ខេត្តកំពង់ស្ពឺ ៖ អំពើមនុស្សឃាតដ៏សាហាវមួយបានកើតឡើងទៅលើគ្រួសាររបស់ជនជាតិបារាំង គឺបុរសជាឪពុកម្នាក់ និងកូន៤នាក់ប្រុស២ ស្រី២ សរុបទាំងអស់ចំនួន៥នាក់ ពុំមាននរណាម្នាក់អាចគេចផុតពីសេចក្តីស្លាប់បាននោះទេ ពោលគឺឃាតកសម្លាប់ដាក់ក្នុងរថយន្តទាំងអស់គ្នា រួចហើយរុញទម្លាក់ចូលទឹកស្រះ ក្រោយផ្ទះយ៉ាងអាថ៌កំបាំង រហូតដល់ជិត៥ខែ ទើបបែកធ្លាយ បន្ទាប់ពីអ្នកដើរបាញ់សត្វស្លាប និងរកកង្កែបប្រទះឃើញដំបូលរថយន្តក្នុងទឹកស្រះនោះ ។
ការប្រទះឃើញសពគ្រួសាររងគ្រោះជនជាតិបារាំងទាំងនេះ គឺកាលពីវេលាម៉ោង៧ព្រឹកថ្ងៃទី១៤ មករា ២០១២ នៅភូមិទួលធ្នង់ សង្កាត់រកាធំ ក្រុងច្បារមន បានបង្កឱ្យមានការភ្ញាក់ផ្អើលឈូឆររត់ទៅមើលសាកសពគ្រួសារបារាំងដែលបានបាត់ខ្លួនតាំងពីថ្ងៃទី១៤ កញ្ញា ២០១១ រហូតមកដល់ថ្ងៃទី១៤ មករា ២០១២ ទើបអ្នកភូមិម្នាក់ដែលដើរទៅទាក់លលកខាងលិចផ្ទះបារាំងក្បែរស្រះជីកធំមួយក្នុងដីឡូត៍កម្មសិទ្ធិបារាំងនោះ មានទំហំ១០ម៉ែត្រគុណ៣០ម៉ែត្រ ជម្រៅប្រមាណពី៣ម៉ែត្រទៅ៤ម៉ែត្រ ប្រទះឃើញដំបូលរថយន្តលិចក្នុងនោះ ហើយក៏រាយការណ៍ជូនសមត្ថកិច្ចតែម្តង។
ស្រះទឹកនេះចូលដល់ខែប្រាំងក៏រីង ទើបឃើញដំបូលរថយន្តរបស់ជនជាតិបារាំងផុសចេញពីទឹកប្រមាណ២តឹក ទើបអ្នកទាក់លលកនោះ រត់ទៅប្រាប់សមត្ថកិច្ចសង្កាត់រកាធំ នៅវេលាព្រឹកម៉ោង៧ថ្ងៃទី១៤ មករា ២០១២ ។ ពេលផ្អើលឈូឆរនោះសមត្ថកិច្ចមានប៉ូលិសស្នងការដ្ឋាននគរបាលខេត្ត ប៉េអឹមនៃបញ្ជាការដ្ឋានកងរាជអាវុធហត្ថខេត្ត អ្នកបច្ចេកទេសវិទ្យាសាស្ត្រ នាយកដ្ឋានអង្កេតផ្ទាល់ មន្ត្រីអាជ្ញាធរ ហើយចាត់ចែងស្ទូចយករថយន្តឡើងគោក ដោយដាក់ម៉ាស៊ីនបូមទឹកចំនួន៥គ្រឿង គឺបូមទឹកចាប់តាំងពីម៉ោង៩ព្រឹករហូតដល់ម៉ោង២និង៣០នាទីរសៀល ទើបសម្រេចធ្វើការបើកទ្វាររថយន្តម៉ាក NISSAN PATROL ពណ៌ស ជាកម្មសិទ្ធិរបស់ជនជាតិបារាំង ដើម្បីពិនិត្យមើលសពនៅក្នុងនោះ។
ពិតប្រាកដមែន សពគ្រួសារជនជាតិបារាំងនៅក្នុងរថយន្តនោះ មានឈ្មោះឡូរ៉ង់ វ៉ាលីយេ នេះ មានប្រពន្ធជនជាតិខ្មែរ ប៉ុន្តែបានស្លាប់ក្រោយពីសម្រាលកូនក្រោយ។ កូនៗរបស់ពួកគេ៤នាក់ ស្រី២ ប្រុស២ គឺ១-ឈ្មោះឈួន យ័ន្ត ភេទប្រុស អាយុ១១ឆ្នាំ ២-ឈ្មោះឈួន រស្មី ភេទស្រី អាយុ៨ឆ្នាំ ៣-ឈ្មោះឈួន ស្រីវ៉ាន់ ភេទស្រី អាយុ៦ឆ្នាំ និង៤-ឈ្មោះឈួន មីកាអែល ភេទប្រុស អាយុ១ឆ្នាំ ។
ការបាត់ខ្លួនគ្រួសារបារាំងនេះត្រូវបានឪពុកម្តាយក្មេកនៅឯខេត្តស្វាយរៀង រួមទាំងប្រជាជនក្នុងភូមិទួលធ្នង់និយាយថា បាត់តាំងពីថ្ងៃទី១៤ កញ្ញា ២០១១ អំឡុងមុនថ្ងៃបុណ្យភ្ជុំបិណ្ឌមកម៉្លេះ ហើយត្រូវសមត្ថកិច្ចធ្វើការចុះត្រួតពិនិត្យ ចំនួនពីរលើករួចមកហើយ គឺតាំងពីថ្ងៃទី២៨ វិច្ឆិកា ២០១១ រហូតថ្ងៃទី៥ មករា ២០១២ និងលើកទី៣នេះក៏ត្រូវប្រទះឃើញក្រុមគ្រួសារលោក LAU RENT ត្រូវបានគេសម្លាប់ដាក់ក្នុងរថយន្តរុញចូលក្នុងស្រះទឹកក្រោយផ្ទះរបស់ជនរងគ្រោះតែម្តង ។ ការបូមទឹកចេញពីស្រះទឹកទំហំ១០ម៉ែត្រគុណ៣០ម៉ែត្រ ជម្រៅពី៣ម៉ែត្រ ទៅ៤ម៉ែត្រនេះ សមត្ថកិច្ចប្រើម៉ាស៊ីនបូមទឹក៥គ្រឿង អស់រយៈពេលជាង៥ម៉ោងទើបស្ទូចយករថយន្តដែលមានសពនៅក្នុងនោះមកដាក់លើគោកដើម្បីពិនិត្យបាន ។
សពរលួយស្អុយទៅហើយ ដោយដំបូងគេពិនិត្យជាឃើញក្នុងរថយន្តមានវ៉ាលីសចំនួន២ ក្បាលជនជាតិបារាំងឈ្មោះ LAURENT ត្រូវគេកាត់ដាក់ក្នុងវ៉ាលីស ធុនមធ្យមមួយ ដងខ្លួននៅលើពូករថយន្តខាងមុខ រលួយស្អុយដូចគេជ្រុំប្រហុក។ សពទាំងគ្រួសារដ៏គួរឱ្យរន្ធត់បែបនេះ ធ្វើឱ្យអ្នកមើលឈូឆរនៅកន្លែងកើតហេតុ សន្និដ្ឋានថា ពិតជាអំពើមនុស្សឃាតដ៏សាហាវ ព្រោះសភាពសពត្រូវគេកាត់ក្បាលច្រកវ៉ាលីស ដងខ្លួននៅផ្សេង។ ទោះបីជាយ៉ាងណា សមត្ថកិច្ចធ្វើការត្រួតពិនិត្យរួមទាំងតំណាងស្ថានទូតបារាំងចូលរួមផង ពុំទាន់អះអាងថា ជាអត្តឃាត ឬមនុស្សឃាតដោយគំនុំ ឬប្លន់អ្វីនោះទេ។
ការពិនិត្យចាប់តាំងពីម៉ោង២និង៣០នាទីរហូតដល់ម៉ោង៤រសៀលពុំទាន់ចប់ សមត្ថកិច្ចពុំអាចបំភ្លឺករណីស្លាប់យ៉ាងអាណោចអាធ័មរបស់គ្រួសារបារាំងឈ្មោះ LAURENT និងកូន៤នាក់នោះ នៅឡើយទេ។ ការពិនិត្យនេះក៏មានវត្តមានឪពុកក្មេក ម្តាយក្មេកបារាំងមកពីខេត្តស្វាយរៀងយំយែកសង្វេគចំពោះសពកូនប្រសា និងចៅ ទាំង៤របស់ពួកគាត់ដែរ។ ហេតុការណ៍ដែលពុំទាន់អាចបំភ្លឺបានឱ្យច្បាស់លាស់ និងគួរឱ្យរន្ធត់នេះពុំត្រូវបានសមត្ថកិច្ចអាចផ្តល់ព័ត៌មានលម្អិតដល់អ្នកកាសែតទេ តែទោះបីជាយ៉ាងណា ក៏គ្រួសារដែលគួរឱ្យស្រឡាញ់នៃជនជាតិបារាំងនេះត្រូវអ្នកភូមិចូលរួមមរណទុក្ខដ៏សែនក្រៀមក្រំផងដែរ៕
កោះសន្តិភាព
No comments:
Post a Comment
yes