ក្មេងស្រីក្រោមអាយុ៥នាក់ក្នុងចំណោមស្រ្តីចំនួន២៦នាក់ត្រូវ បានជួយសង្គ្រោះពីក្រុមហ៊ុនជ្រើសរើសពលករដោយកងរាជអាវុធហត្ថ រាជធានីនិងកងរាជអាវុធហត្ថខណ្ឌសហការជាមួយអង្គការក្រៅ រដ្ឋាភិបាល កាលពីល្ងាចម្សិលមិញក្នុងសង្កាត់ទឹកថ្លា ខណ្ឌសែនសុខ។
លោក គិត សុផល មេបញ្ជាការកងរាជអាវុធហត្ថខណ្ឌសែនសុខ បានថ្លែងពីម្សិលមិញថា យើងបានជួយសង្គ្រោះមនុស្សចំនួន២៦នាក់ ក្នុងនោះមាន៥នាក់ជាក្មេងស្រីក្រោមអាយុដែលមានអាយុពី១៣ ទៅ១៧ឆ្នាំពីក្រុមហ៊ុនជ្រើសរើសពលករ Century Cambodia Manpower Company។
លោកថ្លែងបន្តថា៖ «យើងបានទៅពិនិត្យនៅក្រុមហ៊ុន Cambodia Manpower Company ដោយសហការជាមួយអង្គការសកម្មភាពដើម្បីកុមារ (APLE) ហើយយើងបានជួយសង្គ្រោះស្រ្តីចំនួន២៦នាក់ដែលត្រូវមេខ្យល់ បោកនាំឲ្យទៅធ្វើការនៅប្រទេសម៉ាឡេស៊ីជាស្រ្តីបម្រើតាមផ្ទះ»។
លោកថ្លែងថា៖ «យើងបានចាប់ខ្លួនមនុស្ស២នាក់ធ្វើការនៅក្រុមហ៊ុននេះ ប៉ុន្តែ យើងមានការសោកស្តាយដែលម្ចាស់ក្រុមហ៊ុនបានគេចខ្លួនបាត់។ តែយើងកំពុងស្វែងរកចាប់ខ្លួនម្ចាស់ក្រុមហ៊ុននេះ ឲ្យចូលមកដោះស្រាយករណីនេះតាមច្បាប់»។
ក្មេងស្រីក្រោមអាយុទាំងនោះបានថ្លែងថា ពួកគេត្រូវមេខ្យល់ដែលបោកប្រាស់ប្រាប់ថា ពួកគេអាចទៅធ្វើការនៅប្រទេសម៉ាឡេស៊ី ដោយកែអាយុបាន។ នេះបើតាមលោកគិតសុផលអះអាង។
លោកក៏បានបន្តថា៖ «ស្រ្តីចំនួន២៣នាក់ ក្នុងចំណោមពួកគេចង់ត្រឡប់ទៅផ្ទះវិញ ពីព្រោះគេលំបាករស់នៅក្នុងក្រុមហ៊ុន។ ពួកគេបានប្រាប់យើងថា ពួកគេមិនមានសេរីភាពពីព្រោះត្រូវគេឃុំនៅក្នុងក្រុមហ៊ុន ដែលតូចចង្អៀត និងពិបាកហូបចុក»។
លោក គិត សុផល បានឲ្យដឹងទៀតថា ពួកគេមួយចំនួនបានស្នាក់នៅក្នុងក្រុមហ៊ុនពីមួយខែទៅពីរខែមកហើយ។
លោកថ្លែងបន្តថា៖ «យើងមិនអនុញ្ញាតឲ្យម្ចាស់ក្រុមហ៊ុន រស់ដោយរួចខ្លួននោះទេ»។ លោកបានបញ្ជាក់ថា ក្រុមហ៊ុននៅបើកនៅឡើយ ពីព្រោះយើងមិនមានសិទ្ធិបិទឬព្យួរគេឡើយ ហើយព្រះរាជអាជ្ញាក៏មិនទាន់សម្រេចបិទដែរ ប៉ុន្តែក្រុមហ៊ុននេះកំពុងស្ថិតនៅក្នុងការស៊ើបអង្កេត។
លោក ឃឹម វ៉ាន់ដូ មន្រ្តីព័ត៌មាននៅអង្គការសកម្មភាពដើម្បីកុមារ បានថ្លែងពីម្សិលមិញថា យើងបានទទួលពាក្យបណ្តឹងពីម្តាយដែលបាត់កូនស្រីអាយុ១៤ឆ្នាំ ម្នាក់ តាំងពីថ្ងៃទី២៨ សីហា ហើយបន្ទាប់មកយើងបានសហការជាមួយកងរាជអាវុធហត្ថប្រឆាំងការ ជួញដូរមនុស្សរាជធានី ដើម្បីស៊ើបអង្កេតលើបណ្តឹងរបស់ស្រ្តីជាម្តាយនោះ។
ក្មេងស្រីក្រោមអាយុនិងស្រ្តីដទៃទៀត ត្រូវបានបញ្ជូនទៅបញ្ជាការដ្ឋានអាវុធហត្ថរាជធានី ដើម្បីសាកសួរនិងស្វែងរកសាច់ញាតិពួកគេឲ្យមកយកត្រឡប់ទៅ ផ្ទះវិញ៕ PS
ពីគេហទំព័រ៖ ភ្នំពេញប៉ុស្តិ៏
No comments:
Post a Comment
yes