លោកសម រង្ស៊ី ប្រធានគណបក្សសង្គ្រោះជាតិ (រូបថត តាំង វីដា)
ប្រធានគណបក្សសង្គ្រោះជាតិ (CNRP) លោក សម រង្ស៊ី នៅថ្ងៃព្រហស្បតិ៍នេះ ឲ្យដឹងថា គណបក្សលោកមិនដាក់ឱសានវាទដោះស្រាយបញ្ហាបោះឆ្នោត នៅត្រឹមចុងឆ្នាំ២០១៣ ដល់គណបក្សកាន់អំណាចនោះទេ ដោយសារគណបក្សលោកនៅតែរក្សាជំហបន្តរកយុត្តិធម៌ជូនម្ចាស់ឆ្នោត។
លោក សម រង្ស៊ី ប្រាប់VODថា គណបក្សសង្គ្រោះជាតិ នៅតែទាមទាមឲ្យគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ស៊ើបអង្កេតពីភាពមិនក្រក្រតីនៃការបោះឆ្នោត កាលពីថ្ងៃទី២៨ ខែកក្កដា ឆ្នាំ២០១៣ មានដូចជា ការបាត់ឈ្មោះអ្នកបោះឆ្នោត ការលួចបន្លំសន្លឹកឆ្នោត ជាដើម។
កាលពីដើមខែវិច្ឆិកា អនុប្រធានគណបក្សសង្គ្រោះជាតិ លោក កឹម សុខា ប្រាប់អ្នកសារព័ត៌មានថា គណបក្សនេះដាក់ឱសានវាទដល់គណបក្សកាន់អំណាច នៅត្រឹមចុងឆ្នាំនេះ ដើម្បីចរចាដោះស្រាយភាពមិនប្រក្រតីនៃការបោះឆ្នោត។ លោកថា គណបក្សនឹងឈប់ចរចាជាមួយគណបក្សកាន់អំណាច ហើយដឹកនាំធ្វើបាតុកម្មកាន់តែមានទ្រទ្រង់ធំ និងមានរយៈពេលយូរជាងបាតុកម្មកន្លងមក ប្រសិនបើគណបក្សកាន់អំណាចមិនទទួលយកលក្ខខណ្ឌចរចារបស់ខ្លួន។
គណបក្សសង្គ្រោះជាតិ នឹងដឹកនាំធ្វើមហាបាតុកម្ម រៀងរាល់ថ្ងៃអាទិត្យ ចាប់ពីថ្ងៃទី១៥ ខែធ្នូនេះ ដើម្បីបន្តទាមទារឲ្យមានការសើរើលទ្ធផលបោះឆ្នោត។
ក្នុងការចរចា គណបក្សឈ្នះឆ្នោតទាំងពីរ ខ្វែងគំនិតគ្នាលើរបៀបវារៈ។ គណបក្សសង្គ្រោះជាតិ ដែលគណៈកម្មាធិការជាតិរៀបចំការបោះឆ្នោត(គ.ជ.ប) ប្រកាសថាទទួលបានអាសនៈរដ្ឋសភា៥៥ ក្នុងចំណោមអាសនៈទាំង១២៣ លើករបៀបវារៈ៣។ ចំណុចទី១ គឺការទាមទារឲ្យមានការបង្កើតគណៈកម្មការឯករាជ្យស៊ើបអង្កេតភាពមិនប្រក្រតីនៃការបោះឆ្នោត ទី២ ការទាមទារឲ្យថ្នាក់ដឹកនាំទាំង៩រូបនៃគ.ជ.ប លាលែងតំណែង។ ចំណុចទី៣ គឺការទាមទារឲ្យមានកំណែទម្រង់ប្រព័ន្ធបោះឆ្នោត ផ្អែកតាមអនុសាសន៍របស់អ្នករាយការណ៍ពិសេសអង្គការសហប្រជាជាតិស្តីពី សិទ្ធិមនុស្សនៅកម្ពុជា អង្គការឃ្លាំមើលការបោះឆ្នោត ខុមហ្វ្រែល និងវិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ ហៅកាត់ NDI។
ចំណែក របៀបវារៈចរចារបស់គណបក្សប្រជាជនកម្ពុជាវិញ គឺផ្អែកលើសេចក្តីថ្លែងការណ៍រួមរវាងថ្នាក់ដឹកនាំកំពូលគណបក្សទាំងពីរ កាលពីថ្ងៃទី១៦ ខែកញ្ញា ឆ្នាំ២០១៣ ដែលបានព្រមព្រៀងគ្នានឹងបង្កើតយន្តការមួយ ដើម្បីកែទម្រង់ការបោះឆ្នោតនាពេលខាងមុខ៕
No comments:
Post a Comment
yes