មន្រ្តីសាលាដំបូងក្រុងភ្នំពេញបាននិយាយថា សាលក្រមលើបណ្តឹងទាស់របស់លោក សម រង្ស៊ី ក្នុងសំណុំរឿងបរិហាកេរ្តិ៍ដែលប្តឹងដោយលោក ហោ ណាំហុង គ្រោងនឹងប្រកាសនៅថ្ងៃទី០៥ ខែតុលានេះ ត្រូវពន្យារពេលទៅថ្ងៃទី១៣ ខែតុលាវិញ ដោយសារតែចៅក្រមជាប់រវល់។
កាលពីថ្ងៃទី២២ ខែកញ្ញា សាលាដំបូងក្រុងភ្នំពេញដែលមានលោក សេង នាង ជាចៅក្រម បានបើកសវនាការលើបណ្តឹងទាស់របស់លោក សម រង្ស៊ី ប្រធានគណបក្សប្រឆាំងនៅកម្ពុជា ក្នុងសំណុំរឿងបរិហាកេរ្តិ៍ និងផ្សាយព័ត៌មានមិនពិត ដែលប្តឹងដោយលោក ហោ ណាំហុង រដ្ឋមន្រ្តីក្រសួងការបរទេសកម្ពុជា ចំពោះការចោទប្រកាន់រូបលោកជាមេគុកបឹងត្របែកក្នុងរបបខ្មែរក្រហម ប៉ុន្តែសាលក្រមត្រូវចៅក្រមសម្រេចថា នឹងប្រកាសនៅថ្ងៃទី០៥ ខែតុលានេះ។
ចំពោះសំណុំរឿងនេះ សាលាដំបូងក្រុងភ្នំពេញកាលពីថ្ងៃទី២៥ ខែមេសា ឆ្នាំ២០១១ បានប្រកាសម្តងរួចហើយ ដោយផ្តន្ទាទោសលោក សម រង្ស៊ី ឲ្យជាប់ពន្ធនាគាររយៈពេល២ឆ្នាំ និងពិន័យជាប្រាក់៨លានរៀល ក្នុងបទញុះញង់ឲ្យមានការរើសអើង ចំពោះការថ្លែងរបស់លោក សម រង្ស៊ី ឯវាលពិឃាតបឹងជើងឯកកាលពីឆ្នាំ២០០៨ថា រដ្ឋមន្រ្តីការបរទេសកម្ពុជាបច្ចុប្បន្ន គឺជាអតីតមេគុកបឹងត្របែកក្នុងសម័យខ្មែរក្រហម។
ស្របគ្នានេះ ក្រោយការសម្រេចរបស់សាលាដំបូងក្រុងភ្នំពេញពីរថ្ងៃ គឺនៅថ្ងៃទី២៧ ខែមេសា តុលាការកំពូលរបស់ប្រទេសបារាំងក៏បានសម្រេចក្នុងសំណុំរឿងដូចគ្នានេះ ដោយឲ្យលោក សម រង្ស៊ី ឈ្នះក្តីលោក ហោ ណាំហុង។
យោងទៅលើការសម្រេចរបស់តុលាការកំពូលប្រទេសបារាំងនេះ មេធាវីលោក សម រង្ស៊ី គឺលោក ជូ ជូងី បានសម្រេចដាក់ពាក្យប្តឹងទាស់ចំពោះសាលាក្រមរបស់សាលាដំបូងក្រុងភ្នំពេញ ដោយហៅការកាត់ទោសលោក សម រង្ស៊ី ថា ជាការរំលោភលើគោលការណ៍សកល៕
ពីគេហទំព័រ៖ សារព័ត៌មានសេរី
No comments:
Post a Comment
yes