លោក កែវ វី នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ចំនួនអ្នកស្លាប់ដោយទឹកជំនន់ បានកើនឡើងដល់ចំនួន ១៦៧នាក់ហើយ គិតត្រឹមថ្ងៃទី០៥ ខែតុលា ឆ្នាំ២០១១។ ក្នុងនោះ ខេត្តកំពង់ចាម មានអ្នកស្លាប់ច្រើនជាងគេ រហូតដល់ ៤២នាក់ និងបន្ទាប់មកនៅខេត្តព្រៃវែង មានអ្នកស្លាប់ចំនួន ៣៩នាក់។
លោក កែវ វី បានមានប្រសាសន៍ថា អ្នកស្លាប់ដោយសារគ្រោះទឹកជំនន់នៅពេលនេះ ភាគច្រើនបណ្តាលមកពីលង់ទឹក និងខ្លះលិចទូកនៅពេលទៅមើលស្រូវស្រែ ព្រមទាំងអ្នកខ្លះទៀតត្រូវពស់ចឹកជាដើម។ អំពីរបាយការណ៍ ដែលគណៈកម្មាធិការជាតិគ្រប់គ្រងគ្រោះមហន្តរាយ ទទួលបានពីការលិចលង់ដោយគ្រោះទឹកជំនន់នៅ ១៧ ខេត្ត-រាជធានី គិតត្រឹមថ្ងៃទី០៥ ខែតុលា ឆ្នាំ២០១១ ត្រូវបាន លោក កែវ វី លើកឡើងថា ទឹកជំនន់ ទាំងជំនន់ទឹកភ្លៀង និងជំនន់ទឹកទន្លេ បានលិចសន្ទូងចំនួន ២៩៤,២៥០ហិកតា ក្នុងនោះ សន្ទូងអាចខូចខាតជាង ៨០,០០០ហិកតា។
សំណាបលិចទឹកប្រមាណ ៣៨០ហិកតា។ ដំណាំផ្សេងៗ លិចទឹកមាន ១០,៤៤៥ហិកតា។ ផ្លូវជាតិ និងផ្លូវខេត្ត លិចទឹកមានប្រវែង ១៨០ គីឡូម៉ែត្រ។ ផ្លូវលំលិចទឹកមានប្រវែង ២៩១គីឡូម៉ែត្រ។ ស្ពានលិចទឹកមាន ១៦១កន្លែង និងបាក់ច្រាំងទន្លេប្រវែង ១១.៧៨៩ម៉ែត្រ។ លោក កែវ វី បានបន្តថា ទឹកជំនន់បានប៉ះពាល់ដល់ប្រជាពលរដ្ឋសរុបចំនួន ២២៨,៨៥៥ គ្រួសារ។ ក្នុងនោះ មានប្រជាពលរដ្ឋចំនួន ២៣,០៧៤គ្រួសារ ត្រូវបានជម្លៀសចេញពីផ្ទះលិចទឹក ទៅកាន់ទីទួលសុវត្ថិភាព។ រីឯផ្ទះលិចទឹកមានចំនួន ១៦៤,៩៥៨ខ្នង និងផ្ទះខូចខាតមានចំនួន ៤៥៦ខ្នង។
ពីគេហទំព័រ៖ ព័ត៌មានសង្គម
No comments:
Post a Comment
yes