ប្រជាពលរដ្ឋរស់នៅឃុំប៊ូស្រា ស្រុកពេជ្រាដា ខេត្តមណ្ឌលគិរី អះអាងថា អ្នកភូមិនឹងលើកគ្នាទៅបិទផ្លូវចេញចូលកសិដ្ឋានក្រុមហ៊ុនចម្ការកៅស៊ូ សុកហ្វីន ខេស៊ីឌី (Socfin KCD) ដើម្បីជាលក្ខខណ្ឌឲ្យក្រុមមន្ត្រី អាជ្ញាធរស្វែងរកដំណោះស្រាយជាមួយក្រុមហ៊ុន ឲ្យប្រគល់ដីប្រជាពលរដ្ឋ ដើម្បីចុះបញ្ជីធ្វើប័ណ្ណកម្មសិទ្ធិស្របច្បាប់។
តំណាងប្រជាពលរដ្ឋមកពីភូមិចំនួន៦ ក្នុងឃុំប៊ូស្រា បានកំណត់ពេលរហូតដល់ដើមសប្ដាហ៍ក្រោយនេះ ដើម្បីទុកពេលឲ្យអាជ្ញាធរដោះស្រាយ ធ្វើយ៉ាងណាឲ្យក្រុមហ៊ុនសម្បទានសេដ្ឋកិច្ច សុកហ្វីន ខេស៊ីឌី យល់ព្រមឲ្យក្រុមនិស្សិតវាស់វែងដីប្រជាពលរដ្ឋជាងមួយរយគ្រួសារ ដែលមានដីជាប់កិច្ចសន្យាជាមួយក្រុមហ៊ុន។
ការព្រមានដាក់លក្ខខណ្ឌរបស់ប្រជាពលរដ្ឋនេះ ធ្វើឡើងនៅព្រឹកថ្ងៃអង្គារ ទី២៨ ខែសីហា ឆ្នាំ២០១២ ខណៈពេលប្រជាពលរដ្ឋជាង៥០គ្រួសាររស់នៅភូមិចំនួន៦ ក្នុងឃុំប៊ូស្រា បាននាំគ្នាមកសាលាឃុំ និងដាក់លក្ខខណ្ឌឲ្យមន្ត្រីក្រុមប្រឹក្សាឃុំ ដោះស្រាយការតវ៉ារបស់ពួកគាត់។
ប្រជាពលរដ្ឋរស់នៅភូមិ៧ លោក ង៉េះ ណាំ មានប្រសាសន៍បញ្ជាក់ថា ប្រជាពលរដ្ឋនឹងនាំគ្នាបិទផ្លូវចេញចូលទៅការដ្ឋានក្រុមហ៊ុន ប្រសិនបើការទាមទាររបស់ប្រជាពលរដ្ឋអូសបន្លាយលើសពីថ្ងៃទី៤ ខែកញ្ញា ខាងមុខនេះ។ លោកបន្តថា ក្រុមការងារវាស់វែងដី ជាពិសេសក្រុមនិស្សិតរបស់រាជរដ្ឋាភិបាលកំពុងវាស់វែងដីនៅឃុំប៊ូស្រា ពួកគេបដិសេធមិនវាស់វែងដីប្រជាពលរដ្ឋដែលកំពុងមានបញ្ហាជាមួយក្រុមហ៊ុននោះឡើយ៖«គេថាចូលទាមទារបិទផ្លូវក្រុមហ៊ុន កុំឲ្យក្រុមហ៊ុនចេញចូល។ មិនមែនមេឃុំថាទេ ប្រជាពលរដ្ឋចាំមើលដល់ក្រុមហ៊ុនឆ្លើយតបថា ថ្ងៃបួនដោះស្រាយ គេរង់ចាំដែរ»។
មេឃុំប៊ូស្រា លោក យឿន សារីន មិនធ្វើអត្ថាធិប្បាយពិស្ដារពីលក្ខខណ្ឌរបស់ប្រជាពលរដ្ឋទេ ក៏ប៉ុន្តែលោកអះអាងថា ក្រុមអាជ្ញាធរនឹងដោះស្រាយការទាមទាររបស់ប្រជាពលរដ្ឋនៅពេលឆាប់ៗនេះហើយ៖ «គេកំពុងរៀបចំហើយការងារហ្នឹង សប្ដាហ៍ក្រោយហ្នឹង»។
ប្រជាពលរដ្ឋជនជាតិដើមភាគតិចព្នង៧ភូមិ នៅឃុំប៊ូស្រា តាំងពីឆ្នាំ២០០៧ មក បានតវ៉ាជាច្រើនលើកជាមួយក្រុមហ៊ុនសុកហ្វីន បន្ទាប់ពីក្រុមហ៊ុនបានឈូសឆាយទៅលើដីស្រែ ដីចម្ការវិលជុំ ដីតំបន់ទីសក្ការៈ និងដីកប់សពប្រពៃណីប្រជាពលរដ្ឋ។
ប្រជាពលរដ្ឋឲ្យដឹងថា រហូតមកទល់នឹងឆ្នាំ២០១០ ក្រុមហ៊ុន និងប្រជាពលរដ្ឋចុះកិច្ចព្រមព្រៀងបីចំណុច គឺផ្តល់សំណងជាប្រាក់ ឬប្ដូរដីសងប្រជាពលរដ្ឋតាមទំហំដី និងគុណភាពដីរបស់ប្រជាពលរដ្ឋ ដែលក្រុមហ៊ុនបានឈូសឆាយ និងដាំកៅស៊ូប្រវាស់ជាមួយប្រជាពលរដ្ឋម្ចាស់ដីតាមទំហំដីរបស់ប្រជាពលរដ្ឋមានជាក់ស្តែង។
មន្ត្រីកម្មវិធីចងក្រងសហគមន៍ នៃសមាគមអាដហុក លោក នី សុខា ឲ្យដឹងថា លក្ខខណ្ឌបិទផ្លូវរបស់ប្រជាពលរដ្ឋជាថ្នូរការទាមទារមិនប្រសើរទេ ក៏ប៉ុន្តែ ប្រជាពលរដ្ឋគ្មានជម្រើស។ លោកបន្តថា ការអង្កេតបឋមរបស់លោក រកឃើញថា ក្រុមហ៊ុនហាក់ដូចមិនមានចេតនាដោះស្រាយការទាមទាររបស់ប្រជាពលរដ្ឋនោះទេ៖ «អាជ្ញាធរត្រូវតែមានការដោះស្រាយឲ្យមានតម្លាភាព កុំឲ្យឈានទៅដល់បិទផ្លូវ ពីព្រោះរឿងហ្នឹង មិនមែនជារឿងល្អទេ ទាំងប្រជាជនក៏គាត់ខាតដែរ ខាតទាំងពេលវេលា ខាតទាំងអ្វីទាំងអស់។ តាមព័ត៌មានដែលខ្ញុំទទួលបាន មាន១១៧គ្រួសារ ដែលគាត់មិនទទួលយកលុយ ហើយដីរបស់គាត់ត្រូវបានក្រុមហ៊ុនឈូសឆាយ ហើយដាំកៅស៊ូរួចទៀត»។
របាយការណ៍អង្កេតរបស់មន្ត្រីកម្មវិធីចងក្រងសហគមន៍ នៃសមាគមអាដហុក ឲ្យដឹងថា ដីប្រជាពលរដ្ឋដែលកំពុងមានទំនាស់ជាមួយក្រុមហ៊ុន មានជាង៣០០ហិកតារ។ ចំណែកប្រជាពលរដ្ឋអះអាងថា ក្រុមហ៊ុនកំពុងរំលោភកិច្ចសន្យា ពីព្រោះក្រុមហ៊ុនបានធ្វើកិច្ចសន្យាថ្មីឲ្យប្រជាពលរដ្ឋម្ចាស់ដីដែលមិនព្រមទទួលប្រាក់ ឲ្យជួលដីដែលក្រុមហ៊ុនដាំកៅស៊ូរួចហើយពីក្រុមហ៊ុនវិញ ហើយរហូតមកទល់នឹងពេលនេះ ក្រុមហ៊ុនមិនយល់ព្រមឲ្យក្រុមនិស្សិតវាស់វែងដីប្រជាពលរដ្ឋ ដែលក្រុមហ៊ុនចុះកិច្ចសន្យាដាំកៅស៊ូប្រវាស់នោះឡើយ៕
No comments:
Post a Comment
yes