លោក បារ៉ាក់ អូបាម៉ា ប្រធានាធិបតីសហរដ្ឋអាមេរិក
តាមការគ្រោងទុកលោកប្រធានាធិបតីសហរដ្ឋអាមេរិក បារ៉ាក់ អូបាម៉ា នឹងមកដល់កម្ពុជាថ្ងៃទី ១៩ ខែ វិច្ឆិកា ដើម្បីចូលរួមកិច្ចប្រជុំអាស៊ាន-អាមេរិក និង អាស៊ី-បូព៌ា បន្ទាប់ពីដំណើរទស្សនកិច្ចទៅកាន់ប្រទេសក្នុងប្លុកអាស៊ានចំនួនពីរគឺ ថៃ និង ភូមា ដែលប្រកបដោយវិបត្តិ។
បើទោះបីនៅចំពោះមុខនាពេលនេះប្រទេសភូមាកំពុងតែប្រឈមនឹងបញ្ហាសាសនាយ៉ាងក្ដៅគគុកនៅរដ្ឋ រ៉ាឃីន ដែលបណ្ដាលឲ្យមានអ្នកស្លាប់និងរងគ្រោះរាប់ពាន់នាក់ក្ដី ប៉ុន្តែបំណងសំខាន់ដែលជម្រុញឲ្យមេដឹកនាំអាមេរិកហោះទៅចាប់ដៃមេដឹកនាំរដ្ឋាភិបាលភូមាលោក ថេន សេន និង ប្រមុខបក្សប្រឆាំងលោកស្រី អ៊ុងសាន ត្រូវបានគេមើលឃើញថា គឺជាផ្នែកដើម្បីត្រួតពិនិត្យស្ថានភាពសិទ្ធិមនុស្ស និង ប្រជាធិបតេយ្យ ខណៈដែលប្រទេសនេះទើបតែធ្វើកំណែទម្រង់នយោបាយ ងាកមុខទៅរកពិភពលោក ។ គឺជាការធ្វើកំណែទម្រង់ដែលទាក់ទាញឲ្យមានការឃ្លាំមើលដោយប្រយ័ត្នប្រយ៉ែងបំផុត។
យ៉ាងណាក៏ដោយការផ្លាសប្ដូររបត់នយោបាយដ៏នឹកស្មានមិនដល់ របស់ភូមាដែលធ្លាប់តែគ្រប់គ្រងដោយរបបយោធា ជោរជន់ដោយការរំលោភបំពានសិទ្ធិមនុស្ស ងាកមកបោះជំហាននៅលើគន្លងប្រជាធិបតេយ្យ គឺពិតណាស់ហើយថា មិនអាចកាត់ផ្ដាច់បានទេ ពីឆន្ទះចង់ឲ្យមានការផ្លាសប្ដូររបស់មេដឹកនាំប្រទេសនេះ ក៏ ដូចជាការតស៊ូយ៉ាងស្វិតស្វាញរបស់មេដឹកនាំបក្សប្រឆាំង ដែលអាមេរិកត្រូវតែប្រគល់បាច់ផ្កា លើកទឹកចិត្ត ដោយមិនអាចខានបាន ។ ពោលគឺត្រូវតែកៀងគរពួកអ្នកវិនិយោគដើម្បីជម្រុញឲ្យមានការស្ថាបនាសេដ្ឋកិច្ចប្រទេសនេះឡើងវិញ។
ដោយឡែកសម្រាប់កម្ពុជា ប្រទេសកម្ពុជាដែលពេលនេះ ត្រូវបានគេមើលឃើញថា កំពុងញាំញីដោយវិបត្តិ គឺ វិបត្តិនៃការរំលោភបំពានសិទ្ធិមនុស្ស និង ប្រជាធិបតេយ្យ ដែលទាមទារឲ្យមានការដោះស្រាយជាបន្ទាន់។
គ្រាន់តែឮដំណឹងពីគម្រោងដំណើរមកកាន់ប្រទេសកម្ពុជារបស់ប្រធានាធិបតីសហរដ្ឋអាមេរិកពីគណបក្សប្រជាធិបតេយ្យ ទាំងអង្គការសង្គមស៊ីវិលក្នុងនិងក្រៅស្រុក ក៏ដូចជាប្រជាពលរដ្ឋ ដែលបានអះអាងថា ពួកគេជាជនរងគ្រោះដោយការរំលោភសិទ្ធិ បានសម្ដែងនូវសេចក្ដីត្រេកអរ ដោយបានអំពាវនាវយ៉ាងទទូចឲ្យលោក បារ៉ាក់ អូបាម៉ា ជួយអន្តរាគមន៏ដោះស្រាយបញ្ហារបស់ពួកគេ។
ចំណែកឯបក្សប្រឆាំងវិញក៏ដូច្នេះដែរ ពួកគេបានបញ្ជូនសាររួចហើយ តាមរយៈស្ថានទូតអាមេរិកទៅកាន់លោក អូបាម៉ា ស្ដីពីស្ថានភាពដ៏អាក្រក់ នៃ ការអនុវត្តន៏គោលការណ៏ប្រជាធិបតេយ្យ ខណៈមេដឹកនាំរបស់គេ ត្រូវបានតុលាការដែលគេជឿថា ជាឧបករណ៏របស់បក្សកាន់អំណាចកាត់ឲ្យជាប់ទោស១២ឆ្នាំ រួមទាំងប្រព័ន្ធរៀបចំការបោះឆ្នោតដែលមិនឯករាជ្យ និង សុច្ចរិតជាដើម។
ជាមួយគ្នាគេក៏ជឿផងដែរថាលោក អូបាម៉ា ប្រាកដជាបានដឹងរួចមកហើយ ពីរឿងរ៉ាវមិនប្រក្រតីអាក្រក់ៗនៅកម្ពុជា តាមរយៈព្រឹទ្ធសមាជិកអាមេរិក សភាសហគមន៏អឺរ៉ុប ព្រឹទ្ធសមាជិកអូស្ត្រាលី ហើយចុងក្រោយនេះគឺរបាយការណ៏របស់អង្គការសិទ្ធិមនុស្ស យូមេនរ៉ាយវ៉ច ស្ដីពីស្ថានភាពសិទ្ធិមនុស្ស និង ការអនុវត្តន៏លទ្ធិប្រជាធិបតេយ្យនៅកម្ពុជា ។ ដែលពួកគេសុទ្ធតែបានផ្ញើរសេចក្ដីសង្ឃឹមយ៉ាងមុតមាំចំពោះលោក អូបាម៉ា ឲ្យជួយដោះស្រាយ ។ ក្នុងស្ថានភាពបែបនេះតើវត្តមានរបស់លោក បារ៉ាក់ អូបាម៉ា មានសារៈសំខាន់អ្វីដែរឬទេ សម្រាប់រដ្ឋាភិបាលខ្មែរ ?
ខុសផ្ទុយពីសេចក្ដីថ្លែងបែបក្រអឺតរបស់អ្នកនាំពាក្យរដ្ឋាភិបាលលោក ខៀវ កាញារីទ្ធ ដែលថាលោកបារ៉ាក់ អូបាម៉ា មិនមែនជាចៅហ្វាយរបស់កម្ពុជា ឬ ពុំមានឥទ្ធិពលអ្វីសម្រាប់កម្ពុជានោះ ។រដ្ឋាភិបាលបានប្រកាសម្ដងហើយម្ដងទៀតថា ក្រៅតែពីការចូលរួមក្នុងកិច្ចប្រជុំលោក បារ៉ាក អូបាម៉ា ក៏នឹងជួបជាលក្ខណទ្វេភាគី ជាមួយរដ្ឋាភិបាលផងដែរ។ ដែលផ្ដោតសំខាន់ទៅលើកិច្ចការវិនិយោគ ។ បែបនេះបានសបញ្ជាក់ឲ្យឃើញថា គ្រប់ផ្នែកទាំងអស់ក្នុងសង្គមខ្មែរសុទ្ធតែបានចាត់ទុកលោកប្រធានាធិបតីសហរដ្ឋអាមេរិកជាតួអង្គដ៏សំខាន់ ក្នុងការដោះស្រាយបញ្ហារបស់ពួកគេ ។ ប៉ុន្តែវាប្រាកដណាស់ហើយថា ប្រធានាធិបតីអាមេរិកដែលទើបតែទទួលបានការគាំទ្រឲ្យកាន់អំណាចក្នុងអាណត្តិទីពីរទៀតនេះ ពិតជាមានគោលការច្បាស់លាស់របស់ខ្លួន នោះគឺការពង្រឹងលទ្ធិប្រជាធិបតេយ្យ និង សិទ្ធិមនុស្ស ជាមូលដ្ឋាននៅកម្ពុជា ។ដែលវាក៏ជាផ្នែកចាំបាច់នៃការលើកតម្លៃកិត្តិយសរបស់ អាមេរិកផងដែរ៕
No comments:
Post a Comment
yes