ស្ត្រីវ័យក្មេងម្នាក់ទើបតែអាយុ១៧ឆ្នាំជាកូនពៅក្នុងត្រកូលគ្រួសារមួយ បានដាច់ចិត្តលេបថ្នាំសម្លាប់សត្វល្អិត ធ្វើអត្តឃាតទាំងខ្លួននៅក្មេងខ្ចីដោយសារតែពេលបុណ្យភ្ជុំបិណ្ឌឪពុកម្ដាយរបស់នាងទាស់ ទែងគ្នាស្ទើរបែកផ្សែងទោះបីជាមានការអន្តរាគមន៍ពីមេភូមិ មេ ឃុំក៏ដោយ។
ហេតុការណ៍នេះបានកើតឡើងកាលពីថ្ងៃទី២៨ ខែ កញ្ញាឆ្នាំ ២០១១ នៅផ្ទះរបស់នារីរងគ្រោះ ស្ថិត នៅក្នុងភូមិ ប្រាសាទ ឃុំ ជប់វ៉ារី ស្រុកព្រះនេតព្រះ ខេត្តបន្ទាយមានជ័យ។
លោក កែវ ប៊ុន យឿន អធិការនគរបាលស្រុកព្រះនេតព្រះ បានឲ្យដឹងថា ជនរងគ្រោះដែលធ្វើអត្ត ឃាតទាំងវ័យក្មេងខ្ចីនោះមានឈ្មោះ កែន ចន្នី អាយុ ១៧ឆ្នាំ រស់នៅភូមិ ឃុំ កើតហេតុខាងលើ នាងជាកូនពៅក្នុងចំណោមបងប្អូនប្រុស.ស្រីចំនួន៤នាក់។ លោក កែវ ប៊ុនយឿន បាននិយាយបន្តទៀត ថាមុនពេលកើតហេតុ នាងបានទៅជំរាបលាឪពុករបស់នាង ដែលមានទំនាស់ទាស់ទែងគ្នាជាមួយម្ដាយរបស់នាងអស់រយៈពេលជាង២ខែ មកហើយៗ អ្នកទាំង២បានចុះចេញពីផ្ទះទៅរស់នៅជាមួយបងប្អូននៅក្នុងភូមិ បើទោះជាលោកមេភូមិ និងលោក មេឃុំ ជួយ សម្របសម្រួលឲ្យត្រូវរ៉ូវគ្នាយ៉ាង ណាក៏ដោយ តែពុកម្ដាយនាងនៅតែមិនព្រមត្រូវរ៉ូវគ្នាដដែល។ លោក បានបន្តទៀតថា នៅពេលបុណ្យភ្ជុំបិណ្ឌនេះ នាងបានអង្វរម្ដាយឪពុករបស់នាងម្ដងទៀតឲ្យវិលត្រឡប់មកផ្ទះវិញដើម្បីទៅបុណ្យភ្ជុំធំជួបជុំសាច់ញាតិ ដូចជាប្រជាពលរដ្ឋផ្សេងៗទៀត តែបែរគ្មានលទ្ធផល ទើបនៅយប់នោះនាងដាច់ចិត្តគិតខ្លី ផឹកថ្នាំសម្លាប់សត្វល្អិតធ្វើអត្តឃាតខ្លួនឯងតែម្ដង។ បន្ទាប់ពេលលេបថ្នាំរួច ម្ដាយរបស់នាង និង បងប្អូន អ្នកជិតខាង នាំគ្នាយកទៅសង្គ្រោះនៅមន្ទីរពេទ្យស្រុក តែពុំមានលទ្ធផលព្យាបាល ទើបម្ដាយរបស់នាងបន្តយកទៅមន្ទីរពេទ្យមិត្តភាពកម្ពុជា.ជប៉ុន ស្រុក មង្គលបូរី តែដោយអំណាចថ្នាំជ្រាបសព្វសាច់ មិនអាចជួយសង្គ្រោះជីវិតបានឡើយ។ ក្រោយពេលនាងស្លាប់ហើយទើបម្ដាយឪពុកជួបជុំគ្នាធ្វើបុណ្យឲ្យកូន៕
ពីគេហទំព័រ៖ កម្ពុជាថ្មី
No comments:
Post a Comment
yes