ្នូរដើម្បីឲ្យមានសេរីភាពនិងសមភាពនៅក្នុងសង្គមនិងហាមប្រាមមិនឲ្យមានការបែងចែកមនុស្សដោយសំអាងលើបញ្ហាឬ ប្រការណាមួយដូចជា ជាតិសាសន៍ ពណ៌សប្បុរ ភេទ ភាសា សាសនា វណ្ណៈដើមធនធាន លើសពីនេះទៀតមិនត្រូវការបែងចែកដោយ សំអាងលើទស្សនៈនយោបាយផ្អែកលើច្បាប់ឬឋានៈអន្តរជាតិនៃប្រទេសឡើយ ។
២. តម្លៃសង្គមនិងតម្លៃសីលធម៌នៃសិទ្ធិមនុស្សចំពោះសេរីភាព
យោងតាមបុព្វកថានៃសេចក្តីប្រកាសជាសាកល ស្តីពីសិទ្ធិមនុស្សចែងថាប្រជាពលរដ្ឋនៃពិភពលោកបានប្រកាសបេ្តជ្ញាថា និងជួយបង្កលក្ខណៈអំណោយផលដល់កិច្ចអភិវឌ្ឍន៍សង្គមព្រមទាំងបង្កើតឲ្យមានលក្ខណៈគាប់ប្រសើរក្នុងការរស់នៅក្នុងសេរីភាពមួយទូលាយ ។ ចំណុចសំខាន់មួយទៀតគឺការទទួលស្គាល់និងយល់ដឹងពីសិទ្ធិមនុស្ស និងសេរីភាពទាំងអស់របស់មនុស្សជាតិ ព្រោះថាមនុស្សរស់នៅក្នុងសង្គមត្រូវការចាំបាច់នូវសេរីភាព សមភាព ការអភិវឌ្ឍន៍ សមត្ថភាពនិងទេពកោសល្យរបស់ខ្លួននៅក្នុងសង្គម ។ ប៉ុន្តែសេរីភាពរបស់មនុស្ស ត្រូវស្ថិតនៅក្រោមការកំណត់នៃច្បាប់ ព្រោះវាជាផលប្រយោជន៍សំរាប់ឲ្យមនុស្សទទួលស្គាល់និងគោរពសិទ្ធិសេរីភាព របស់អ្នកដ៏ទៃ ជាពិសេសដើម្បីទាមទារឲ្យមានសិទ្ធិសីលធម៌នៅក្នុងការរៀបចំឲ្យមានរបៀបរៀបរយសាធារណៈ និងសុខមាលភាពទទូទៅនៅក្នុងសង្គម ។ ដូច្នេះនៅក្នុងករណីណាក៏ដោយ ក៏សិទ្ធិនិងសេរីភាពនេះមិនត្រូវយកទៅប្រើប្រាស់ផ្ទុយនិងគោលបំណងនិងគោលដៅរបស់ច្បាប់ដែរជាពិសេសផ្ទុយនិងច្បាប់អន្តរជាតិ ។
៣. តម្លៃសង្គមនិងតម្លៃសីលធម៌នៃសិទ្ធិមនុស្សចំពោះសមភាពនិងគ្មានការរើសអើង
ផ្អែកទៅលើការទទួលស្គាល់និងការគោរពតម្លៃនិងសេចក្តីថ្លៃថ្នូររបស់មនុស្ស គោលការណ៍សមភាពនៃសិទ្ធិនិងសេរីភាពរបស់មនុស្ស គឺមិនត្រូវធ្វើការបែងចែកដោយសំអាងលើប្រការណាមួយឡើយដូចជាជាតិសាសន៍ ពណ៌ សប្បុរ ភេទ សាសនា ភាសា ធនធាន សញ្ជាតិ ឬវណ្ណៈដើមនិងមិនត្រូវបែងចែកដោយផ្អែកលើ ឋានៈនយោបាយ ឬឋានៈអន្តរជាតិនៃប្រទេស ឬស្ថានភាពសេដ្ឋកិច្ច និងសង្គមនៃប្រទេសឡើយ ។
គោលនៃការរើសអើង គឺផ្តោតទៅលើគោលការណ៍នៃសមភាព ដែលទាមទារឲ្យមានការទទួលស្គាល់និងមានការគោរពជាសាកលនូវសិទ្ធិជាមូលដ្ឋាន និងសេរីភាពរបស់មនុស្សទូទៅដោយគ្មានការបែងចែកដោយផ្អែកលើមូលដ្ឋាន ជាតិ សាសន៍ ពណ៌សប្បុរ ភេទ សាសនា ភាសា ធនធាន សញ្ជាតិ ឬវណ្ណៈជាដើម និងមិនត្រូវបែងចែកដោយ ផ្អែកលើឋានៈនយោបាយ......។
៤. តម្លៃសង្គមនិងតម្លៃសីលធម៌នៃសិទ្ធិមនុស្សចំពោះយុត្តិធម៌
សំដៅលើបញ្ហាច្បាប់ បញ្ហាតុលាការ បញ្ហាសង្គម បញ្ហាសេដ្ឋកិច្ច បញ្ហានយោបាយ និងបញ្ហាដ៏ទៃទៀតដែលជាមូលដ្ឋាន បញ្ហារបស់សង្គមដោយផ្តោតទៅលើសិទ្ធិ តម្លៃនិងសេចក្តីថ្លៃថ្នូររបស់សមាជិក ឬប្រជាជនដែលស្ថិតនៅក្រោមការគ្រប់គ្រងរបស់ខ្លួន ។
៥. តម្លៃសង្គមនិងតម្លៃសីលធម៌នៃសិទ្ធិមនុស្សចំពោះឯកភាពនិងសាមគ្គីភាព
ជាមធ្យោបាយមួយក្នុងចំណោមមធ្យោបាយនានា ដែលមិនគ្រាន់តែផ្តោតលើការយល់ដឹងនិងយកចិត្តទុកដាក់ចំពោះការឈឺចាប់របស់អ្នកដ៏ទៃប៉ុណ្ណោះទេ តែក៏ត្រូវបញ្ជាក់និងត្រូវប្រកាសយកនូវជំហរមួយចំពោះអ្នកដែលទទួលរងនូវការឈឺចាប់ និងការរំលោភទៅលើពួកគេ ។ ឧទាហរណ៍ ដូចជាការបដិសេធមិនទទួលស្គាល់នូវសិទ្ធិពលរដ្ឋ និងសិទ្ធិនយោបាយ ។ ការកាត់ផ្តាច់នូវបញ្ហាសេដ្ឋកិច្ច ការបញ្ចេញមតិយោបល់នៅក្នុងសង្គម និងការបំបិទសិទ្ធិសេរីភាពនៃជំនឿសាសនា និងជំនឿនយោបាយ ។
៦. តម្លៃសង្គមនិងតម្លៃសីលធម៌នៃសិទ្ធិមនុស្សចំពោះការទទួលខុសត្រូវរបស់សង្គម
ជាមធ្យោបាយដែលរដ្ឋជាសមាជិកនៃអង្គការសហប្រជាជាតិត្រូវចាត់វិធានការ ដើម្បីធានាជួយដល់ប្រជាពលរដ្ឋរបស់ខ្លួនអោយរស់នៅមានសេរីភាព មានសមភាពនៅក្នុងសង្គមក្រោមការគ្រប់គ្រងរបស់ខ្លួន ។
៧. តម្លៃសង្គមនិងតម្លៃសីលធម៌នៃសិទ្ធិមនុស្សចំពោះសន្តិភាពនិងគ្មានការរំលោភបំពាន
គឺសំដៅទៅលើភាពស្រុះស្រួលរវាងខ្លួនឯងជាមួយអ្នកដ៏ទៃ និងជាមួយនិងបរិស្ថានទូទៅ មានន័យថាការរស់នៅក្នុងសង្គមមួយពោរពេញដោយសន្តិភាព សមភាព សេរីភាពនិងគ្មានការរំលោភបំពាន ដែលជាគោលបំណងដ៏ពិសិដ្ឋនិងជាសេចក្តីសុខចំរើនរបស់មនុស្សជាតិទូទៅ និងជាផលប្រយោជន៍របស់បុគ្គល សហគមន៍និងរបស់រដ្ឋទាំងឡាយដែលសំដៅបំរើឲ្យមានការ អភិវឌ្ឍន៍ដើម្បីឈានទៅដល់សង្គមមួយ ពោរពេញដោយសន្តិភាពនិងឯករាជ្យពិសេសដើម្បីប្រជាជនរស់នៅក្នុងភាពស្រុះស្រួលគ្នាក្នុងបរិបទសង្គមតែមួយ ។
៨. តម្លៃសង្គមនិងតម្លៃសីលធម៌នៃសិទ្ធិមនុស្សចំពោះបរិស្ថាន
ដូចបានរៀបរាប់ខាងលើរួចមកហើយ ប្រសិនបើសង្គមមនុស្ស មួយដែលមានការគោរពជីវិត មានសេរីភាព គ្រប់គ្រាន់ មានសមភាព និងគ្មានការរើសអើង មានយុត្តិធម៌ មានសាមគ្គីភាព មានការទទួលខុសត្រូវពីសង្គមមានសន្តិភាពនិងគ្មានការរំលោភបំពានមានន័យថា ជាសង្គមដែលពោរពេញទៅដោយការអភិវឌ្ឍន៍និងមានការរីកចំរើន ជាពិសេសនិងឈានដល់សង្គមដែលមានវឌ្ឍនៈភាពពេញលេញ ។ ដូចច្នេះសង្គមមួយដែលមានវឌ្ឍនៈភាពពេញលេញ ជាសង្គមដែលមានការគោរពការពារ និងលើកស្ទួយសិទ្ធិរបស់បុគ្គល សិទ្ធិរបស់សហគមន៍ និងសិទ្ធិនៃក្រុមមនុស្សទូទៅហើយ និងឈានទៅដល់ការគោរពនិងការពារ បរិស្ថានដែលមានជីវិតនិងរុក្ខជាតិ ពោលគឺ ធនធានក្នុងដី លើដី និងក្នុងអាកាស.......។
ការផ្សព្វផ្សាយសេចក្តីប្រកាសជាសកលនោះ បានបញ្រ្ជាបពាសពេញពិភពលោក ហើយ ក្រុមទន់ខ្សោយក៏បានថយចុះនូវការឈឺចាប់ខ្លះដែរ ។ ទោះជាយ៉ាងនោះក៏ដោយ បងប្អូនខ្មែរ ដែលរស់នៅលើទឹកដីកំណើតរបស់ខ្លួននៅឯកម្ពុជាក្រោម ពុំទាន់ទទួលបាននូវអ្វីទៅហៅថា “សិទ្ធិមនុស្ស” នៅឡើយទេ គឺពួកគាត់កំពុងរស់នៅយ៉ាងលំបាកក្រោមការគ្រប់គ្រងធ្វើអាណានិ គមពីរដ្ឋាភិបាលវៀតណាម ពីព្រោះប្រទេសវៀតណាម ជាប្រទេសប្រកាន់នៅរបបកុម្មុយនិស្ត គ្មានសិទ្ធិមនុស្ស ម្លោះហើយខ្មែរកម្ពុជាក្រោមតែងតែរងនូវការឈឺចាប់ខ្លោចផ្សារ បាត់បង់សិទ្ធិ សេរីភាព និងសិទ្ធិជាមូលដ្ឋានផ្សេងៗទៀតជាដើម ។ រហូតមកដល់ពេលនេះ ប្រជាពលរដ្ឋខ្មែរក្រោមនៅតែប្រឈមទៅនិងបញ្ហានៃការរំលោភសិទ្ធិមនុស្ស ដែលបញ្ហាទាំងនោះមានដូចខាង ក្រោមនេះ
- រដ្ឋាភិបាលវៀតណាម បានចាត់ទុកខ្មែរក្រោម គឺជាជនជាតិភាគតិច ដែលជាការពិតខ្មែរក្រោមជាជនជាតិដើម ហើយមានកំណើតកើតនៅលើទឹករបស់ខ្លួន។
- រដ្ឋាភិបាលវៀតណាមបានរិតបន្តឹងអំពីវិស័យការសិក្សាអប់រំ ដូចជាហាមមិនឱ្យសិក្សាភូមិសាស្រ្ត និងប្រវត្តិសាស្រ្តខ្មែរកម្ពុជាក្រោមជាដើម។
- ការបំបិទសិទ្ធិសេរីភាពនៃការគោរពជំនឿសាសនា ប្រពៃណី ទំនៀមទំលាប់ របស់ខ្មែរក្រោម ។
- មិនឱ្យព្រះសង្ឃព្រះពុទ្ធសាសនាខ្មែរក្រោមមានសិទ្ធិបង្កើតស្ថាប័នឯករាជ្យមួយដាច់ដោយឡែកដូចមុនថ្ងៃ៣០ ខែមេសា ឆ្នាំ១៩៧៥ ។
- ខ្មែរក្រោមមិនមានសិទិ្ធក្នុងការបង្កើតអង្គការសមាគមឯករាជ្យដែលមិនឋិតនៅក្រោមការ គ្រប់គ្រងពីសំណាក់រដ្ឋាភិបាលវៀតណាម។
- រដ្ឋាភិបាលវៀតណាមបានបំបិទសិទិ្ធសេរីភាពនៃការសម្តែងមតិ សិទ្ធិទទួលបានពត៌មាន និងសិទ្ធិផ្សព្វផ្សាយពត៌មាន ។
- ការរើសអើងប្រកាន់ពូជសាសន៍ និងការរំលោភមកលើសិទ្ធិស្រ្តី និងសិទ្ធិកុមារ។
- ការលាបពណ៌ដើម្បីចោទប្រកាន់ដាក់ទោសមកលើព្រះសង្ឃ និងប្រជាពលរដ្ឋខ្មែរក្រោម។
- ការរឹបអូសយកដីស្រែចំការ និងការហ៊ុមព័ទ្ធសេដ្ឋកិច្ចមកលើខ្មែរក្រោម ។
- ការរារាំង និងការតាមដានរាល់ការទំនាក់ទំនងរវាងខ្មែរនៅកម្ពុជាក្រោម និងខ្មែរនៅព្រះរា ជាណាចក្រកម្ពុជា ។
- ការគំរាមគំហែងបំភិតបំភ័យបំបាក់ស្មារតីប្រជាពលរដ្ឋខ្មែរក្រោម។
ដើម្បីបង្ហាញពីតម្លាភាពនៃសិទ្ធិមនុស្ស បងប្អូនខ្មែរនៅកម្ពុជាក្រោម មិនទាន់បានស្គាល់ នូវអ្វីដែលហៅថាសិទិ្ធមនុស្សយ៉ាងពិតប្រាកដនៅឡើយ ។ ៦៣ឆ្នាំកន្លងផុតទៅហើយ ដែលបញ្ហារបស់ខ្មែរក្រោមនៅតែមិនទាន់មើលឃើញច្បាស់ពីសំណាក់អង្គការអន្តរជាតិ អង្គការសហប្រជាជាតិ ហើយថាតើថ្ងៃណាទៅដែលស្ថាប័នទាំងនោះងាកមកជួយដល់ប្រជាពលរដ្ឋខ្មែរក្រោម? ប្រសិនអង្គការសហប្រជាជាតិ អង្គការសិទិ្ធមនុស្សជាតិ និងអន្តរជាតិមិនបានយកចិត្តទុកដាក់មកលើខ្មែរក្រោមទេ ហើយពាក្យថា សិទ្ធិមនុស្ស ក៏ពុំទាន់មានន័យគ្រប់គ្រាន់នៅឡើយដែរ ។ ដើម្បីឱ្យសិទ្ធិបានជ្រូតជ្រាប និងទូលំទូលាយ ហើយមានតម្លាភាពយ៉ាងពិតប្រាកដនោះ អង្គការសហប្រជាជាតិគួរតែងាកមករកប្រទេសទាំងឡាយ ដែលទន់ខ្សោយងាយរងនៅអំពើជិះជាន់មកលើក្រុមជនជាតិដើមភាគតិច ដូចជាបងប្អូនប្រជាពលរដ្ឋខ្មែរក្រោម នៅឯកម្ពុជាក្រោមជាដើម ជួយដល់ពួកគាត់ឱ្យមានសិទ្ធិសេរីភាព បានទទូលសិទ្ធិពេញលេញដូចមនុស្សជាតិទាំងឡាយនៅលើសកលលោក ។
តាមរយៈឯកសាររបស់សមាគមខ្មែរកម្ពុជាក្រោម ដើម្បីសិទិ្ធមនុស្ស និងអភិវឌ្ឍន៍ យើងខ្ញុំជាប្រជាពលរដ្ឋខ្មែរក្រោម សូមអំពាវនាវដល់អង្គការសិទិ្ធមនុស្សជាតិ អន្តរជាតិ ជាពិសេសអង្គការសហប្រជាជាតិទទួលបន្ទុកសិទិ្ធមនុស្ស សូមមេត្តាជួយយកចិត្តទុកដាក់ និងការពារខ្មែរក្រោមចាប់ពីពេលនេះតទៅតាមរូបភាពណាដែលអាចធ្វើទៅបាន ។
No comments:
Post a Comment
yes