លោកស្រីគន្ធាបូរី អតីតនាយិកាពិធីការសម្តេចអគ្គមហាធម្មពោធិសាលជា ស៊ីម ប្រធានព្រឹទ្ធសភា ដែលបង្ករឿងអាស្រូវឆបោក ឬរំលោភសេចក្តីទុកចិត្តស៊ីដាច់ប្រាក់ច្រើនរយលានដុល្លារ ត្រូវបានអនុរក្សពន្ធនាគារព្រៃស នាំយកមកកាន់សាលាដំបូងរាជធានីភ្នំពេញ កាលពីវេលាម៉ោងជាង៨ព្រឹកថ្ងៃទី៦ តុលា ២០១១ ដើម្បីប្រគល់ឱ្យលោកស្រីចាំង ស៊ីណាត ចៅក្រមស៊ើបអង្កេតសាកសួរផ្ទាល់មាត់។
គួររំលឹកថា លោកស្រីគន្ធា បូរី ត្រូវបានសមត្ថកិច្ចកងរាជអាវុធហត្ថចាប់ឃាត់ខ្លួននៅចំណុចច្រកទ្វារអន្តរជាតិចាំយាម ខេត្តកោះកុង កាលពីរសៀលថ្ងៃទី២៨ កញ្ញា ២០១១ ហើយបញ្ជូនមកកាន់រាជធានីភ្នំពេញ ភ្លាមៗ និងបន្ទាប់មកបញ្ជូនទៅឃុំខ្លួនបណ្តោះអាសន្ននៅពន្ធនាគារព្រៃ.សនាវេលាយប់ថ្ងៃដដែល បន្ទាប់ពីព្រះរាជអាជ្ញាបានធ្វើការសួរនាំជុំវិញរឿងពុករលួយដ៏ធំរួចមក។
មុនពេលចាប់ឃាត់ខ្លួន លោកស្រីគន្ធាបូរី គឺសមត្ថកិច្ចកងរាជអាវុធហត្ថបានចាប់ខ្លួនបុរសទីប្រឹក្សាសម្តេចអគ្គមហាធម្មពោធិសាល ជា ស៊ីម៣នាក់រួចមកហើយ រួមមានលោកច័ន្ទ កុសល, លោកពន្លក ហូ, លោកច័ន្ទ វណ្ណរ៉ា...លុះពេលបានចម្លើយពីអ្នកទាំង៣នេះ សមត្ថកិច្ចក៏ឈានទៅចាប់ខ្លួនលោកស្រីគន្ធា បូរី តែម្តង។ មុនការចាប់ខ្លួន លោកស្រីគន្ធា បូរី ត្រូវបានសមត្ថកិច្ចតាមស្វែងរកអស់រយៈពេល៣-៤ថ្ងៃមកហើយ ប៉ុន្តែមិនឃើញ ហើយក៏ជូនដំណឹងទៅគ្រប់ច្រកទ្វារទាំងអស់ឱ្យជួយឃាត់ខ្លួនលោកស្រីម្នាក់នេះ លុះពេលលោកស្រីធ្វើដំណើរក្នុងគោលដៅទៅកាន់ប្រទេសថៃ តាមច្រកទ្វារអន្តរជាតិចាំយាមខេត្តកោះកុង នាវេលារសៀល ក៏ត្រូវប៉ូលិសអន្តោប្រវេសន៍ឃាត់ខ្លួនតែម្តង។
លោកស្រីអតីតអ្នកមានមុខមានមាត់ ហើយបែរជាប្រែអាប់រស្មីអាប់យសម្នាក់នេះត្រូវបានចាប់ឃាត់ខ្លួនតាមដីកាបង្គាប់ឱ្យនាំខ្លួនរបស់សាលាដំបូងរាជធានីភ្នំពេញ ពីបទពាក់ព័ន្ធក្លែងបន្លំលិខិតសាធារណៈ ឆបោកប្រាក់រាប់រយលានដុល្លារអាេមរិក ជាពិសេសឆបោកប្រាក់មូលនិធិសម្តេចអគ្គមហាធម្មពោធិសាលជា ស៊ីម តែម្តង ៕
ពីគេហទំព័រ៖ កោះសន្តិភាព
No comments:
Post a Comment
yes