សហគមន៍​​ ព្រៃឡង់ រាប់រយនាក់​ រួមគ្នា នឹងធ្វើសកម្មភាព ទប់ស្កាត់ ការកាប់ ឈើខុសច្បាប់

​​តំណាងសហគមន៍ ការពារព្រៃឡង់ចំនូន ៤ ខេត្ត រូមគ្នាគ្រោងនឹងចូល ទៅក្នុងតំបន់ព្រៃឡង់ ខេត្តកំពង់ធំ រយៈពេល ៧ថ្ងៃ ចាប់ ពីថ្ងៃទី៧ ដល់ ១៣ ខែវិចិ្ឆកា ឆ្នាំ២០១១ ដើម្បីធ្វើការ​បញ្ចេញ​សកម្មភាព ទប់ស្កាត់បទល្មើស ក្នុងការកាប់ឈើខុសច្បាប់។

សេចក្តីប្រកាស របស់មជ្ឈមណ្ឌល សិទ្ធិមនុស្សកម្ពុជា នាថ្ងៃទី០៤ ខែវិចិ្ឆកា ឆ្នាំ២០១១  បាន ដឹងថា ការចុះធ្វើសកម្មភាព របស់សហគមន៍ព្រៃឡង់ ដើម្បីចង់បានលទ្ធផល ពីការចុះបង្គ្រាបបទល្មើស មកបង្ហាញ​ជូន តំណាងរាស្រ្ត អាជ្ញាធរមូលដ្ឋាន រដ្ឋាភិបាល និង សង្គមស៊ីវិល ក្នុងវេទិកា​សាធារណៈ​មួយ រៀបចំឡើងដោយ មជ្ឈមណ្ឌលសិទ្ធិមនុស្សកម្ពុជា នៅទីលានប្រជាធិបតេយ្យ ក្នុងទីរូម​ស្រុក​សណ្តាន់ ឃុំសណ្តាន់ ភូមិសណ្តាន់ ខេត្តកំពង់ធំ នាថ្ងៃទី ១៤ ខែវិច្ឆិកា ឆ្នាំ២០១១ ម៉ោង ៨:៣០ព្រឹក។

សេចក្តីប្រកាស បានបញ្ជាក់ថា តំណាងសហគមន៍ នៅខេត្តព្រះវិហារ ក្រចះ និង ខេត្តស្ទឹងត្រែង សរុបប្រមាណ ២៥០នាក់ បានចេញដំណើរដោយថ្មើរជើង ពីខេត្តរបស់ខ្លូន ឆ្ពោះទៅតំបន់​ព្រៃឡង់​ក្នុងខេត្តកំពង់ធំ ។ ដោយឡែក តំណាងសហគមន៍ព្រៃឡង់ខេត្តកំពង់ធំ ចំនូន ៣០០នាក់ នឹងចេញ​ដំណើរពីទីរូមស្រុកសណ្តាន់ នាថ្ងៃសៅរ៍ ទី៥ ខែវិច្ឆិកា។ ពូកគាត់ ទាំងអស់គ្នានឹងជួបជុំគ្នា នៅ ដំណាក់ មៀន ចម្ងាយ ៥០គីឡូម៉ែត្រពី ស្រុកសណ្តាន់នៅថ្ងៃទី៧ ខែវិចិ្ឆកានេះ ។

បន្ទាប់ពីតំណាងសហគមន៍ព្រៃឡង់ទាំង ៤ ខេត្ត ជួបជុំគ្នាហើយពួកគេ នឹងធ្វើសកម្មភាព ចុះល្បាត នៅក្នុង តំបន់ព្រៃឡង់ ជាពិសេសនៅតំបន់ អូរច្រាក ដែលប្រជាជនក្នុងតំបន់ បានអះអាងថា ជាទី​តាំងដែលមានបទល្មើសកាប់ឈើខុសច្រើនបំផុត។

សូមបញ្ជាក់ថា កាលពីប៉ុន្មានខែមុន សហគមន៍ព្រៃឡង់មកពីខេត្តនានាចំនូន ៣០០ នាក់ បានជួបជុំ​គ្នាបួងសួងនៅព្រះដងកើ មុខព្រះបរមរាជវាំង ផងដែរដើម្បីជាការផ្ញើសារ រកដំណោះស្រាយ បន្ទាប់ពី ពូកគាត់បានព្យាយាមដាក់ពាក្យបណ្តឹង និង ស្វែងរកដំណោះស្រាយពីស្ថាប័ននានា ដែល ពាក់ព័ន្ធ រួចមក ប្រជាពលរដ្ឋសហគមន៍ព្រៃឡង់ នៅតែមិនអាចស្វែងរក ដំណោះស្រាយណាមួយ ដែលសម​ស្រប ដើម្បីការពារសម្បត្តិធម្មជាតិ ៕

ពីគេហទំព័រ៖ ដើមអំពិល