លោក សុន ឆ័យ កោះហៅលោក ហ៊ុន សែន ឲ្យចូលមកបំភ្លឺផ្ទាល់មាត់នៅក្នុងរដ្ឋសភាជុំវិញរឿងបោះបង្គោលព្រំដែនខ្មែរ-យួន

ប្រធានក្រុមតំណាងរាស្រ្តរបស់គណបក្ស សម រង្ស៊ី លោក សុន ឆ័យ កាលពីថ្ងៃទី២៦ ខែមិថុនា ឆ្នាំ២០១២ បានដាក់លិខិតមួយច្បាប់ទៅលោក ហ៊ុន សែន នាយករដ្ឋមន្រ្តីខ្មែរដោយបានធ្វើការ ស្នើសុំឲ្យលោក ហ៊ុន សែន មកឆ្លើយបំភ្លឺដោយផ្ទាល់មាត់នៅមន្ទីររដ្ឋសភាលើការបោះបង្គោលព្រំ ដែនរវាងប្រទេសកម្ពុជា និងយួន ។

នៅក្នុងលិខិតរបស់លោក សុន ឆ័យ ដែលដាក់ទៅលោក ហ៊ុន សែន បានបញ្ជាក់ថា ដោយ​ប៉ុន្មានសប្តាហ៏ចុងក្រោយនេះ មានការលិចឮសារជាថ្មីនូវការចោទប្រកាន់ពីការបាត់បង់ទឹកដីនៃ ព្រះរាជាណាចក្រកម្ពុជា តាមរយៈការបោះបង្គោលព្រំដែន ក្រោយពីមានការប្រកាសនៃការ ដោះ ដូរភូមិខ្មែរចំនួនពីរនៅក្នុងស្រុកពញាក្រែក ខេត្តកំពង់ចាម គឺភូមិអន្លង់ជ្រៃ និងភូមិថ្លុកត្រាច និង ការសម្ភោធបង្គោលព្រំដែនកម្ពុជា-យួន លេខ៣១៤ នៅក្នុងខេត្តកំពត និងខេត្តកៀងយ៉ាង របស់ យួន កាលពីថ្ងៃទី២៤ ខែមិថុនា ឆ្នាំ២០១២ កន្លងទៅនេះ ។

នៅក្នុងលិខិតរបស់លោក សុន ឆ័យ ដែលបានដាក់ទៅលោក ហ៊ុន សែន ដើម្បីឲ្យចូលមកឆ្លើយ​បំភ្លឺ នៅរដ្ឋសភានោះគឺមានចំនួន៤ចំណុច ដែលចំណុចទី១គឺដើម្បីឲ្យលោក ហ៊ុន សែន ធ្វើការ បញ្ជាក់ ការធានាបូរណៈភាពទឹកដីនៃព្រះរាជាណាចក្រកម្ពុជា តាមព្រុំដែនកំណត់ក្នុងផែនទីដែល មានចែងក្នុងមាត្រា២ នៃរដ្ឋធម្មនុញ្ញ ឆ្នាំ១៩៩៣ ។ ចំណុចទី២ ដើម្បីឲ្យលោក ហ៊ុន សែន បញ្ជាក់ ពីកិច្ចការងារបច្ចេកទេសក្នុងការវាស់វែងរកចំណុចបង្គោលព្រំដែន ។ ចំណុចទី៣ លោក សុន ឆ័យ បានស្នើឲ្យលោក ហ៊ុន សែន ធ្វើការបញ្ជាក់ពីការបាត់បង់ភូមិរបស់ខ្មែរ តាមបណ្តោយព្រំ ដែន ជាពិសេសភូមិថ្លុកត្រាច និងភូមិអន្លង់ជ្រៃ ស្ថិតនៅក្នុងស្រុកពញាក្រែក ខេត្តកំពង់ចាម ។

រីឯចំណុចទី៤នោះគឺលោក សុន ឆ័យ ចង់ឲ្យលោក ហ៊ុន សែន បង្ហាញថាបង្គោលព្រំដែន​លេខ​៣១៤ និងការធានាបូរណភាពដែនទឹកនៃព្រះរាជាណាចក្រកម្ពុជា ។

ជាមួយគ្នានេះលោក សុន ឆ័យ ក៏បានមានប្រសាសន៏ប្រាប់បន្ថែមផងដែរថា គណបក្ស​សម រង្ស៊ី គឺជាគណបក្សដែលតំណាងឲ្យប្រជាពលរដ្ឋ និងមានការគាំទ្រពីសំណាក់ប្រជាពលរដ្ឋតាមរយៈ ការបោះឆ្នោត ដូចនេះតំណាងរាស្រ្ត គណបក្ស សម រង្ស៊ី ត្រូវមានភារកិច្ច​ការពារនូវផល​ប្រយោ​ជន៏របស់ជាតិ ។ ជាពិសេសដូចជាករណីព្រំដែ​ននេះជាដើម ដែលគណបក្ស សម រង្ស៊ី តែងតែ​ធ្វើ​ការ​យកចិត្តទុកដាក់ ជាទីបំផុតនិងមិនដែលធ្វើការគាំទ្រម្តងណា​ចំពោះការបោះបង្គោលព្រំដែន​រវាងរដ្ឋាភិបាលខ្មែរ ជាមួយនិងរដ្ឋាភិបាលយួននោះឡើយ ។ ដូចជាការបោះបង្គោល​ព្រំដែន​កាល​ពីថ្ងៃទី២៤ ខែមិថុនា ឆ្នាំ២០១២ជាដើម នូវបង្គោលលេខ៣១៤ កំពតនិងកៀងយ៉ាង ។ លោក សុន ឆៃ ថាបង្គោលលេខ៣១៤ នេះគឺមានសារសំខាន់ណាស់ព្រោះជាបង្គោលសម្រាប់​កំណត់​ទៅលើព្រំដែនទឹកផងដែរ ។ លោកថាបញ្ហាព្រំដែននេះ គឺលោកធ្លាប់បានចុះទៅពិនិត្យមើល រួម​ជា​មួយនិងតំណាងរាស្រ្ត របស់គណបក្ស សម រង្ស៊ី ជាច្រើនលើកមកហើយ ទាំងនៅកំពង់ចាម ស្វាយរៀង កំពត និងតាកែវជាដើម ដើម្បីធ្វើការពិនិត្យមើលពីដំណើរការបោះបង្គោលព្រំដែន ដែលធ្វើឡើងដោយអ្នកឯកទេស​ទាំង​ពីរ តែមិនត្រូវបានទទួលស្វាគមន៏ពីសំណាក់មន្រ្តីឯកទេស និងកងកម្លាំងនៃប្រទេសទាំងពីរ​នោះ​ឡើយ គឺគេធ្វើអ្វីតាមដែលគេបានព្រមព្រៀងគ្នារួចជាស្រាច់​នោះ ។ 

លោក សុន ឆ័យ ក៏បានបញ្ជាក់ផងដែរថា នាយករដ្ឋមន្ត្រីខ្មែរតាំងពីឆ្នាំ១៩៩៣ គឺមិនដែលហ៊ាន ចេញមុខមកបកស្រាយចំពោះបញ្ហាព្រំដែននេះនៅចំពោះមុខតំណាងរាស្រ្ត និងប្រជាជាតិនោះ ទេ ដោយលោកបានលើកឡើងថាអ្នកដឹកនាំគឺត្រូវតែហ៊ានចេញមុខមកបកស្រាយចំពោះអ្វីដែល ខ្លួនបានធ្វើ ដើម្បីឲ្យប្រជាជាតិលោកបានយល់ ហើយប្រសិនបើលោក ហ៊ុន សែន មិនធ្វើការ​ឆ្លើយតបឬមិនអញ្ជើញមកមន្ទីររដ្ឋសភាដើម្បីធ្វើការឆ្លើយបំភ្លឺទេនោះ គឺលោក ហ៊ុន សែន បាន​បំពានទៅលើគោលការណ៏របស់រដ្ឋធម្មនុញ្ញ ហើយលោក ហ៊ុន សែន ខ្លួនឯងក៏ធ្លាប់បាន​ប្រកាស​ថា មិនអាចទទួលយកបានទេ ជនណាម្នាក់ដែលបំពានទៅលើរដ្ឋធម្មនុញ្ញ ហើយលោកសង្ឃឹម​ថាអ្វីដែលជាសំណើរស្របតាមគោលការណ៏ច្បាប់របស់គណបក្ស សម រង្ស៊ី ជុំវិញករណីខាង​លើ​នេះលោក ហ៊ុន សែន និងអនុវត្តន៏ គោរពតាមច្បាប់ផងដែរ ។

គួរបញ្ជាក់ថា តាមការអះអាងកន្លងមក បន្ទាត់ព្រំដែនថ្មីមាន​គំលាតពីបន្ទាត់ពីចាស់ ដែល​កន្លែង​ខ្លះមួយរយ​ម៉ែត្រ ខ្លះទៀតរហូតដល់ទៅប្រាំរយម៉ែត្រក៏មាន។ គ្រាន់តែ​នៅ​​ក្នុងស្រុក​មេមត់​មួយ តាមការ​ស្រាវ​ជ្រាវ និងអះអាងពីលោកសុន ឆ័យ ប្រធានក្រុមអ្នកតំណាងរាស្ត្រ​គណបក្ស​សមរង្ស៊ី បានឲ្យ​ដឹង​ថា យ៉ាងហោចណាស់​មានភូមិ​ខ្មែរពី១១ ទៅ១៤ភូមិ ត្រូវបាត់បង់រួច​ជាស្រេច​ក្រោយ​ឆ្នាំ១៩៧៩​រហូតមក។

សូមជំរាបជូនផងដែរថា កាលពីថ្ងៃទី២៦ ខែមិថុនា ឆ្នាំ២០១២ តំណាងរាស្រ្តរបស់គណបក្ស សម ​

រង្ស៊ី ក៏បានចេញសេចក្តីប្រកាសរបស់ខ្លួនដែលស្តីពីការបោះបង្គោលព្រំដែនកម្ពុជា-យួន ដោយ​នៅក្នុងសេចក្តីប្រកាសរបស់ក្រុមអ្នកតំណាងរាស្រ្តរបស់គណបក្ស សម រង្ស៊ី គឺបានធ្វើការប្រ កាស​ជាឱឡារិតថា ការបោះបង្គោលព្រំដែនណា ដែលធ្វើឡើងផ្ទុយពីគោលការណ៏​បូរណភាព​ទឹកដី ដូចមានចែង​ក្នុងមាត្រា២ នៃរដ្ឋធម្មនុញ្ញដែលមានកំណត់ក្នុងផែនទីខ្នាត១/១០០.០០០ ធ្វើ​នៅ ចន្លោះឆ្នាំ១៩៣៣-១៩៥៣ ហើយដែលត្រូវបានទទួលស្គាល់ជាអន្តរជាតិនៅឆ្នាំ១៩៦៣-១៩៦៩ គឺជា « អំពើក្បត់និងផលប្រយោជន៏ជាតិ » ។

នៅក្នុងសេចក្តីប្រកាសរបស់ក្រុមអ្នកតំណាងរាស្រ្តរបស់គណបក្ស សម រង្ស៊ី ក៏បានបញ្ជាក់ផង ដែរថា ការបាត់បង់ទឹកដី និងភូមិករខ្មែរទាំងឡាយណា ដែលកើតឡើងពីការបោះបង្គោលព្រំដែន តាមសេចក្តីសម្រេចរបស់រដ្ឋាភិបាលដែលដឹកនាំដោយលោក ហ៊ុន សែន នឹងត្រូវទាមទារយក មកជាទឹកដីខ្មែរវិញ នៅពេលប្រទេសកម្ពុជាដឹកនាំដោយរដ្ឋាភិបាលថ្មី ដែលកើតឡើងពីឆន្ទះ របស់ប្រជាពលរដ្ឋខ្មែរពិតប្រាកដនៅថ្ងៃខាងមុខ ។

សូមជំរាបផងដែរថា ទាំងអង្គការសង្គមស៊ីវិល ទាំងតំណាងរាស្ត្រគណបក្សប្រឆាំង សុទ្ធតែមិន​បាន​​បង្ហាញ​នូវការគាំទ្រ​​បន្តិចណាទាល់​តែសោះ​ ចំពោះ​ការកំណត់​ព្រំដែន​ថ្មី ដែលរដ្ឋាភិបាល​លោក ហ៊ុន សែន បានធ្វើនាពេលកន្លងមក​ រហូតមកទល់ពេលនេះ ជាមួយនឹងយួន ។

មហាជនទូទៅបានលើកឡើងថា ការបោះបង្គោលព្រំដែន រវាងកម្ពុជា និងយួន គឺវាជាការ​ធ្វើឲ្យ​ខាត​បង់​ដ៏ធំធេងសំរាប់​ជាតិខ្មែរ នៅពេលដែលការកំណត់អំពីព្រំដែន​ត្រូវបានធ្វើឡើង​ដោយ​​ស្ងាត់ៗរបៀបលួចលាក់ គ្មានការចូលរួមពីគ្រប់ភាគី ដែលជាម្ចាស់ទឹកម្ចាស់ដី ម្ចាស់វាសនា​របស់​ជាតិនោះ ការបាត់បង់​ទឹកដី​គឺជារឿងដ៏សែនឈឺចាប់បំផុតសំរាប់ប្រជាពលរដ្ឋ ដែលមាន​ឈាម​ជ័រជាខ្មែរ ។

ទើទោះបីក្នុងរបបនេះប្រជាពលរដ្ឋខ្មែរ មិនអាចធ្វើអ្វីបាន​ដើម្បីស្រោចស្រង់ស្ថានភាពព្រំដែន​ជាមួយយួន​ក្នុងបច្ចុប្បន្ននេះក៏ដោយ ក៏ប៉ុន្តែទោះជាយ៉ាងណាមិនត្រូវអស់សង្ឃឹម​នោះឡើយ។ បងប្អូននៅមានឪកាស គឺក្នុងការបោះឆ្នោត ត្រូវតែធ្វើការផ្លាស់ប្តូរ មេដឹកនាំ ដែល​បានធ្វើ​ឲ្យបាត់​បង់ទឹកដីខ្មែរ និងត្រូវជ្រើសយកអ្នកថ្មី ដែលមានឆន្ទៈ និងសមត្ថភាពពិតប្រាកដ ដែលមិន​រណប​យួន​ ដើម្បីមកដឹកនាំប្រទេស ដោះស្រាយបញ្ហាព្រំដែននេះ​ឡើងវិញ ។

គណបក្សសមរង្ស៊ី នៅពេលឈ្នះឆ្នោតដឹកនាំប្រទេស មានអំណាចគ្រប់គ្រាន់ នឹងទាមទារយក​មកវិញនូវចំណែកព្រំដែន ដែលបានបាត់បង់ទៅប្រទេសជិតខាង ដោយប្រើច្បាប់ទាំងឡាយណា​ដែលធានាចំពោះបូរណភាពទឹកដីខ្មែរជាអន្តរជាតិ ៕