.jpg)
ក្រុមសន្តិសុខខណ្ឌដូនពេញ វាយពលរដ្ឋនៅម្ដុំស្ពាននាគ ក្បែរទីលាន
ប្រជាធិបតេយ្យ កាលពីថ្ងៃទី១ ឧសភា ឆ្នាំ២០១៤
អង្គការអ្នកកាសែតគ្មានព្រំដែន ថ្កោលទោសធ្ងន់ធ្ងរចំពោះការប្រើអំពើហិង្សារបស់កងសន្តិសុខសាលាខណ្ឌដូនពេញ វាយបង្ក្រាបទៅលើអ្នកយកព័ត៌មាននៃវិទ្យុសំឡេងប្រជាធិបតេយ្យ វីអូឌី (VOD) ហើយបានទាមទារឲ្យរដ្ឋាភិបាល បើកការស៊ើបអង្កេតជាបន្ទាន់ ដើម្បីនាំយកជនដៃដល់ និងអ្នកទទួលខុសត្រូវ មកផ្ដន្ទាទោសតាមច្បាប់។
ក្នុងសេចក្តីប្រកាសព័ត៌មានរបស់ខ្លួន ចុះថ្ងៃទី២ ខែឧសភា អង្គការអ្នកកាសែតគ្មានព្រំដែន (Reporters Without Borders) បានទាមទារឲ្យរដ្ឋាភិបាលប្រតិកម្មជាបន្ទាន់ និងចាត់វិធានឲ្យបានម៉ឺងម៉ាត់ ដើម្បីការពារអ្នកកាសែតពីការរំលោភបំពាន។
ការទាមទារនេះ ធ្វើឡើងភ្លាមៗបន្ទាប់ពីអ្នកយកព័ត៌មានរបស់វិទ្យុសំឡេងប្រជាធិបតេយ្យ វីអូឌី លោក ឡាយ សាមាន ត្រូវបានកងសន្តិសុខសាលាខណ្ឌដូនពេញ ព្រួតគ្នាវាយឲ្យមានរបួសធ្ងន់ធ្ងរ នៅពេលដែលលោកចុះយកព័ត៌មាន និងថតរូបក្នុងយុទ្ធនាការឃោសនាបោះឆ្នោតរាជធានី ខេត្ត ក្រុង ស្រុក ខណ្ឌ របស់គណបក្សសង្គ្រោះជាតិ នៅក្បែរទីលានប្រជាធិបតេយ្យ កាលពីរសៀលថ្ងៃទី២ ខែឧសភា។ ក្រៅពីអ្នកកាសែត ក្រុមសន្តិសុខក៏បានវាយបង្ក្រាបទៅលើព្រះសង្ឃ និងធ្វើឲ្យប្រជាពលរដ្ឋមួយចំនួនផ្សេងទៀតឲ្យរងរបួស ក្នុងនោះក៏មានតំណាងរាស្ត្រជាប់ឆ្នោតគណបក្សសង្គ្រោះជាតិ មណ្ឌលកំពង់ចាម ផងដែរ។
ប្រធានអង្គការអ្នកកាសែតគ្មានព្រំដែនប្រចាំតំបន់អាស៊ីប៉ាស៊ីហ្វិក លោក ប៊ែនចាមីន អ៊ីស្មាអ៊ីល (Benjamin Ismail) បានថ្លែងក្នុងសេចក្តីប្រកាសព័ត៌មានថា រដ្ឋាភិបាលកម្ពុជា មិនអាចបដិសេធការទទួលខុសត្រូវរបស់ខ្លួន អំពីបញ្ហាអសន្តិសុខដែលកំពុងតែកើនឡើងចំពោះអ្នកប្រកបវិជ្ជាជីវៈសារព័ត៌មាននៅកម្ពុជា ឡើយ។ លោកបន្តថា នៅពេលដែលកម្លាំងសន្តិសុខពុំទទួលខុសត្រូវផ្ទាល់ចំពោះការបង្កហិង្សាទៅលើអ្នកសារព័ត៌មាន ចំណែករដ្ឋាភិបាលវិញ រដ្ឋាភិបាលបែរជាពុំមានប្រតិកម្មឆ្លើយតបចំពោះការវាយប្រហារទៅលើអ្នកសារព័ត៌មានទៅវិញ។ លោកថា និទ្ទណ្ឌភាព ឬភាពគ្មានទោសពៃរ៍ នឹងរារាំងដល់ដំណើរការអភិវឌ្ឍសេរីភាពសារព័ត៌មាននៅកម្ពុជា។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានមានប្រសាសន៍នៅថ្ងៃទី៣ ឧសភា ថា លោកវាយតម្លៃខ្ពស់ចំពោះអ្នកសារព័ត៌មានដែលប្រថុយប្រថាន មិនបារម្ភអំពីសុវត្ថិភាពផ្ទាល់ខ្លួន ដើម្បីចូលរួមយកព័ត៌មានពិត ដើម្បីចែករំលែកដល់មហាជនទូទៅ។ លោកថា និន្នាការរបស់រដ្ឋាភិបាលមិនដែលយកអ្នកសារព័ត៌មានជាទិសដៅ ក្នុងការវាយប្រហារនោះទេ។ ទោះជាយ៉ាងណាក៏ដោយ មន្ត្រីនាំពាក្យរូបនេះព្យាយាមមិននិយាយឲ្យចំៗ អំពីវិធានការឆ្លើយតបរបស់រដ្ឋាភិបាល ចំពោះអ្នកបង្ក្រាបលើអ្នកសារព័ត៌មានឡើយ តែលោកបែរជាណែនាំឲ្យអ្នកសារព័ត៌មានមានការប្រុងប្រយ័ត្នខ្លួនឯងទៅវិញ។
លោក ផៃ ស៊ីផាន ៖ «ខ្ញុំមិនមែននិយាយកាន់ជើងអ្នកដែលសំពងនោះទេ ក៏ប៉ុន្តែខ្ញុំមានការអាណិតអាសូរអ្នកដែលត្រូវគេសំពង អាហ្នឹងដែលជាការងាររបស់ខ្ញុំ ប៉ុន្តែអ្នកកាសែតដែលមានវិជ្ជាជីវៈ មិនដែលមានប៉ះពាល់សុវត្ថិភាពដល់ពួកគេទេ អ្នកដែលអត់មានវិជ្ជាជីវៈទេ តែងតែទទួលគ្រោះថ្នាក់ អាហ្នឹងអ្វីដែលតាមសាលាគេបង្រៀនយើងតើ»។
អង្គការការពារសេរីភាពសារព័ត៌មានហៅថា ហ្វ្រីដឹម ហៅស៍ (Freedom House) កាលពីថ្ងៃទី១ ឧសភា បានចេញរបាយការណ៍ស្ដីពីសេរីភាពសារព័ត៌មានឆ្នាំ២០១៤។ ហ្វី្រដឹម ហៅស៍ បានចាត់ទុកកម្ពុជា ក្នុងប្រភេទប្រទេសមានពណ៌ស្វាយ និងបានចំណាត់ថ្នាក់កម្ពុជា លេខ១៤៧ ដែលនេះមានន័យថា កម្ពុជា ជាប្រទេសគ្មានសេរីភាពសារព័ត៌មាននៅឡើយ។
ចំណែកឧត្តមស្នងការរងសិទ្ធិមនុស្សនៃអង្គការសហប្រជាជាតិ អ្នកស្រី ហ្វ្លាវា ផាន់សៀរី (Flavia Pansieri) ដែលទើបបញ្ចប់ដំណើរទស្សនកិច្ចមកកម្ពុជា កាលពីថ្ងៃទី២ ខែឧសភា អ្នកស្រីក៏សម្ដែងការបារម្ភចំពោះការបង្ក្រាបលើអ្នកសារព័ត៌មាន ពីសំណាក់កងសន្តិសុខសាលាខណ្ឌ។ អ្នកស្រីអះអាងថា ការប្រើប្រាស់កម្លាំងហួសហេតុនាំឲ្យមានការព្រួយបារម្ភយ៉ាងខ្លាំងពីតួនាទីរបស់ក្រុមសន្តិសុខខណ្ឌ ក្នុងការដោះស្រាយរឿងបាតុកម្ម និងសណ្ដាប់ធ្នាប់សាធារណៈ៕
No comments:
Post a Comment
yes