ក្រុមប្រឹក្សាធម្មនុញ្ញបើកសវនាការសាធារណៈ លើបណ្ដឹងតវ៉ាលុបឈ្មោះ
លោក សម រង្ស៊ី ពីបញ្ជីឈ្មោះបោះឆ្នោតឆ្នាំ២០១២ កាលពីថ្ងៃទី១៩ ខែវិច្ឆិកា ឆ្នាំ២០១២
ក្រុមប្រឹក្សាធម្មនុញ្ញ ច្រានចោលបណ្ដឹងតវ៉ាលុបឈ្មោះលោក សម រង្ស៊ី ពីបញ្ជីបោះឆ្នោតឆ្នាំ២០១២ នៅព្រឹកថ្ងៃទី១៩ ខែវិច្ឆិកា និងបញ្ជាឲ្យស្ថាប័នពាក់ព័ន្ធ អនុវត្ត និងធ្វើការផ្សព្វផ្សាយជាសាធារណៈទៀតផង។
ចំណែកមេធាវីរបស់លោក សម រង្ស៊ី អះអាងថា ក្រុមប្រឹក្សាធម្មនុញ្ញបន្តគាំទ្រការប្រើច្បាប់បោះឆ្នោតខុសមាត្រារបស់អ្នករៀបចំការបោះឆ្នោត ដែលធ្វើឲ្យគាត់មិនអស់ចិត្តនឹងការកាត់សេចក្តីនោះ។
ក្រុមប្រឹក្សាធម្មនុញ្ញនៅព្រឹកថ្ងៃទី១៩ ខែវិច្ឆិកា ឆ្នាំ២០១២ បានប្រកាសបិទផ្លូវតវ៉ាដល់លោក សម រង្ស៊ី ហើយគាំទ្រការសម្រេចរបស់គណៈកម្មាធិការជាតិរៀបចំការបោះឆ្នោត (គ.ជ.ប) ឲ្យលុបឈ្មោះលោក សម រង្ស៊ី ពីបញ្ជីបោះឆ្នោតឆ្នាំ២០១២។
ការប្រកាសបិទផ្លូវតវ៉ានេះ បានធ្វើឡើងបន្ទាប់ពីក្រុមប្រឹក្សាធម្មនុញ្ញបើកសវនាការសាធារណៈដេញដោលដើមចោទ គឺមេធាវី ជូង ជូងី តំណាងឲ្យលោក សម រង្ស៊ី និងលោក ឯម សុផាត ចុងចោទតំណាងឲ្យគណៈកម្មាធិការជាតិរៀបចំការបោះឆ្នោត។
ប្រធានជំនុំជម្រះនៃក្រុមប្រឹក្សាធម្មនុញ្ញ លោក ឯក សំអុល បានថ្លែងថា លោក ជូង ជូងី ជាមេធាវីតំណាងឲ្យលោក សម រង្ស៊ី ពុំបានបង្ហាញភស្តុតាងជាលាយលក្ខណ៍អក្សរ ដែលបញ្ជាក់ថា តុលាការកំពូលបានទទួលពាក្យប្ដឹងសើរើ និងសម្រេចព្យួរការអនុវត្តទោសឲ្យស្របតាមមាត្រា៤៤៩ នៃក្រមនីតិវិធីព្រហ្មទណ្ឌនោះទេ៖ «សម្រេចមាត្រា១ ទទួលពាក្យបណ្ដឹងចុះថ្ងៃទី៨ ខែវិច្ឆិកា ឆ្នាំ២០១២ របស់លោកមេធាវី ជូង ជូងី ជាតំណាងលោក សម រង្ស៊ី ប្រធានគណបក្សសង្គ្រោះជាតិ ទុកជាបានការតាមទម្រង់ច្បាប់។ ប៉ុន្តែបដិសេធចោល ដោយខុសនឹងគតិច្បាប់។ មាត្រា២ តម្កល់សេចក្តីសម្រេចលេខ០០៨/១២ គ.ជ.ប សសរ ចុះថ្ងៃទី៦ ខែវិច្ឆិកា ឆ្នាំ២០១២ របស់គណៈកម្មាធិការជាតិរៀបចំការបោះឆ្នោត ទុកជាបានការពេញទាំងមូល។ មាត្រា៣ សេចក្តីសម្រេចនេះ ប្រកាសនាសវនាការជាសាធារណៈ នៅរាជធានីភ្នំពេញ ថ្ងៃទី១៩ ខែវិច្ឆិកា ឆ្នាំ២០១២ ជាសេចក្តីសម្រេចស្ថាពរបិទផ្លូវតវ៉ា ហើយមានអានុភាពអនុវត្តទៅលើអំណាចទាំងអស់ដែលមានចែងក្នុងរដ្ឋធម្មនុញ្ញ និងត្រូវចុះផ្សាយក្នុងរាជកិច្ច»។
ឆ្លើយតបនឹងសេចក្តីប្រកាសរបស់ក្រុមប្រឹក្សាធម្មនុញ្ញ មេធាវី ជូង ជូងី ជាតំណាងលោក សម រង្ស៊ី បានថ្លែងនៅក្រៅសវនាការថា លោកមិនអស់ចិត្តនឹងសេចក្តីសម្រេចរបស់ក្រុមប្រឹក្សាធម្មនុញ្ញប្រកាសបិទផ្លូវតវ៉ារបស់លោក សម រង្ស៊ី នេះទេ ពីព្រោះសំអាងហេតុដែលក្រុមប្រឹក្សាសង្កាត់បឹងរាំង យកមកធ្វើជាសំអាងក្នុងការលុបឈ្មោះលោក សម រង្ស៊ី គឺអត់ត្រឹមត្រូវ ព្រោះបានប្រើច្បាប់បោះឆ្នោតខុសមាត្រា គឺយកមាត្រាចុះឈ្មោះបោះឆ្នោត យកទៅលុបឈ្មោះលោក សម រង្ស៊ី ទៅវិញ។
មេធាវី ជូង ជូងី៖ «ពីព្រោះតុលាការកំពូល អត់ទាន់បានយកសាលដីការបស់តុលាការកំពូលទៅចាត់ចែងអនុវត្តទេ។ តែក្រុមប្រឹក្សាសង្កាត់បឹងរាំង ទៅយកសាលដីកាតុលាការកំពូលមកអនុវត្តដោយខ្លួនឯង ហើយចុងក្រោយ ក្រុមប្រឹក្សាធម្មនុញ្ញនៅតែយល់ឃើញថា ការសម្រេចនោះត្រឹមត្រូវ។ ម្យ៉ាងទៀត ក្រុមប្រឹក្សាសង្កាត់បឹងរាំង ផ្អែកទៅលើមាត្រា៥០ នៃច្បាប់ស្ដីពីការបោះឆ្នោតជ្រើសរើសតំណាងរាស្ត្រ យកមកលុបឈ្មោះលោក សម រង្ស៊ី ប៉ុន្តែមាត្រា៥០ នោះ ចែងពីនីតិវិធីចុះឈ្មោះក្នុងការលុបឈ្មោះ។ យើងអត់អាចយកច្បាប់ចែងពីនីតិវិធីចុះឈ្មោះ ទៅអនុវត្តលុបឈ្មោះទេ គឺត្រូវប្រើច្បាប់និយាយអំពីនីតិវិធីលុបឈ្មោះ»។
ក្រុមប្រឹក្សាសង្កាត់បឹងរាំង រាជធានីភ្នំពេញ បានលុបឈ្មោះលោក សម រង្ស៊ី ពីបញ្ជីឈ្មោះបោះឆ្នោតបច្ចុប្បន្នភាពឆ្នាំ២០១២ កាលពីថ្ងៃទី២៧ ខែតុលា ឆ្នាំ២០១២ ដោយសំអាងលើសាលដីការបស់តុលាការកំពូលលេខ៣២ ចុះថ្ងៃទី១ ខែមីនា ឆ្នាំ២០១១ ដែលសម្រេចឲ្យលោក សម រង្ស៊ី ជាប់ពន្ធនាគារ។ បន្ទាប់មក គ.ជ.ប គាំទ្រក្រុមប្រឹក្សាសង្កាត់បឹងរាំង ដែលបានលុបឈ្មោះលោក សម រង្ស៊ី ហើយបានចេញសេចក្តីសម្រេចលេខ០០៨/១២ គ.ជ.ប សសរ ចុះថ្ងៃទី៦ ខែវិច្ឆិកា ឆ្នាំ២០១២។
កាលពីថ្ងៃទី១៤ ខែវិច្ឆិកា ឆ្នាំ២០១២ តំណាង គ.ជ.ប លោក ឯម សុផាត បានបំភ្លឺនៅចំពោះមុខក្រុមប្រឹក្សាធម្មនុញ្ញ តាមមាត្រា៥៣ ថ្មី ដែល គ.ជ.ប ប្រគល់សិទ្ធិឲ្យក្រុមប្រឹក្សាឃុំ-សង្កាត់ ចុះឈ្មោះពិនិត្យបញ្ជីឈ្មោះបោះឆ្នោត ប៉ុន្តែក្រុមប្រឹក្សាសង្កាត់បឹងរាំង បានប្រើមាត្រាទី៥០ ថ្មី នៃច្បាប់បោះឆ្នោត យកទៅប្រើសម្រាប់លុបឈ្មោះលោក សម រង្ស៊ី ទើបមេធាវីតំណាងលោក សម រង្ស៊ី មិនសុខចិត្តប្ដឹងតវ៉ាមកក្រុមប្រឹក្សាធម្មនុញ្ញ៕
No comments:
Post a Comment
yes