ជនរងគ្រោះពីការជះទឹកអាស៊ីដ គឺអ្នកស្រី តាត ម៉ារីណា បានទាមទារឲ្យរដ្ឋសភាសរសេរខ្លឹមសារ និងអត្ថន័យនៅក្នុងសេចក្ដីព្រាងច្បាប់ស្ដីពីការគ្របគ្រងទឹកអាស៊ីដខ្លាំងឲ្យបានច្បាស់លាស់ ប្រយោជន៍ដើម្បីដាក់ទោសឲ្យបានសមស្របដល់ជនល្មើស។
១៩-មីនា-២០១០៖ ជនរងគ្រោះដោយទឹកអាស៊ីដ អ្នកស្រី តាត ម៉ារីណា
នៅក្នុងបន្ទប់ផ្សាយរបស់វិទ្យុអាស៊ីសេរី នៅសហរដ្ឋអាមេរិក។
ការអំពាវនាវរបស់ជនរងគ្រោះដោយទឹកអាស៊ីដ គឺអ្នកស្រី តាត ម៉ារីណា បានធ្វើឡើងនៅខណៈរដ្ឋសភាកម្ពុជា កំពុងពិភាក្សាលើសេចក្ដីព្រាងច្បាប់ស្ដីពីការគ្រប់គ្រងទឹកអាស៊ីដខ្លាំង។
កាលពីថ្ងៃព្រហស្បតិ៍ ទី៣ ខែវិច្ឆិកា បន្ទាប់ពីបានដឹងថា រដ្ឋសភាកំពុងពិភាក្សាលើច្បាប់សំខាន់នេះ អ្នកស្រី តាត ម៉ារីណា អតីតតារាចម្រៀងខារ៉ាអូខេ បានទទូចឲ្យរដ្ឋសភាកម្ពុជា ចែងឲ្យបានច្បាស់នូវមាត្រាមួយចំនួន ជៀសវាងការចន្លោះប្រហោងដែលអាចធ្វើឲ្យជនដៃដល់រួចខ្លួន។
អ្នកស្រីបាននិយាយទាំងសំឡេងអួលដើមក ដោយលើកចំណុចមួយចំនួនដែលរដ្ឋសភាគួរចែងឲ្យបានស៊ីជម្រៅ នៅត្រង់នីតិវិធីនៃការដាក់ទោសដល់ជនល្មើស រួមមានការស៊ើបអង្កេតឲ្យបានហ្មត់ចត់ និងមិនត្រូវបិទសំណុំរឿងក្ដីណាមួយប្រសិនបើជនប្រព្រឹត្តល្មើសច្បាប់មិនទាន់ត្រូវបាននាំយកមកកាត់សេចក្ដីទេនោះ ហើយទោសទណ្ឌទៀតសោត ត្រូវដាក់ឲ្យដល់អតិបរមា។
អ្នកស្រី តាត ម៉ារីណា៖ «សូមកុំបិទសំណុំរឿងណាមួយដែលរកចាប់ជនល្មើសមិនទាន់បាន សូមកុំបិទ។ សូមបើករហូតដល់ចាប់ជនល្មើសបាន និងបើកសវនាការកាត់ក្ដី។ បើសិនជាសំណុំរឿងណាមិនទាន់បានទាក់ទងពីជនរងគ្រោះ សូមមេត្តាកុំបិទសំណុំរឿង សូមរង់ចាំរហូតដល់បានដំណឹងទាំងសងខាងទើបចាំយកមកកាត់ក្ដី។ អាហ្នឹងទើបបានគេហៅថា ការរកយុត្តិធម៌សម្រាប់ជនរងគ្រោះបាន។ មិនត្រូវកាត់ក្ដីដោយជនរងគ្រោះមិនបានដឹង មិនដែលបានទទួលដំណឹងអ្វីទាំងអស់»។
កាលពីថ្ងៃព្រហស្បតិ៍ ទី៣ ខែវិច្ឆិកា ឆ្នាំ២០១១ រដ្ឋសភាអនុម័តសេចក្ដីព្រាងច្បាប់ស្ដីពីការគ្រប់គ្រងអាស៊ីដខ្លាំងបានចំនួន ៣ជំពូកក្នុងចំណោម ៦ជំពូក។ សេចក្ដីព្រាងនេះមានចំនួន ៦ជំពូក និង ២៧មាត្រា ហើយរដ្ឋសភានឹងបន្តអនុម័តចំនួន ៣ជំពូកទៀត នៅថ្ងៃទី៤ ខែវិច្ឆិកា នេះ។
អ្នកស្រី តាត ម៉ារីណា ថ្លែងបន្តថា កន្លងមកតុលាការកម្ពុជា បានកាត់ក្ដីលើសំណុំរឿងរបស់អ្នកស្រីទាំងអយុត្តិធម៌ ដែលមិនអាចទទួលយកបាន៖ «ដូចជារឿងរបស់នាងខ្ញុំជាគំរូមួយដ៏អយុត្តិធម៌សម្រាប់ជនរងគ្រោះទូទៅ ដែលតុលាការលោកកាត់ក្ដីដោយអយុត្តិធម៌។ ខ្ញុំសូមសួរបើសិនអ្នកជានាងខ្ញុំវិញ តើអ្នកទទួលបានទេ? ដែលភាពយុត្តិធម៌បែបហ្នឹង ដែលតុលាការបានផ្ដល់ឲ្យ តើអ្នកទទួលបានទេ? ខ្ញុំសូមឲ្យរដ្ឋសភាបូកបន្ថែមចំណុចកន្លែងហ្នឹង»។
កាលថ្ងៃទី៥ ខែវិច្ឆិកា ឆ្នាំ១៩៩៩ ដោយសារតែរឿងស្នេហាត្រីកោណ អ្នកស្រី ឃួន សុផល ភរិយារបស់លោក ស្វាយ ស៊ីថា រដ្ឋលេខាធិការនៃទីស្ដីការគណៈរដ្ឋមន្ត្រី បានដឹកនាំបក្សពួកមួយចំនួនធ្វើការវាយប្រហារទឹកអាស៊ីដបំផ្លាញរាងកាយ និងរូបសម្ផស្សស្អាតផូរផង់របស់អ្នកស្រី តាត ម៉ារីណា ដែលកាលណោះ អ្នកស្រីមានវ័យ ១៦ឆ្នាំ ជាតារាខារ៉ាអូខេ។
នៅខែដើមខែកក្កដា ឆ្នាំ២០១១ លោក ជីវ កេង ប្រធានតុលាការក្រុងភ្នំពេញ បានថ្លែងតាមទូរទស្សន៍អប្សរារបស់គណបក្សកាន់អំណាចថា តុលាការបានកាត់សេចក្ដីសំណុំរឿងនេះរួចហើយ ដោយបានព្យួរទោសជនដៃដល់ ឃួន សុផល រយៈពេលមួយឆ្នាំ និងកំណត់ទោសសាកល្បងចំនួន ៥ឆ្នាំ ហើយថា ដំណើររកយុត្តិធម៌នេះបានបញ្ចប់សព្វគ្រប់រួចទៅហើយ។
លោក ជីវ កេង៖ «ករណីជះទឹកអាស៊ីដលើកញ្ញា តាត ម៉ារីណា នេះ ត្រូវបានតុលាការក្រុងភ្នំពេញ ធ្វើការជំនុំជម្រះចប់សព្វគ្រប់អស់ហើយ តាមសាលក្រមលេខ ៧៨.ជ ចុះថ្ងៃទី២៨ ខែធ្នូ ឆ្នាំ២០០០ ហើយសាលក្រមនេះបានចូលជាស្ថាពរទៅហើយ ហើយសម្រេចផ្ដន្ទាទោសជនល្មើសឈ្មោះ ឃួន សុផល រយៈពេលមួយឆ្នាំ ហើយព្យួរទោសដោយសាកល្បងរយៈពេល ៥ឆ្នាំ។ អ៊ីចឹងមានការអនុវត្តចប់សព្វគ្រប់អស់ហើយ»។
សាលក្រមកំបាំងមុខឆ្នាំ២០០០ របស់តុលាការក្រុងភ្នំពេញ ដែលធ្វើឡើងស្ងាត់ៗមិនឲ្យជនរងគ្រោះ និងក្រុមសិទ្ធិមនុស្សដឹងឮនោះ បានសម្រេចព្យួរទោសជនល្មើស ឃួន សុផល រយៈពេល ១ឆ្នាំ និងសាកល្បងចំនួន ៥ឆ្នាំ។ បើទោះជាពេលនោះតុលាការរកឃើញថា បុគ្គល ឃួន សុផល មានទោសក៏ដោយ ប៉ុន្តែសេចក្ដីសម្រេចព្យួរទោស និងសាកល្បងនេះ មិនបានតម្រូវឲ្យបុគ្គល ឃួន សុផល ជាប់ពន្ធនាគារឡើយ ហើយតាំងពីឆ្នាំ២០០០ រហូតមកដល់ពេលនេះ បុគ្គល ឃួន សុផល បានត្រូវរួចទោសទាំងស្រុងដោយស្វ័យប្រវត្តិ ដោយសារតែរយៈពេលសាកល្បង ៥ឆ្នាំ បានកន្លងផុតទៅហើយ ហើយជនរងគ្រោះ តាត ម៉ារីណា ក៏ពុំបានប្ដឹងតវ៉ាដោយសារមិនបានដឹងអំពីការបើកសវនាការកាត់សេចក្ដីនោះ។
ទាក់ទិនទៅនឹងការទាមទាររបស់អ្នកស្រី តាត ម៉ារីណា ដល់រដ្ឋសភាក្នុងការចែងឲ្យបានស៊ីជម្រៅហ្មត់ចត់ទៅលើការដាក់ទោសទណ្ឌជនដៃដល់ករណីជះទឹកអាស៊ីដ ដែលរដ្ឋសភាកំពុងលើកមកជជែកពិភាក្សានោះ លោក សម រង្ស៊ី ប្រធានគណបក្សជំទាស់ដែលកំពុងរស់នៅនិរទេសបានថ្លែងតាមទូរស័ព្ទពីប្រទេសឥណ្ឌូនេស៊ី (Indonesia) មកថា ច្បាប់ទាំងឡាយនៅកម្ពុជា បានតាក់តែងឡើងយ៉ាងល្អ ប៉ុន្តែខ្វះខាតក្នុងការអនុវត្តសម្រាប់យុត្តិធម៌ពិតប្រាកដ ដូចជាករណីអ្នកស្រី តាត ម៉ារីណា ជាឧទាហរណ៍ស្រាប់។
លោក សម រង្ស៊ី៖ «ជនរងគ្រោះដែលយើងចងចាំទាំងអស់គ្នា គឺកញ្ញា តាត ម៉ារីណា គឺមានភរិយារបស់អ្នកមានអំណាចដែលជាសមាជិករបស់រដ្ឋាភិបាលធ្វើការនៅទីស្ដីការគណៈរដ្ឋមន្ត្រី គឺគេមានអង្គរក្សគេមកចាប់នាងនោះធ្វើបាបចាក់ទឹកអាស៊ីដ ឥឡូវនេះនាងនោះរងគ្រោះធ្ងន់ធ្ងរ ចាកចេញពីប្រទេស ប៉ុន្តែគាត់នឹងមិនអាចមានជីវិតរស់នៅដូចមុនទៀតទេ មានតែការលំបាកអស់មួយជីវិត។ តែទីបញ្ចប់រហូតមកទល់នឹងថ្ងៃនេះ ពេលនេះ យើងដឹងទាំងអស់គ្នាហើយថា ភរិយារបស់សមាជិករដ្ឋាភិបាលរូបនោះ មិនបានជាប់ទោសពៃរ៍អ្វីទាល់តែសោះ»។
ក្រុមអ្នកឃ្លាំមើលអំពីការគោរពសិទ្ធិមនុស្ស និងនីតិរដ្ឋនៅកម្ពុជា បានផ្ដល់អនុសាសន៍ដល់សមត្ថកិច្ចខ្មែរថា ត្រូវតែធ្វើការធានាឲ្យបានហ្មត់ចត់ក្នុងការរកយុត្តិធម៌ពិតប្រាកដជូនដល់ជនរងគ្រោះ ហើយមិនត្រូវស្ថិតក្រោមឥទ្ធិពលរបស់អ្នកមានអំណាចក្នុងការបិទបាំងជនដៃដល់នោះឡើយ៕
ពីវិទ្យុ អាស៊ីសេរី
No comments:
Post a Comment
yes