ភ្នំពេញ៖ នៅថ្ងៃទី២មករា ឆ្នាំ២០១២ ក្រសួងការបរទេសកម្ពុជា បានប្រកាសជាថ្មីពីកិច្ចប្រជុំថ្នាក់រដ្ឋមន្ត្រីការបរទេសអាស៊ាន ដែលនឹងធ្វើឡើងនៅខេត្តសៀមរាប រយៈពេល ៣ ថ្ងៃ នៅសប្តាហ៍ក្រោយ។ នោះគឺកម្ពុជា ត្រូវធ្វើជាម្ចាស់ផ្ទះនៃកិច្ចប្រជុំថ្នាក់រដ្ឋមន្ត្រីការបរទេស អាស៊ាន ចង្អៀត ( The Asean Foreign Ministers’ Meeting ( AMM ) Retreat ) ចាប់ពីថ្ងៃទី១០ ដល់ថ្ងៃទី១២ ខែមករា ឆ្នាំ២០១២ នៅខេត្តសៀមរាប។
សេចក្តីជូនព័ត៌មាន របស់ក្រសួងការបរទេសកម្ពុជា ចុះថ្ងៃទី២មករា ឆ្នាំ២០១២ បង្ហាញយ៉ាងខ្លីថា លោក ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា នឹងធ្វើជាប្រធាននៃកិច្ចប្រជុំ ថ្នាក់រដ្ឋមន្ត្រីការបរទេសអាស៊ានចង្អៀតរយៈពេល ៣ ថ្ងៃ ចាប់ពីថ្ងៃទី១០មករា ឆ្នាំ២០១២ នៅខេត្តសៀមរាបនោះ។
សេចក្តី ជូនព័ត៌មាន ដែលមានខ្លឹមសារដូចគ្នានឹងសេចក្តីជូនព័ត៌មាន កាលពីថ្ងៃទី២៣ធ្នូ ឆ្នាំ២០១១ ក៏បានលើកឡើងថា អ្នកសារព័ត៌មាន ដែលមានបំណងចូលរួមយកព័ត៌មាន ក្នុងកិច្ចប្រជុំថ្នាក់រដ្ឋមន្ត្រីការបរទេសអាស៊ាន ចង្អៀត នៅសប្តាហ៍ក្រោយ អាចុះឈ្មោះតាមគេហទំព័រ www.asean2012.mfa.gov.kh ឬក៏អាចមកចុះឈ្មោះ នៅនាយកដ្ឋានព័ត៌មាន និងឯកសារ នៃក្រសួងការបរទេស និងសហប្រតិបត្តិការអន្តរជាតិ ចាប់ពីថ្ងៃជូនព័ត៌មាននេះ រហូតដល់ថ្ងៃទី៥ ខែមករា ឆ្នាំ២០១២។
លោក កៅ គឹមហួន រដ្ឋលេខាធិការក្រសួងការបរទេស ដែលទទួលបន្ទុកកិច្ចការអាស៊ាន បានឲ្យដឹងថា កិច្ចប្រជុំថ្នាក់រដ្ឋមន្ត្រីការបរទេសអាស៊ានចង្អៀតនោះ នឹងពិភាក្សាលម្អិតពីបញ្ហាមួយចំនួន ទាក់ទងនឹងបញ្ហាសេដ្ឋកិច្ច បញ្ហាសន្តិសុខតំបន់ និងការកសាងសហគមន៍អាស៊ាន នៅឆ្នាំ២០១៥។
លោក កៅ គឹមហួន បានបន្ថែមថា កិច្ចប្រជុំថ្នាក់រដ្ឋមន្ត្រីការបរទេសអាស៊ាន ដែលកម្ពុជា ធ្វើជាម្ចាស់ផ្ទះនោះ ក៏នឹងពិភាក្សាលម្អិតលើបញ្ហាមួយចំនួនរបស់អាស៊ាន ដែលសេសសល់មិនទាន់សម្រេច ក្នុងកិច្ចប្រជុំនៅកោះបាលីផងដែរ ៕
KMN-Radio
No comments:
Post a Comment
yes