មន្ត្រីជាន់ខ្ពស់រដ្ឋាភិបាល នៅថ្ងៃទី២៥ ខែតុលា បានចាត់ទុកបណ្ដឹងរបស់ក្រុមសហមេធាវីការពារក្តីឲ្យអតីតមេដឹកនាំខ្មែរក្រហម លោក នួន ជា ថា ជារឿងកំប្លែងមិនបានការ។
ក្រុមសហមេធាវីបរទេសការពារក្ដីឲ្យលោក នួន ជា បង្ហាញកាតដល់
សន្តិសុខមុនចូលដាក់ពាក្យបណ្ដឹងនៅតុលាការរាជធានីភ្នំពេញ
កាលពីថ្ងៃ២៤ ខែតុលា ឆ្នាំ២០១១។
ការចំអករបស់មន្ត្រីរដ្ឋាភិបាលធ្វើឡើងបន្ទាប់ពីសហមេធាវីការពារក្ដីលោក នួន ជា កាលពីថ្ងៃច័ន្ទ ទី២៤ ខែតុលា បានដាក់ពាក្យបណ្តឹងនៅតុលាការដំបូងរាជធានីភ្នំពេញ ចោទប្រកាន់លោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់រដ្ឋាភិបាលមួយចំនួនផ្សេងទៀតថា បានជ្រៀតជ្រែកចូលដំណើរការសាលាក្ដីខ្មែរក្រហម។
លោក ហោ ណាំហុង រដ្ឋមន្ត្រីការបរទេសមានប្រសាសន៍ប្រាប់ក្រុមអ្នកយកព័ត៌មាននៅឯទីស្ដីការក្រសួងថា រដ្ឋាភិបាលមិនចាប់អារម្មណ៍ឆ្លើយតបទៅនឹងបណ្ដឹងសហមេធាវីលោក នួន ជា កាលពីថ្ងៃច័ន្ទ ដែលបានចោទប្រកាន់មន្ត្រីរដ្ឋាភិបាលថា បានលូកដៃចូលកិច្ចការតុលាការខ្មែរក្រហមនោះទេ៖ «នេះជាការកំប្លែងដែលយើងមិនសមនឹងឆ្លើយតបនោះទេ»។
សហមេធាវី លោក នួន ជា បានចោទប្រកាន់លោក ហ៊ុន សែន និងមន្ត្រីជាន់ខ្ពស់រដ្ឋាភិបាលមួយចំនួនថា បានរំលោភច្បាប់ក្នុងការរារាំងមិនឲ្យសាក្សីទៅបំភ្លឺនៅសាលាក្ដីខ្មែរក្រហម និងបានបង្អាក់ដំណើរការតុលាការដើម្បីនាំជនសង្ស័យមកកាត់ទោសបន្ថែម។ សហមេធាវីចាត់ទុកថា មន្ត្រីទាំងនោះបានបង្កើតនូវផែនការឧក្រិដ្ឋរួមគ្នា ដើម្បីជ្រៀតជ្រែកប្រព័ន្ធយុត្តិធម៌ និងសិទ្ធិជនជាប់ចោទ ដើម្បីទទួលបានការកាត់ទោសដោយយុត្តិធម៌។
ការចោទប្រកាន់របស់សហមេធាវី លោក នួន ជា មានលក្ខណៈស្រដៀងនឹងការចោទប្រកាន់របស់សហចៅក្រមស៊ើបអង្កេតសាលាក្ដីខ្មែរក្រហម លោក ស៊ីកហ្រី្វដ ប៊្លុង (Siegfried Blunk) ដែលបានលាលែងពីតំណែងរបស់លោកកាលពីថ្ងៃទី៩ ខែតុលា។
លោក ប៊្លុង បានបញ្ជាក់ពីមូលហេតុនៃការលាលែងរបស់លោកថា កាលពីខែឧសភា ឆ្នាំ២០១១ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអះអាងថា ប្រសិនបើតុលាការខ្មែរក្រហមចង់កាត់ក្ដីករណី ០០៣ និង ០០៤ តុលាការត្រូវតែប្រមូលអីវ៉ាន់ហើយចាកចេញពីកម្ពុជា។ ចំណែកលោក ហោ ណាំហុង ក៏បានបញ្ជាក់ថា រឿងចាប់ខ្លួនជនសង្ស័យបន្ថែមមកកាត់ទោសជារឿងរបស់រដ្ឋាភិបាលកម្ពុជា ហើយត្រូវកំណត់ដោយកម្ពុជា។ លោក ប៊្លុង បន្តថា កត្តាទាំងនេះហើយជាមូលហេតុដែលលោកមិនអាចធ្វើការដោយឯករាជ្យ និងគ្មានគំនាប។
អង្គការសហប្រជាជាតិ កាលពីថ្ងៃព្រហស្បតិ៍ ទី២០ ខែតុលា បានហាមឃាត់មន្ត្រីរដ្ឋាភិបាលមិនឲ្យនិយាយប៉ះពាល់ដល់កិច្ចការរបស់តុលាការខ្មែរក្រហម ជាពិសេសករណី ០០៣ និង ០០៤ ដែលមានជនសង្ស័យបន្ថែមចំនួន ៥នាក់ ដែលអាចនឹងត្រូវនាំខ្លួនមកកាត់ទោសបន្ថែម។
សេចក្ដីថ្លែងការណ៍របស់សាលាក្ដីខ្មែរក្រហម កាលពីថ្ងៃព្រហស្បតិ៍ បញ្ជាក់ថា មន្ត្រីផ្នែកច្បាប់ និងអគ្គលេខាធិការរងនៃអង្គការសហប្រជាជាតិ អ្នកស្រី ប៉ាទ្រីស៊ីយ៉ា អូប្រាយអេន (Patricia O’ Brien) បានប្រាប់លោក សុខ អាន រដ្ឋមន្ត្រីទីស្ដីការគណៈរដ្ឋមន្ត្រី ហាមឃាត់មិនឲ្យមន្ត្រីរដ្ឋាភិបាលធ្វើសេចក្ដីថ្លែងការណ៍ណាមួយប៉ះពាល់ដល់ដំណើរការសាលាក្ដីខ្មែរក្រហម ជាពិសេស ០០៣ និង ០០៤ និងដំណើរការយុត្តិធម៌ផ្សេងៗទៀត។ អ្នកស្រីបញ្ជាក់ថា រដ្ឋាភិបាលមានតួនាទីសហការនឹងសាលាក្ដីខ្មែរក្រហម សម្រាប់ដំណើរការកាត់ទោសជនសង្ស័យ៕
ពីវិទ្យុ អាស៊ីសេរី
No comments:
Post a Comment
yes