ប៉ោយប៉ែត៖ ប្រជាពលរដ្ឋនៅភូមិចន្ទគីរី សង្កាត់ផ្សារកណ្តាល ក្រុង ប៉ោយប៉ែតខេត្តបន្ទាយមានជ័យ បាននាំគ្នាតវ៉ារឿងមន្ត្រីអាជ្ញាធរភូមិទារប្រាក់ពួកគាត់ម្នាក់ ១ ម៉ឺនរៀល ថ្លៃសេវាធ្វើអត្តសញ្ញាណប័ណ្ណសញ្ជាតិខ្មែរ កាលពីព្រឹកថ្ងៃទី០១ ខែវិច្ឆិកា ឆ្នាំ២០១២ នេះ។
បុរសម្នាក់សុំមិនបញ្ចេញឈ្មោះ បានប្រាប់ “វរជនខ្មែរ” ប្រចាំខេត្តបន្ទាយមានជ័យ ថា មន្ត្រីអាជ្ញាធរភូមិខាងលើ ពិតជាបានទារប្រាក់ពីប្រជាពលរដ្ឋម្នាក់ ១ ម៉ឺនរៀល ប្រាកដមែន ថ្លៃសេវាចុះធ្វើអត្តសញ្ញាណប័ណ្ណឲ្យប្រជាពលរដ្ឋ។ បុរសដដែលបានប្រាប់ឲ្យដឹងទៀតថា ចំពោះពួកមន្ត្រីដូចគ្នា ពួកគេមិនត្រូវបានទារប្រាក់ឡើយ ដោយឡែកប្រជាពលរដ្ឋក្រីក្រដែលរស់ នៅតាមទីជនបទនោះ គឺក្រុមមន្ត្រីដាច់ខាតត្រូវតែទារប្រាក់ពីពួកគាត់ម្នាក់ ១ ម៉ឺនរៀល។
នៅព្រឹកមិញនេះដែរ លោកចៅសង្កាត់ប៉ោយប៉ែតឈ្មោះ គង់ សុខ បានប្រាប់វរជនខ្មែរយើងថា ករណីខាងលើនេះ មិនមានប្រភពច្បាស់លាស់ឡើយ ពោលគឺលោកបានដាក់កម្លាំងទៅស្រាវជ្រាវអស់ហើយ បើទោះបីជាបែបនេះក្តី រឿងករណីទារប្រាក់ថ្លៃសេវាធ្វើអត្តសញ្ញាណប័ណ្ណនេះ “វរ ជនខ្មែរ” យើងធ្លាប់បានសាកសួរមេភូមិអូរប្ញស្សី រួចហើយមកហើយ គឺ លោកបានសារភាពត្រង់ៗថា ពិតជាបានទារប្រាក់ពីពលរដ្ឋមែន។
ករណីដ៏មិនគួរចង់ឃើញខាងលើនេះ សង្ឃឹមថា រាជរដ្ឋាភិបាល គប្បី នឹងជួយកែប្រែមន្ត្រីទាំងនេះផងដើម្បីជាប្រយោជន៍ជួយកាត់បន្ថយភាពក្រីក្ររបស់ប្រជាពលរដ្ឋកម្ពុជាក្នុងមូលដ្ឋានក៏ដូចជាសង្គមជាតិទាំងមូលផង ដែរ៕
No comments:
Post a Comment
yes