រូបភាពឯកសារនៃការចាប់ខ្លួនកម្មករ ក្នុងហេតុការប៉ះទង្គិច
នៅផ្លូវវ៉េងស្រេង (រូបថត៖ តាត ឧត្តម)
អង្គការសមាគមចំនួន៥៤ សម្តែងការព្រួយបារម្ភករណីបាត់ក្មេងប្រុសម្នាក់ ក្នុងហេតុការណ៍បាញ់បង្ក្រាបនៅផ្លូវវ៉េងស្រេង កាលពីថ្ងៃទី៣ ខែមករា ហើយទទូចឲ្យរដ្ឋាភិបាលស៊ើបអង្កេតករណីនោះជាបន្ទាន់។
ក្នុងលិខិតចំហររួមរបស់អង្គការសមាគមទាំង៥៤ ចេញផ្សាយនៅថ្ងៃអាទិត្យនេះ បានឲ្យដឹងថា ក្នុងហេតុការណ៍បាញ់បង្ក្រាបនៅផ្លូវវ៉េងស្រេង បាត់ខ្លួនក្មេងប្រុសម្នាក់ឈ្មោះ ខឹម សុផាត អាយុ១៦ឆ្នាំ។ លិខិតនោះបញ្ជាក់ថា ខឹម សុផាត ត្រូវរបួសចំទ្រូង ហើយរហូតដល់ពេលនេះ នៅមិនទាន់ទទួលបានដំណឹងនៅឡើយ។
ក្រុមអង្គការសមាគមទាំង៥៤ ស្នើឲ្យរដ្ឋាភិបាលស៊ើបអង្កេតជាបន្ទាន់លើករណីបាត់ខ្លួន ដោយផ្អែកលើអនុសញ្ញាស្តីពីការការពារជនគ្រប់រូបពីការបាត់ខ្លួនដោយបង្ខំ (ICCPED) ដែលកម្ពុជាចុះហត្ថលេខាទទួលស្គាល់នៅថ្ងៃទី២៧ ខែមិថុនា ឆ្នាំ២០១៣។
អង្គការសមាគមទាំង៥៤នោះរួមមាន មជ្ឈមណ្ឌលសិទ្ធិមនុស្សកម្ពុជា សមាគមការពារសិទ្ធិមនុស្សអាដហុក អង្គការលីកាដូ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យជាដើម។
ក្រោយហេតុការណ៍បាញ់ប្រហារនៅផ្លូវវ៉េងស្រេង និងនៅក្បែរតំបន់សេដ្ឋកិច្ចពិសេសភ្នំពេញនោះ រដ្ឋាភិបាលបានបង្កើតក្រុមការងារដើម្បីស៊ើបអង្កេតលើហេតុការណ៍នោះ តែនៅមិនទាន់ទទួលបានណឹដំងពីការបាត់ខ្លួន ខឹម សុខផាត នៅឡើយទេ។
អ្នកនាំពាក្យកងរាជអាវុធហត្ថលោក ខេង ទីតូ ធ្លាប់លើកឡើងថា រាល់ការស៊ើបអង្កេតរបស់សមត្ថកិច្ច គឺផ្តោតសំខាន់តែលើការញុះញង់ឲ្យមានហិង្សាតែប៉ុណ្ណោះ។
នៅថ្ងៃទី២ និងទី៣ខែកម្លាំងប្រដាប់អាវុធ បានបាញ់បង្ក្រាបលើកម្មករទាមទារប្រាក់ឈ្នួល១៦០ដុល្លារ ដែលបណ្តាលឲ្យមនុស្សយ៉ាងហោចណាស់៥នាក់ស្លាប់ ២៣នាក់ត្រូវចាប់ខ្លួន និងជិត៤០នាក់រងរបួស៕
No comments:
Post a Comment
yes