សកម្មភាពឈូសឆាយព្រៃរបស់ក្រុមហ៊ុន វៀតណាម នាពេលកន្លងមក
មន្ត្រីរដ្ឋបាលព្រៃឈើខេត្តរតនគិរីបានទៅជួបប្រជុំជាមួយនឹងជនជាតិដើមភាគតិចចារ៉ាយដែលមានបញ្ហាវិវាទដីធ្លីជាង១០០នាក់កាលពីម្សិលមិញនិងបានទៅពិនិត្យព្រៃការពារជាកន្លែងដែលត្រូវបានក្រុមហ៊ុនវៀតណាម ៧២ (ម៉ែន សារុន)ធ្វើការឈូសឆាយ។
ប្រជាសហគមន៍ជនជាតិដើមភាគតិចចារ៉ាយ ក្នុងភូមិតេន ឃុំ យ៉ាទុង ស្រុកអូរយ៉ាដាវបានអះអាងថាគ្រឿងចក្រក្រុមហ៊ុនវៀតណាម៧២ ដែលត្រូវបានជួលដោយក្រុមហ៊ុន ម៉ែន សារុន បានឈូសឆាយដីព្រៃការពាររបស់ពួកគាត់អស់ចំនួនពីរហិកតាចាប់តាំងពីសប្តាហ៍មុនមកបើទោះបីជាពួកគាត់បានព្យាយាមធ្វើការរារាំងយ៉ាងណាក៏ដោយ។
បន្ទាប់ពីបានទទួលរបាយការណ៍ ពីការឈូសឆាយដីព្រៃការពារនេះក៏ដូចជាដីព្រៃចម្ការផ្សេងៗទៀត លោកផាន់ ភឺន នាយរងខណ្ឌរដ្ឋបាលព្រៃឈើខេត្ដរតនគិរីអាជ្ញាធរគ្រប់លំដាប់ថ្នាក់និងប្រជាពលរដ្ឋជាង ១០០ នាក់មកពីបីភូមិបានជួបប្រជុំគ្នាលើកយកបញ្ហានេះមកពិភាក្សា។
លោកផាន់ ភឺន បានឲ្យដឹងថា៖«បន្ទាប់ពីប្រជុំចប់យើងបានទៅមើលព្រៃការពារនោះ។ ជាក់ស្តែងឈូសមែនក្នុងព្រៃការពារតែគេឈូសដើម្បីធ្វើផ្លូវមេមួយកាត់ព្រៃនេះប៉ុណ្ណោះ»។ លោកផាន់ ភឺន បានបន្តថា ការឈូសធ្វើផ្លូវនេះ មានទំហំប្រហែលជា ១០ ម៉ែត្រ ហើយសព្វថ្ងៃនេះ ក្រុមហ៊ុននៅបន្តធ្វើផ្លូវនេះនៅឡើយមិនទាន់ហើយនោះទេ។
ភ្នំពេញ ប៉ុស្តិ៍ បានទាក់ទងទៅលោក រចំ វីន មេឃុំយ៉ាទុង ដើម្បីសុំការបំភ្លឺបន្ថែម។ ប៉ុន្តែលោក រចំ វីន បានឲ្យទូរស័ព្ទទៅជំទប់ឃុំរបស់លោកម្នាក់និយាយ។ លោកជំទប់ឃុំដែលបដិសេធសុំមិនប្រាប់ឈ្មោះរូបនោះ បានឲ្យដឹងថា ដីក្រុមហ៊ុនស្ថិតនៅរំលងដីព្រៃការពារ របស់ជនជាតិដើមភាគតិចចារ៉ាយ ហេតុនេះក្រុមហ៊ុនចាំបាច់ត្រូវឈូសធ្វើផ្លូវដើម្បីដឹកគ្រឿងចក្រចូលទៅដីរបស់គេ។
លោកបានបញ្ជាក់ថា៖«គេឈូសដើម្បីដឹកគ្រឿងចក្រចូលក្នុងដីក្រុមហ៊ុនហើយផ្លូវនេះក្រុមហ៊ុនក៏មិនមែនឈូសយកធ្វើជាកម្មសិទិ្ធដែរ។ បើពលរដ្ឋចង់ប្រើក៏ប្រើទាំងអស់គ្នាទៅ»។
ទោះជាយ៉ាងណាលោកសេវ ហេម ប្រធានសហគមន៍ភូមិតេន ក្នុងឃុំយ៉ាទុងនៅតែអះអាងថាការឈូសឆាយដីព្រៃនោះមិនមែនធ្វើផ្លូវនោះទេ។ លោកសេវ ហេម បានថ្លែងដូច្នេះថា៖ «មិនមែនឈូសធ្វើផ្លូវទេ គឺឈូសដីដាំកៅស៊ូតែម្តង។ ឈូសអស់ពីរហិកតាហើយ។ សហគមន៍យើងសុំយកដីដែលឈូសហើយនោះមកវិញ»។ លោកសេវ ហេមបានបន្តថាប្រជាសហគមន៍ នៅតែបន្តតាមដានមើលសកម្មភាពរបស់ក្រុមហ៊ុននេះបន្តទៀតបើទោះបីជាក្រុមហ៊ុនបានផ្អាកសកម្មភាពយ៉ាងណាក៏ដោយ។
លោកឆាយ ធីមន្ត្រីសម្របសម្រួលសមាគមសិទ្ធិមនុស្សអាដហុកខេត្តរតនគិរី បានឲ្យដឹងថាផ្ទៃដីទំហំ ១ ពាន់ហិកតា ស្ថិតនៅក្នុងដីព្រៃការពារ ដែលមានបណ្តោយ ២គ.ម និង ទទឹង ៣ គ.ម ត្រូវបានក្រុមហ៊ុននេះ ឈូសឆាយ ដែលធ្វើឲ្យដីព្រៃការពារមួយនេះកាន់តែរួមតូច។ លោកបញ្ជាក់ថា៖«ការវាយតម្លៃពីផលប៉ះពាល់មិនគ្រប់ជ្រុងជ្រោយធ្វើឲ្យបាត់បង់ដីព្រៃការពារ។ ក្រុមហ៊ុនគេសំអាងថាបានរដ្ឋាភិបាលប្រគល់ដីឲ្យ គេមិនខ្វល់អ្វីទេគឺគេឈូសហើយ។ ពួកគេ មិនបានកាត់ព្រៃចេញតាមគោលការណ៍ដីសម្បទាននោះទេ»។ លោកបន្តថាជាទូទៅក្រុមហ៊ុនតែងតែចង់បានដីណាដែលសម្បូរជីជាតិ ដូចជាដីព្រៃការពារជាដើមគឺមិនមែនដីដែលសឹករេចរឹលនោះទេ៕
No comments:
Post a Comment
yes