នៅព្រឹកថ្ងៃទី១ ខែវិច្ឆិកា ឆ្នាំ២០១១នេះ ប្រជាពលរដ្ឋទំនាស់ដីធ្លី នៅភូមិឃ្លាំងលើ បាននាំគ្នាមកតវ៉ានៅមុខសាលាខេត្តព្រះសីហនុ ប៉ុន្តែជាលទ្ធផល នៅមិនទាន់ដឹងនៅឡើយទេ បន្ទាប់ពីប្រជាពលរដ្ឋទាំងនោះមានទំនាស់ដីធ្លីដ៏រ៉ាំរ៉ៃ ជាមួយលោក ចាន់ កាំង កាលពីព្រឹកថ្ងៃទី៣០ ខែតុលា ឆ្នាំ២០១១ ហើយឈានដល់ការធ្វើបាតុកម្មបិទផ្លូវជាតិលេខ៤ ធ្វើឲ្យកកស្ទះចរាចរណ៍ជាង ៤ម៉ោង ។
ប្រជាពលរដ្ឋប្រមាណជិត ១០០ គ្រួសារ នៅតែមានជំនឿរបស់ខ្លួនថា អាជ្ញាធរខេត្តព្រះសីហនុពិតជាអាចដោះស្រាយបាន ចំពោះជម្លោះដីធ្លីដ៏រ៉ាំរ៉ៃនេះ ប្រសិនបើអាជ្ញាធរខេត្តបានអនុវត្តគោលនយោបាយឈ្នះឈ្នះ របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី នៃព្រះរាជាណាចក្រកម្ពុជា ។
តំណាងប្រជាពលរដ្ឋម្នាក់បាននិយាយថា ពួកគេមកជួបជុំគ្នានៅមុខសាលាខេត្តព្រះសីហនុ នៅពេលព្រឹកថ្ងៃទី១ ខែវិច្ឆិកានេះបន្តទៀត គឺតាមការសន្យារបស់លោក សំ សំអាត អភិបាលរងខេត្តព្រះសីហនុ ដែលបានសន្យាថា ជួយដោះស្រាយរកយុត្តិធម៌ជួនពួកគាត់នៅព្រឹកនេះ ហើយការសន្យានោះ គឺបានធ្វើឡើងកាលពីព្រឹកថ្ងៃទី៣០ ខែតុលា ឆ្នាំ២០១១ នៅចំណុចធ្វើបាតុកម្មអហិង្សាបិទផ្លូវជាតិលេខ៤ មុខសាលាបឋមសិក្សាហ៊ុនសែនឃ្លាំងលើ ។
ដូចនេះ ពួកគាត់ត្រូវតែមកតាមការសន្យា តែលទ្ធផលនោះ មិនទាន់ដឹងនៅឡើយទេ ។
នៅព្រឹកដដែលនេះ មន្ត្រីសាលាខេត្តព្រះសីហនុបានប្រាប់ទៅប្រជាពលរដ្ឋថា ឲ្យពួកគាត់យកពាក្យតវ៉ាទៅដាក់នៅសាលាដំបូងខេត្តព្រះសីហនុវិញ ដើម្បីងាយស្រួលធ្វើការចរចាគ្នា ៕
No comments:
Post a Comment
yes