កម្ពុជានឹងពិនិត្យមើលផែនទីដែលបារាំងប្រកាសផ្តល់អោយ
ដោយ លាង ដឺលុច
រដ្ឋាភិបាលកម្ពុជានឹងណែនាំដល់មន្ត្រីទូតរបស់ខ្លួនប្រចាំ ទីក្រុងប៉ារីសដើម្បី ទាក់ទងស្វែងរកមើលផែនទីដែលរដ្ឋាភិបាលបារាំង ប្រកាសផ្តល់អោយសម្រាប់ជួយដោះស្រាយជម្លោះព្រំដែនកម្ពុជាថៃ។ មន្ត្រីរដ្ឋាភិបាលកម្ពុជាបានថ្លែងស្វាគមន៍ឆន្ទៈរបស់រដ្ឋាភិបាល បារាំងយ៉ាងនេះ។
រដ្ឋាភិបាលក្រុងភ្នំពេញនឹងប្រាប់ទៅឯកអគ្គរាជទូតរបស់ខ្លួនប្រចាំ ទីក្រុងប៉ារីសប្រទេស បារាំង ដើម្បីអោយមន្ត្រីទូតប្រញាប់ទាក់ទងទៅរដ្ឋាភិបាលបារាំង និងដើម្បីអាចមានលទ្ធភាពពិនិត្យមើលភ្លាមកម្រងផែនទីស្តីពីព្រំដែន កម្ពុជាថៃ ដែលបារាំងបានធ្វើរួមគ្នាជាមួយថៃកាលពី១០០ឆ្នាំមុន។ អ្នកនាំពាក្យក្រសួងការបរទេសកម្ពុជាលោកកុយ គួងបានអះអាងថា កម្ពុជាមិនអាចពន្យាពេលទៀតឡើយ ហើយត្រូវប្រមូលនូវរាល់ផែនទីដែលស្របច្បាប់ មានតម្លៃជាអន្តរជាតិស្តីពីការចែកខណ្ឌសីមាព្រំដែនកម្ពុជាថៃ។ អ្នកនាំពាក្យក្រសួងការបរទេសកម្ពុជាបានថ្លែងស្វាគមន៍ឆន្ទៈ របស់រដ្ឋាភិបាលបារាំងដែលបានប្រកាសផ្តល់ឯកសារចាំបាច់បែបនេះ។កាលពីថ្ងៃពុធទី៩កុម្ភៈម្សិលមិញ អ្នកនាំពាក្យក្រសួងការបរទេសបារាំងលោកBernard Valeroបានថ្លែងប្រាប់ទីភ្នាក់ងារសារព័ត៌មានបារាំងAFPថា រដ្ឋាភិបាលបារាំងពេញចិត្តនឹងផ្តល់ឯកសារនានា ដល់ប្រទេសណាដែលស្នើចង់បានឯកសារទាំងនោះ។ គួររម្លឹកថា នៅក្នុងសម័យកាលដែលបារាំងធ្វើជាអាណាព្យាបាលរបស់កម្ពុជា បារាំងនិងប្រទេសថៃ ដែលកាលណោះមានឈ្មោះថា សៀម បានរួមគ្នាធ្វើផែនទីគូសខណ្ឌសីមាបែងចែកទឹកដីរវាងកម្ពុជា និងសៀម។ ការគូសផែនទីកំណត់បន្ទាត់ព្រំដែនកម្ពុជាសៀមនៅឆ្នាំ១៩០៨ ត្រូវបានធ្វើឡើងក្រោមការព្រមព្រៀងគ្នាលើអនុសញ្ញា១៩០៤ និងសន្ធិសញ្ញា១៩០៧។ អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណរដ្ឋមន្ត្រីកម្ពុជា លោកទិត សុធា បានអត្ថាធិប្បាយបែបសុទិដ្ឋិនិយមថា ឯកសារផែនទីដ៏ចាំបាច់ ដែលបានមកពីប្រទេសបារាំងនិងរឹតតែធ្វើកម្ពុជាមានប្រៀបសង្កត់លើថៃ ថែមទៀត។ លោក
កុយ គួងវិញបានថ្លែងស្រដៀងគ្នាអំពីសារៈសំខាន់នៃផែនទីច្បាប់ដើមដែល បារាំងបានតំកល់ទុក។ គឺជាផែនទីដែលត្រូវបានទទួលស្គាល់ជាអន្តរជាតិដោយបារាំង កម្ពុជា និងសៀមខ្លួនឯងផ្ទាល់ផងដែរ។ បើទោះជា រដ្ឋាភិបាលថៃខិត
ខំព្យាយាមតវ៉ាដណ្តើមដីពីកម្ពុជាក៏ដោយនោះ នៅពេលនេះថ្នាក់ដឹកនាំថៃមិនបានស្វាគមន៍ការប្រកាសផ្តល់ជំនួយឯកសារ ផែនទីរបស់រដ្ឋាភិបាលបារាំងក្នុងជម្លោះព្រំដែនកម្ពុជាថៃនោះទេ៕ ប្រភពពីវិទ្យុ បារាំង អន្តរជាតិ RFI
No comments:
Post a Comment
yes