រូបពីស្ដាំ៖ លោក ប៉ែន វ៉ាណូ ប្រធានស្ដីទីគណបក្សសង្គមយុត្តិធម៌
លោក ក្រវ៉ាញ ដារ៉ន ប្រធានគណបក្សខ្មែរឈប់ក្រ និងលោក ថោង សុវណ្ណារ៉ា
ប្រធានគណបក្សសង្គមប្រជាធិបតេយ្យ នៅក្នុងពិធីចុះហត្ថលេខា
ចងសម្ពន្ធភាពគ្នាកាលពីថ្ងៃ៧ ធ្នូ ឆ្នាំ២០១១។
គណបក្សនយោបាយចំនួន៣ បានចុះហត្ថលេខាចងសម្ព័ន្ធមិត្តជាមួយគ្នា នៅថ្ងៃទី៧ ខែធ្នូនេះ ដើម្បីពង្រឹងយុទ្ធសាស្ត្រនយោបាយមួយថ្មី។
មន្ត្រីតំណាងបក្សទាំងបីហៅការចងសម្ព័ន្ធមិត្តគ្នានោះថា ដើម្បីកែប្រែលទ្ធិប្រជាធិបតេយ្យក្លែងក្លាយក្នុងសង្គមខ្មែរបច្ចុប្បន្ន ឲ្យក្លាយទៅជាប្រទេសដែលប្រកាន់របបនយោបាយមួយតាមបែបលទ្ធិប្រជាធិបតេយ្យពិតប្រាកដ។
គណបក្សនយោបាយទាំង៣ គឺបក្សសង្គមយុត្តិធម៌ បក្សខ្មែរឈប់ក្រ និងបក្សសង្គមប្រជាធិបតេយ្យ បានសម្រេចចងសម្ពន្ធភាពជាមួយគ្នានៅថ្ងៃទី៣ ធ្នូ ឆ្នាំ២០១១ ដោយបានបង្កើតស្ថាប័នសម្រាប់ធ្វើការរួមគ្នាមួយ ដោយដាក់ឈ្មោះជាផ្លូវការថា «គណៈកម្មាធិការជាតិដើម្បីសម្ពន្ធភាព»។
នៅក្នុងសន្និសីទកាសែតដែលធ្វើឡើងនៅបន្ទប់ផ្ទះល្វែងដ៏ចង្អៀតមួយ ដែលមានអង្គរក្សពីរបីនាក់ពាក់វ៉ែនតាកញ្ចក់ខ្មៅ មានទឹកមុខមាំឈរយាមឆ្វែងស្ដាំ ក្នុងសង្កាត់ស្ទឹងមានជ័យ រាជធានីភ្នំពេញ ថ្ងៃទី៧ ធ្នូ នេះ តំណាងបក្សទាំងបីបានថ្លែងប្រាប់អ្នកកាសែតអំពីអត្ថន័យនៃការចងសម្ពន្ធភាពនេះថា ជាគំរូសម្រាប់បក្សនយោបាយបាយដទៃទៀត ដែលមាននិន្នាការប្រកាន់យករបបលទ្ធិប្រជាធិបតេយ្យនៅក្នុងប្រទេសកម្ពុជា។
លោក ក្រវ៉ាញ ដារ៉ន ប្រធានបក្សខ្មែរឈប់ក្រ ដែលបានវោហារជាងមេបក្សពីរទៀតនោះ បានរិះគន់អ្នកនយោបាយសព្វថ្ងៃនេះថា ជាអ្នកនយោបាយមិនមានអាជីព និងមិនមែនអ្នកស្នេហាជាតិពិតប្រាកដទេ ព្រោះថា អ្នកនយោបាយចេះតែឌឺដង ផ្លែផ្កាដាក់គ្នា និងជួនកាលជេរប្រទេចដាក់គ្នាទៅវិញទៅមកទៀតផង។
ជាងនេះទៅទៀតនោះ លោក ក្រវ៉ាញ ដារ៉ន រិះគន់ថា របបនយោបាយរបស់រដ្ឋាភិបាលបច្ចុប្បន្នថា មិនបានប្រកាន់យករបបលទ្ធិប្រជាធិបតេយ្យពិតប្រាកដដែរ លោកថា លទ្ធិប្រជាធិបតេយ្យពិតប្រាកដនោះ គឺប្រជាធិបតេយ្យនៅប្រទេសអាមេរិក៖ «ខ្ញុំចង់យកគ្រាប់ពូជនោះ គ្រាប់ពូជប្រជាធិបតេយ្យយកមកដាក់ក្នុងថ្នាលដ៏បវរនៃប្រទេសយើង ដែលយើងទាំងអស់គ្នាកំពុងរង់ចាំ អ្វីដែលជាអ្នកដឹកនាំល្អ អ្វីជាការជឿនលឿនបែបសហរដ្ឋអាមេរិក។ យើងនឹងមិននាំគ្នាស្ថិតនៅក្រោមការគ្រប់គ្រងរបស់ចិន របស់យួនតទៅទៀតទេ។ អ្វីដែលលោកបានស្គាល់សហរដ្ឋអាមេរិក អស់លោកនឹងមានការប្រែប្រួលហើយ»។
សម្ព័ន្ធមិត្តបក្សនយោបាយពីរទៀតក៏បានរិះគន់មេដឹកនាំបក្សនយោបាយដ៏ទៃៗទៀត និងរដ្ឋាភិបាលដូចគ្នាដែរ។
លោក ប៉ែន រ៉ាណូ តំណាងបក្សសង្គមយុត្តិធម៌ ក៏បានអានសុន្ទរកថារិះគន់ការដឹកនាំរបស់រដ្ឋាភិបាលសព្វថ្ងៃដែរ៖ «បច្ចុប្បន្ននេះបើទោះបីជាមានជំនួយដ៏ច្រើនសន្ធឹកសន្ធាប់ពីមួយឆ្នាំទៅមួយឆ្នាំពីសហគមន៍អន្តរជាតិយ៉ាងណាក្ដី ក៏ប្រជាពលរដ្ឋខ្មែរមិនអាចចាកផុតបីភាពក្រីក្របានឡើយ។ បន្ថែមពីលើនេះ អំពើពុករលួយ លួចបំផ្លាញជាតិ អំពើរំលោភសិទ្ធិមនុស្ស រឹបអូសដីធ្លី បំផ្លាញព្រៃឈើ និងអំពើអយុត្តិធម៌នៅក្នុងសង្គមកាន់តែរីករាលដាលខ្លាំងឡើង»។
ទាក់ទងនឹងរឿងចងសម្ពន្ធភាពរបស់បក្សទាំងបី និងចំពោះការរិះគន់ទាំងនេះ អ្នកតាមដានស្ថានភាពនយោបាយឯករាជក្នុងស្រុកមួយចំនួនបានអធិប្បាយថា វាជារឿងធម្មតាក្នុងសង្គមនយោបាយខ្មែរសព្វថ្ងៃ នៅពេលជិតបោះឆ្នោតម្ដងៗ អ្នកនយោបាយតែងតែប្រឹងប្រែងយកប្រជាប្រិយតែរៀងៗខ្លួនដូច្នេះ ជាពិសេសបក្សនយោបាយធំៗដែលមានកៅអីនៅរដ្ឋសភា និងមានតំណែងក្នុងជួររដ្ឋាភិបាលតែងរកចំណុចខ្សោយវាយប្រហាររដ្ឋាភិបាល ចំណែកថ្នាក់ដឹកនាំរដ្ឋាភិបាលវិញ ក៏វាយបកលើប្រឆាំងដូចគ្នាដែរ ក្នុងគោលបំណងតែមួយ គឺដើម្បីទាក់ទាញអ្នកគាំទ្រសន្លឹកឆ្នោត។
លោក គល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតសេរី និងត្រឹមត្រូវនៅកម្ពុជា។ លោកបានបញ្ជាក់ថា ការចងសម្ព័ន្ធភាពរបស់បក្សនយោបាយតូចៗដែលមិនមានកៅអីក្នុងរដ្ឋសភា និងក្នុងជួររដ្ឋាភិបាលនេះ គឺជាយុទ្ធសាស្ត្រមួយល្អក្នុងការប្រមូលសំឡេងគាំទ្រដែលមានតិចដើម្បីបង្គ្រប់ចំនួនឲ្យមានកៅអីនឹងគេ។
លោក គល់ បញ្ញា៖ «ការចងសម្ព័ន្ធគ្នានេះ ជាការល្អដែរ នេះជាយុទ្ធសាស្ត្រមួយយ៉ាងសំខាន់ដែរណា។ គណបក្សដែលមិនតាន់មានសំឡេងនៅក្រុមប្រឹក្សាឃុំសង្កាត់ នៅក្នុងសភាក្ដី គេអាចពិនិត្យមើលយុទ្ធសាស្ត្រដែរ។ នេះមិនមែនរឿងកិច្ចការខាងឃោសនានយោបាយទេ តែរឿងបច្ចេកទេសក៏មានបញ្ហាដែរ។ ដូចថា គណបក្សដែលបានសន្លឹកឆ្នោតមិនគ្រប់គ្រាន់តិចៗ វាអាចសំឡេងនឹងយកទៅគណនាអាសនៈអាចអត់បាន ហើយបើសិនប្រមូលផ្ដុំសន្លឹកឆ្នោតមកនៅតែមួយ វាអាចយកមកគណនាអាសនៈអាចបានអាសនៈ»។
ក្នុងឱកាសចងសម្ពន្ធភាពនោះដែរ លោក ក្រវ៉ាញ ដារ៉ន ក៏បានប្រកាសថា លោកមិនពេញចិត្តចំពោះបណ្ដាញព័ត៌មានដែលកន្លងបានរាយការណ៍អំពីគណបក្សនយោបាយរបស់លោកដែលចាញ់ឆ្នោតក្នុងការចូលរួមប្រកួតប្រជែងបោះឆ្នោតកន្លងមក ដោយប្រើពាក្យថា គណបក្សតូច មិនមានកៅអីជាដើម។
ទោះយ៉ាងណា តំណាងបក្សទាំងបីមិនបានឆ្លើយសំណួររបស់អ្នកកាសែតដែលសួរអំពីយុទ្ធសាស្ត្រ ឬគោលនយោបាយរបស់បក្ស និងថវិកាសម្រាប់ចូលរួមបោះឆ្នោតនៅពេលខាងមុខនេះទេ។ តែបានអះអាងថា បក្សទាំងបីកំពុងប្រឹងប្រែងធ្វើការនយោបាយនៅក្រៅប្រទេសកម្ពុជា ដើម្បីកែប្រែនយោបាយរបស់ប្រទេសកម្ពុជា ដែលដឹកនាំដោយគណបក្សប្រជាជនសព្វថ្ងៃនេះ៕
អាស៊ីសេរី
No comments:
Post a Comment
yes