កាលពីរាត្រីថ្ងៃទី១៦ វិច្ឆិកា វេលាម៉ោង៧និង៣៥នាទី ចោរមួយក្រុមមានគ្នា៣នាក់ ស្លៀកខោខ្លី ប្រដាប់ដោយព្រនង់ម្នាក់មួយបានចូលទៅប្លន់ដល់ក្នុងកុដិចៅអធិការវត្តប្រាសាទ ស្ថិតក្នុងភូមិប្រាសាទ ឃុំប្រាសាទ ស្រុកកំពង់ត្របែក យកបានប្រាក់កឋិនទានដែលទើបតែដង្ហែចូលកាលពីថ្ងៃទី១៥ វិច្ឆិកា ចំនួនជាង១០លានរៀល ទូរស័ព្ទចំនួន៣គ្រឿង និងម៉ូតូឌ្រីមស៊េរីឆ្នាំ២០១១ មួយគ្រឿងទៀត។
ចៅអធិការវត្តព្រះនាម ស៊ូ សុវណ្ណ ព្រះជន្ម២៧ឆ្នាំ ដែលរងគ្រោះ មានថេរដីកាឱ្យដឹងថា នៅយប់នោះក្នុងវត្តមានសង្ឃគង់នៅតែ៣អង្គប៉ុណ្ណោះ ក្រៅពីនេះលោកនិមន្តចេញទៅក្រៅអស់ ។ នៅពេលម៉ោង៧និង៣៥នាទីព្រះអង្គក៏និមន្តចូលទៅក្នុងកុដិដើម្បីអុចជធូបទៀន សូត្រធម៌ ថ្វាយបង្គំព្រះដូចសព្វដង ។ កំពុងតែធ្មេចភ្នែកស្មិងស្មាធិ៍សូត្រធម៌ស្រាប់តែពួកចោរមានគ្នា៣នាក់ស្ទុះចូលមកពីក្រោយវ៉ៃ២ទៅ៣ព្រនង់ចំកញ្ចឹង.ក ស្មា និងខ្លួន ហើយពួកចោរក៏បានបញ្ជាឱ្យក្រាបចុះ ។ ព្រះចៅអធិការមានថេរដីកាបន្តថា ព្រះអង្គភ័យនិងភ្ញាក់ផងនិងនឹកស្មានមិនដល់ថាមានហេតុភេទបែបនេះកើតឡើងទេ ក៏ធ្វើតាមបញ្ជា ។ ពេលនោះក្រុមចោរក៏ស្រាយវត្ថពន្ធចង្កេះយកមកចងដៃទៅក្រោយ រួចឱ្យសឹងផ្កាប់មុខដើម្បីឱ្យបក្សពួក២នាក់ទៀតរុករើកកាយរកប្រាក់ដែលព្រះអង្គទុកដាក់ក្នុងហឹបចាក់សោជាប់នោះ ។ ពួកចោរបានលូកយកសោពីក្នុងថង់យាមដែលដាក់លើគ្រែ ។ លុះចាក់សោរួចក៏បើកហឹបយកប្រាក់ទៅទាំងអស់ ហើយក្រឡេកឃើញទូរស័ព្ទរបស់ព្រះអង្គនិងរបស់កូនសិស្សដែលខ្លះផ្ញើសាកថ្ម ខ្លះមិនបានយកទៅតាមខ្លួនដោយរវល់ចុះទៅរៀននៅឯក្នុងភូមិ ត្រូវក្រុមចោរប្រមូលយកហ្មត់ ។
ព្រះតេជគុណបន្តទៀតថា ក្រោយពីក្រុមចោរប្រមូលយកបានទាំងប្រាក់ហើយ ក៏រកឃើញសោម៉ូតូក្នុងថង់យាមក៏យកទៅចាក់សោ.ករួចនាំគ្នាជិះចេញវឹងបាត់ស្រមោល។
ក្រោយពីក្រុមចោរចេញអស់ទៅព្រះចៅអធិការបានខិតខំរើបំរះទាល់តែរបូតចំណងដៃទើបស្រែកហៅកូនសិស្សលោកឱ្យដឹងឮ ។ ក្រោយពីសិស្សសាលានិងភិក្ខុសង្ឃ៣អង្គទៀត បានដឹងហើយ ខ្លះក៏រត់ទៅប្តឹងមេភូមិ មេឃុំ និងប៉ូលិសប៉ុស្តិ៍រដ្ឋបាលប្រចាំឃុំប្រាសាទភ្លាមៗក្រែងអាចធ្វើអន្តរាគមន៍ចាប់ក្រុមចោរបាន ។ មន្ត្រីប៉ូលិស មានអធិការនគរបាលស្រុកកំពង់ត្របែក លោកអ៊ុំំ ចំរើន បានខិតខំស្វែងរកមុខសញ្ញាក្រុមចោរជាបន្ទាន់ដែរតែដានចោរនោះនៅមិនទាន់រកឃើញឬមានការសន្និដ្ឋានពីមុខសញ្ញានៅឡើយទេ។
អំពើប្លន់គួរឱ្យថ្កោលទោសនេះត្រូវបានមជ្ឈដ្ឋាននានាវាយតម្លៃថា បើគ្មានរនុកក្នុងទេ ខ្មោចក្រៅមិនហ៊ានប្រថុយស្បែកបែបនេះឡើយ ៕
កោះសន្តិភាព
No comments:
Post a Comment
yes