ជនភៀសសឹកដោយសារសង្គ្រាមខ្មែរ-ថៃ
ប្រឈមនឹងជំងឺ
មន្ត្រីសុខាភិបាលខ្មែរបានឲ្យដឹងថា ជនភៀសខ្លួនខ្មែរដែលកំពុងបន្តស្នាក់នៅក្នុងជំរំភៀសសឹក ចម្ងាយប្រមាណ ៩០គីឡូម៉ែត្រភាគខាងកើតពីតំបន់ប្រាសាទព្រះវិហារមួយចំនួន កំពុងមានបញ្ហាសុខភាព។ក្រុមគ្រូពេទ្យចល័តដែលកំពុងតាមពិនិត្យ និងព្យាបាលជនភៀសសឹកនៅតំបន់ស្រុកគូលែន ខេត្តព្រះវិហារ បានឲ្យដឹងថា ជនភៀសសឹកខ្លះ ដែលភាគច្រើនជាកុមារ កំពុងស្នាក់នៅក្នុងជំរំជនភៀសសឹក បានទទួលរងជំងឺគ្រុនចាញ់ ជំងឺផ្ដាសាយ និងជំងឺរាកជាបន្តបន្ទាប់។
លោក អៀម មុន្នី ជាគ្រូពេទ្យប្រចាំមណ្ឌលសុខភាពភូមិធម្មជាតិនៃស្រុកជាំក្សាន្ត ដែលបានតាមព្យាបាលជនភៀសសឹក បានមានប្រសាសន៍កាលពីព្រឹកថ្ងៃអង្គារ ទី២២ ខែកុម្ភៈថា កុមារប្រមាណពី ១០ ទៅ ១៥% បានកើតជំងឺរាកស្ទើរតែរៀងរាល់ថ្ងៃ និងមនុស្សពេញវ័យប្រមាណ ៨០% នៃចំនួនជនភៀសខ្លួន បានកើតជំងឺផ្ដាសាយដោយចម្លងពីគ្នាទៅវិញទៅមក។ ក្នុងចំណោមជនភៀសខ្លួន ខ្លះមានកើតជំងឺគ្រុនចាញ់តាំងពីពេលដែលគាត់បានរស់នៅជាប់បន្ទាត់ ព្រំដែនម្ល៉េះ។
លោក អៀម មុន្នី បន្តថា ៖ «ព្រួយបារម្ភខ្លាចតែជំងឺរាកហ្នឹងឯង ក្រែងវាកើតឡើងនៅពេលមុខទៀតហ្នឹង។ ប្រសិនជារយៈពេលយូរ ជំងឺរាកអាចនឹងកើនឡើង វាបណ្ដាលមកពីធាតុអាកាសក្ដៅ ដូចជាប្រក់តង់ប្រក់អីវាក្ដៅពេកណាស់។ ទឹកដូចអត់មានបញ្ហាអីទេ ដោយសាររដ្ឋាភិបាលយើង និងអង្គការចែកទឹកសុទ្ធបានច្រើន»។
គ្រូពេទ្យបានឲ្យដឹងថា ក្នុង១ថ្ងៃៗយ៉ាងហោចណាស់គេបានទទួលពិនិត្យ និងព្យាបាលជនភៀសសឹកពី២០០ ទៅ ៣០០នាក់។
ស្ត្រីឈ្មោះ សម ស្រីពៅ ដែលកំពុងស្នាក់នៅក្នុងជំរំជនភៀសសឹកបានមានប្រសាសន៍ថា កូនតូចរបស់គាត់បានកើតជំងឺក្ដៅខ្លួនដែលឧស្សាហ៍ទៅសុំថ្នាំ ពេទ្យជាញឹកញាប់ និងរូបគាត់ក៏ឧស្សាហ៍កើតជំងឺផ្ដាសាយជាច្រើនដងមកហើយ ចាប់តាំងពីគាត់បានចាកចោលផ្ទះទៅរស់នៅជំរំជនភៀសសឹក ៖ «គ្រាន់តែ ក្អកអត់រាកទេ ក្តៅ។ ខ្ញុំក្អកតើ! ឈឺ ២-៣ដងហើយ វាចេះតែដេកនៅនឹងដីទៅ ឈឺដៃឈឺជើង ដូចយើងធ្វើការធ្ងន់អ៊ីចឹង»។
ទោះយ៉ាងណា រដ្ឋាភិបាលខ្មែរ កាកបាទក្រហមកម្ពុជា និងអង្គការក្រៅរដ្ឋាភិបាល បានបញ្ជូនក្រុមគ្រូពេទ្យ ថ្នាំពេទ្យ និងរថយន្តពេទ្យជាច្រើនទៅប្រចាំ
ការនៅទីនោះ ដើម្បីជួយពិនិត្យ និងព្យាបាលជនភៀសសឹកជាប្រចាំ ព្រមទាំងការផ្ដល់ស្បៀងអាហារជាបន្តបន្ទាប់ផង។
ចាប់តាំងពីមានការប្រយុទ្ធគ្នាដ៏ធំរវាងទាហានខ្មែរ-ថៃ នៅតំបន់ជម្លោះព្រំដែនជិតប្រាសាទព្រះវិហារ ពីថ្ងៃទី៤ រហូតដល់ថ្ងៃទី៧ ខែកុម្ភៈ
គឺមានជនស៊ីវិលប្រមាណជាង ២.០០០គ្រួសារបានចាកចោលលំនៅឋានដែលនៅជិតៗព្រំដែនខ្មែរ-ថៃ ទៅស្នាក់នៅបណ្ដោះអាសន្នក្នុងជំរំជនភៀសសឹក ហើយរហូតមកដល់ពេលនេះ ជនភៀសសឹករាប់ពាន់គ្រួសារនៅតែបន្តស្នាក់នៅក្នុងជំរំជនភៀសសឹក នៅឡើយ ដោយមិនទាន់សម្រេចចិត្តវិលត្រឡប់ទៅលំនៅឋានវិញទេ ដោយសារពួកគេនៅមានការភ័យខ្លាចក្រែងមានការប្រយុទ្ធគ្នារវាង ទាហានខ្មែរ-ថៃ ជាថ្មីទៀត។
សម្ដេចក្រុមព្រះ នរោត្តម រណឫទ្ធិ ព្រះប្រធានគណបក្ស នរោត្តម រណឫទ្ធិ និងជាអតីតនាយករដ្ឋមន្ត្រីទី១នៃរាជរដ្ឋាភិបាលចម្រុះកម្ពុជា បានសម្ដែងប្រតិកម្មសោកស្តាយជាលើកដំបូង ចំពោះក្រុមប្រឹក្សាសន្តិសុខអង្គការសហប្រជាជាតិ ដែលព្រះអង្គថា មិនបានប្រើប្រាស់សិទ្ធិពេញលេញក្នុងការដោះស្រាយ និងបញ្ចប់ជម្លោះព្រំដែនរវាងកម្ពុជា និងថៃនោះ។
ព្រះអង្គមានបន្ទូលដូច្នេះ ៖ «ខ្ញុំមានការសោកស្ដាយណាស់ថា ក្រុមប្រឹក្សា
សន្តិសុខអង្គការសហប្រជាជាតិ លោកមិនបាននិយាយ បើសិនជាលោកចង់ឲ្យមានការដោះស្រាយជាស្ថាពរកុំឲ្យមានបញ្ហាតទៅ ទៀត លោកមានសិទ្ធិទាំងស្រុងសួរទៅតុលាការអន្តរជាតិនៃក្រុងឡាអេថា តើផែនទីនេះវាមានលក្ខណៈយ៉ាងម៉េច ជាពិសេសតំបន់ជម្លោះរវាងប្រទេសយើងទាំងពីរនេះ»។
ជម្លោះព្រំដែនកម្ពុជា-ថៃ ដែលជំរុញឲ្យមានការប្រឈមមុខដាក់គ្នាដោយប្រដាប់អាវុធជាច្រើនលើក កន្លងមកនេះ បានធ្វើឲ្យសហគមន៍អាស៊ាន និងសហគមន៍អន្តរជាតិ បង្កើនការយកចិត្តទុកដាក់ ហើយនៅក្នុងកិច្ចប្រជុំរដ្ឋមន្ត្រីការបរទេសអាស៊ាន កាលពីព្រឹកថ្ងៃទី២២ ខែកុម្ភៈនេះ គឺរដ្ឋមន្ត្រីក្រសួងការបរទេសឥណ្ឌូណេស៊ី ដែលជាប្រធានសមាគមអាស៊ាន មានគម្រោងនឹងបញ្ជូនកងទ័ពឥណ្ឌូណេស៊ី មកដាក់នៅកណ្ដាលតំបន់ជម្លោះព្រំដែនកម្ពុជា-ថៃ ដើម្បីត្រួតពិនិត្យមើលបទឈប់បាញ់គ្នាជាអចិន្ត្រៃយ៍រវាងភាគីទាំង ពីរ៕ពីវិទ្យុ អាស៊ីសេរី (ដោយ ហង្ស សាវយុត)
No comments:
Post a Comment
yes