ហេតុការណ៍ភ្ញាក់ផ្អើលមួយបានកើតឡើងនៅលើវិថីព្រះមុនីរ៉េតគល់ស្ពានស្ទឹងមានជ័យស្ថិតក្នុងសង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង១១ព្រឹក ថ្ងៃទី៣០ តុលា ដោយសារតែស្ត្រីម្នាក់ដែលតាមរកប្តីស្រាប់តែប្រទះឃើញបើករថយន្តបញ្ជិះស្រីផ្សេងក៏ឈរស្ទាក់ពីមុខរថយន្តដើម្បីឱ្យឈប់និយាយគ្នា ប៉ុន្តែលោកប្តីអត់ព្រមឈប់ទេ ទើបនាងសម្រេចចិត្តលោតឡើងជិះពីលើកាបូរថយន្តដែលកំពុងបើកបរទាំងប្រថុយគ្រោះថ្នាក់ ព្រោះខឹងបាត់ប្តីពីផ្ទះមួយយប់ ហើយស្រាប់តែតាមរកឃើញលោកប្តីបញ្ជិះស្រីថ្មីធ្វើព្រងើយ។
ជុំវិញរឿងរ៉ាវនេះ អ្នកយកព័ត៌មានយើងសុំធ្វើការបកស្រាយដោយមិនបញ្ចេញឈ្មោះទាំងស្រុងរបស់តួឯក តួរងក្នុងរឿងរ៉ាវនេះ ព្រោះតែគោរពសេចក្តីថ្លៃថ្នូរបុគ្គល។
តាមប្រភពព័ត៌មានជាក់ស្តែងឱ្យដឹងថា នៅព្រឹកថ្ងៃទី៣០ តុលា ស្ត្រីឈ្មោះត.គ.ល បានជិះម៉ូតូជាមួយប្អូនប្រុសដើរស្វែងរកប្តីឈ្មោះញ.ភ.រ ជាគ្រូពេទ្យដែលបាត់ពីផ្ទះមួយយប់ ហើយមិនឃើញចូលផ្ទះសោះ។ ការធ្វើដំណើរស្វែងរកប្តីបានសម្រេចដូចបំណងមែន គឺឃើញលោកប្តីដឹកស្រីផ្សេងចេញពីលំនៅឋានមួយមុខច្រកចូលវត្តដំបូកខ្ពស់ស្ថិតក្នុងសង្កាត់ផ្សារដើមថ្កូវ ខណ្ឌចំការមនក្នុងទិសដៅពីត្បូងទៅជើង។ ក្នុងស្ថានភាពបែបនេះស្ត្រីជាប្រពន្ធជិះម៉ូតូជាមួយប្អូនប្រុសវ៉ាទៅមុខរថយន្តយ៉ាងលឿនដើម្បីឃាត់ ឱ្យឈប់នៅម្តុំគល់ស្ពានស្ទឹងមានជ័យដែលមានស្នាក់ការឈរជើងរបស់សមត្ថកិច្ចនគរបាលចរាចរណ៍ដើម្បីឱ្យជួយអន្តរាគមន៍។
នៅពេលរថយន្តម៉ាកកាមរីឆ្លាមពណ៌ស្កររបស់ស្វាមីដឹកស្រីមកដល់ចំណុចគល់ស្ពានស្ទឹងមានជ័យរូបនាងក៏ឈរស្ទាក់ពីមុខជាប់។ ខណៈពេលនោះបុរសជាប្តីអត់ព្រមឈប់រថយន្តទេ គឺបន្តបើកសន្សឹមៗឆ្លងស្ពានស្ទឹងមានជ័យក្នុងទិសដៅពីជើងទៅត្បូង។ ដោយសារតែបុរសជាប្តីអត់ព្រមឈប់រថយន្ត ស្ត្រីជាប្រពន្ធសម្រេចចិត្តលោតឡើងជិះលើកាបូមុខទាំងប្រថុយគ្រោះថ្នាក់ ព្រោះតែចង់ឈ្នះចិត្តបុរសជាប្តីដែលរូបនាងគិតថាបានក្បត់នាងទៅឌុបស្រីដើរលេងថ្ងៃអាទិត្យយ៉ាងរំភើយហាក់បីដូចជាខ្លួននៅទំនេរ។
ដោយសារមានរឿងហេតុបែបនោះក្រុមសន្តិសុខសាលាសង្កាត់ស្ទឹងមានជ័យសហការជាមួយនគរបាលប៉ុស្តិ៍ស្ទឹងមានជ័យជួយស្ទាក់រថយន្តឱ្យឈប់ ដោយមានស្ត្រីម្នាក់ក្រាបនៅពីលើកាបូរថយន្តផង ហើយនាំទាំងអ្នកបើកបរទាំងអ្នកជិះជាមួយទៅកាន់ស្នាក់ការប៉ុស្តិ៍រដ្ឋបាលស្ទឹងមានជ័យដើម្បីសួរនាំ។ ស្ត្រីដែលជិះរថយន្តជាមួយប្តីគេនេះឈ្មោះញ.ភ.រ អះអាងថា រូបនាងមានប្តី និងមានកូន២ទៅហើយគ្មានរឿងពាក់ព័ន្ធស្នេហាជាមួយប្តីគេឡើយ ។ ចំពោះការជិះរថយន្តជាមួយគ្នា គឺរូបនាងសុំទៅដោយសារព្រោះត្រូវធ្វើដំណើរទៅផ្សារផ្លូវជាមួយគ្នា ។ ម្យ៉ាងទៀតពួកនាងទាំងពីរនាក់ធ្លាប់ស្គាល់គ្នាជាមិត្តភក្តិកាលពីវ័យក្មេង ។
បន្ទាប់ពីនិយាយអះអាងរួចមក ស្ត្រីជាប់ចោទឈ្មោះល.ម.ក បានទូរស័ព្ទហៅបងប្អូនឱ្យយករថយន្តម៉ាកកូរ៉ូឡាពណ៌ក្រហមទៅទទួលដល់ស្នាក់ការនគរបាលប៉ុស្តិ៍ស្ទឹងមានជ័យរួចឡើងជិះចេញទៅវិញបាត់ភ្លាមទៅ បន្ទាប់ពីឆ្លើយបំភ្លឺប្រាប់ប៉ូលិសរួច។ ចំណែកលោកញ.ភ.រ ក៏បើករថយន្តចេញពីប៉ុស្តិ៍ប៉ូលិសទៅផ្ទះវិញ។ ជាបន្ទាប់មកអស់មានភាគីប្រកែកជាមួយទើបស្ត្រីជាប្រពន្ធជិះម៉ូតូជាមួយប្អូនប្រុសត្រឡប់ទៅផ្ទះវិញដែរ។
គេពុំដឹងថា មានអ្វីកើតឡើងនៅពេលប្តី ប្រពន្ធនោះទៅដល់ផ្ទះវិញទេ ប្រហែលឆេះដុំហុយផ្សែងទ្រលោមមិនខានទេមើលទៅ... ៕
ពីគេហទំព័រ៖ កោះសន្តិភាព
No comments:
Post a Comment
yes