មន្ត្រីអង្គការការពារសិទ្ធិមនុស្ស បានស្នើសុំឲ្យតុលាការទម្លាក់ចោលការចោទប្រកាន់ និងដោះស្រាយការទាមទាររបស់ពលរដ្ឋនៅតំបន់បឹងកក់ ទៅតាមការកំណត់អនុក្រឹត្យរបស់លោកនាយករដ្ឋមន្រ្តី ហ៊ុន សែន ដែលបានផ្ដល់ដីមួយចំនួនឲ្យពលរដ្ឋ។
អង្គការឃ្លាំមើលសិទ្ធិមនុស្សអន្តរជាតិ (Amnesty International) បានទាមទារឲ្យអាជ្ញាធរក្រុងភ្នំពេញ ទម្លាក់ចោលការចោទប្រកាន់ដែលមានចរិតនយោបាយប្រឆាំងនឹងស្ត្រីសកម្មជន ដែលបានតស៊ូមតិការពារដីតំបន់បឹងកក់ ចំនួន ៤រូប ជាបន្ទាន់ ពីព្រោះការចោទប្រកាន់នេះមានបំណងចង់បំបិទមាត់ការតវ៉ាស្របច្បាប់របស់ពលរដ្ឋបឹងកក់។
សាលាដំបូងរាជធានីភ្នំពេញ កាលពីថ្ងៃអង្គារ ទី២៩ ខែវិច្ឆិកា បានសម្រេចដោះលែងស្ត្រីអ្នកភូមិបឹងកក់ ចំនួន ៤រូប ប៉ុន្តែនៅរក្សាការចោទប្រកាន់ពួកគេពីបទជេរប្រមាថ និងការរារាំងប្រឆាំងនឹងអាជ្ញាធរ។ ការដោះលែងនេះធ្វើឡើងបន្ទាប់ពីអាជ្ញាធរក្រុងភ្នំពេញ បានចាប់ឃាត់ខ្លួនស្ត្រីអ្នកភូមិ បឹងកក់ កាលពីថ្ងៃច័ន្ទ ក្នុងការតវ៉ាទាមទារកម្មសិទ្ធិដីនៅតំបន់បឹងកក់។
សកម្មជនដែលត្រូវចាប់ខ្លួន រួមមានលោកស្រី ទេព វន្នី លោកស្រី បូ ឆវី លោកស្រី ហេង មុំ និងលោកស្រី តុល ពៅ។ មុនការនាំខ្លួនទៅកាន់តុលាការ ពួកគេត្រូវបានសមត្ថកិច្ចឃុំខ្លួនក្នុងមន្ទីរឃុំឃាំងជាបណ្ដោះអាសន្នមួយ ដោយមិនអនុញ្ញាតឲ្យមានមេធាវីសម្រាប់ជំនួយផ្នែកច្បាប់ និងការព្យាបាលរបួស។
នាយកអង្គការ Amnesty International សម្រាប់កម្មវិធីអាស៊ី ប៉ាស៊ីហ្វិក លោក សម ហ្ស៊ារ៉ីហ្វ៊ី (Sam Zarifi) ចាត់ទុកថា ការចោទប្រកាន់នេះគឺជាការកំណត់មុខសញ្ញាប្រឆាំងនឹងសកម្មជនការពារដីធ្លីមិនឲ្យការពារប្រយោជន៍សហគមន៍របស់ពួកគេ។
លោកបន្តទៀតថា ការចោទប្រកាន់នេះជានិន្នាការមួយនៅកម្ពុជា ដែលបច្ចុប្បន្ននេះលទ្ធភាព ឬសេរីភាពនៃការពិភាក្សាស្របច្បាប់កាន់តែរួមតូចៗទៅ។
លោកបន្តទៀតថា ការចោទប្រកាន់នេះជានិន្នាការមួយនៅកម្ពុជា ដែលបច្ចុប្បន្ននេះលទ្ធភាព ឬសេរីភាពនៃការពិភាក្សាស្របច្បាប់កាន់តែរួមតូចៗទៅ។
លោក អំ សំអាត មន្ត្រីអង្កេតរបស់អង្គការសិទ្ធិមនុស្សលីកាដូ កាលពីថ្ងៃអង្គារ ទី២៩ ខែវិច្ឆិកា ក៏បានសំដែងការសោកស្ដាយចំពោះការសម្រេចចិត្តរបស់តុលាការរាជធានីភ្នំពេញ និងអាជ្ញាធរដែលបានចោទប្រកាន់ស្ត្រីអ្នកភូមិបួននាក់ ពីបទល្មើសព្រហ្មទណ្ឌ បន្ទាប់ពីពួកគេបានចូលរួមតវ៉ាទាមទារសិទ្ធិកាន់កាប់ដីនៅតំបន់បឹងកក់រួចមក។
លោកបន្តថា ប្រសិនបើតុលាការរកឃើញអ្នកទាំងបួននាក់មានទោសក្នុងសវនាការ ពួកគេអាចប្រឈមមុខនឹងការជាប់ពន្ធនាគាររយៈពេល ១ឆ្នាំ និងពិន័យជាប្រាក់ប្រមាណ ២លានរៀល។
លោក អំ សំអាត បន្ថែមទៀតថា ការគំរាមរបស់អាជ្ញាធរ និងតុលាការ មិនអាចរារាំងពលរដ្ឋបឹងកក់មិនឲ្យបន្តតវ៉ាបន្ថែមទៀតនោះទេ ដោយសារពួកគេកំពុងប្រឈមនឹងការបាត់បង់ផ្ទះសម្បែង។
កាលពីថ្ងៃច័ន្ទ ប៉ូលិស និងមន្ត្រីសន្តិសុខ បានប្រើប្រាស់កម្លាំងបំបែកក្រុមបាតុករប្រមាណ ៥០នាក់ ភាគច្រើនជាស្ត្រីភេទ ដែលបានតវ៉ាទាមទារកម្មសិទ្ធិដីធ្លីនៅតំបន់បឹងកក់។ យ៉ាងហោចណាស់ក៏មានបាតុករប្រមាណ ៦នាក់ ត្រូវបានវាយឲ្យរងរបួស និងបាតុករចំនួន ២នាក់ផ្សេងទៀតចង់ធ្វើអត្តឃាត។
រដ្ឋាភិបាលកាលពីឆ្នាំ២០០៧ បានសម្រេចផ្ដល់សិទ្ធិជាដីសម្បទានទៅក្រុមហ៊ុនស៊ូកាគូ ដើម្បីអភិវឌ្ឍន៍តំបន់នោះ។ ចាប់តាំងពីការអភិវឌ្ឍនៅតំបន់នោះមក ពលរដ្ឋក្នុងតំបន់បឹងកក់ប្រមាណ ៤ពាន់គ្រួសារ ត្រូវបានជម្លៀសដោយបង្ខំពីតំបន់នោះ។
កាលពីខែសីហា ឆ្នាំ២០១១ បន្ទាប់ពីធនាគារពិភពលោកបានគំរាមផ្ដាច់ជំនួយជាប្រាក់កម្ចីទាំងស្រុង នៅកម្ពុជា លោកនាយករដ្ឋមន្ត្រី ហ៊ុន សែន បានសម្រេចកាត់ដីទំហំ ១២,៤៤ហិកតារ ឲ្យពលរដ្ឋចំនួន ៧៧៩គ្រួសារ ប៉ុន្តែអាជ្ញាធរក្រុងភ្នំពេញ បានបដិសេធមិនផ្ដល់ដីឲ្យពលរដ្ឋមួយចំនួន ដោយអះអាងថា ពួកគេគ្មានភស្តុតាងជាម្ចាស់កម្មសិទ្ធិ។
អង្គការការពារសិទ្ធិមនុស្សបានទាមទារឲ្យតុលាការទម្លាក់ការចោទប្រកាន់ ហើយស្វែងរកកិច្ចសន្ទនារវាងអ្នកភូមិ និងក្រុមអាជ្ញាធរ ដើម្បីដោះស្រាយការទាមទាររបស់អ្នកភូមិ។ មន្ត្រីសិទ្ធិមនុស្សក៏បានស្នើសុំឲ្យអាជ្ញាធរផ្ដល់សិទ្ធិកាន់កាប់ដីធ្លីឲ្យពលរដ្ឋបឹងកក់ ដើម្បីគោរពទៅតាមអនុក្រឹត្យនាយករដ្ឋមន្រ្តី ហ៊ុន សែន ដែលបានសម្រេចកាត់ដីទំហំ ១២,៤៤ហិកតារ ឲ្យពលរដ្ឋបឹងកក់៕
អាស៊ីសេរី
No comments:
Post a Comment
yes