រូបថត៖ លន ហ្សាឌីណា
Sabay.com.kh
ឯកឧត្ដម ហាប់ ទូច អគ្គនាយក បេតិកភណ្ឌ នៃក្រសួងវប្បធម៌ និង វិចិត្រសិល្បៈ បានមានប្រតិកម្មភ្លាមៗ បន្ទាប់ពីបានទទួលព័ត៌មានដែលថា ប្រទេសឥណ្ឌាបានចាប់ផ្ដើមសាងសង់ប្រាសាទបែបហិណ្ឌូ ចម្លងតាមប្រាសាទអង្គរវត្តរបស់កម្ពុជា។
ឯកឧត្តមបន្តថា នេះជាព័ត៌មានមួយដែលធ្វើឲ្យ ភ្ញាក់ផ្អើលមែនទែន ព្រោះឯកឧត្តមពុំបានទទួលព័ត៌មានជាផ្លូវការពីរដ្ឋាភិបាលឥណ្ឌានោះទេ។ ឯកឧត្តមបន្តថា ប្រាសាទអង្គរវត្តជារបស់ខ្មែរ ទោះបីជា ប្រាសាទនេះចូលជាបេតិកភណ្ឌ ពិភពលោកកាលពីឆ្នាំ១៩៩២ ក៏ដោយ ក៏ការចម្លងត្រូវតែសុំការអនុញ្ញាតពីប្រទេសសាមីដែរ មិនមែនចេះតែធ្វើៗទៅនោះទេ ព្រោះវាប៉ះពាល់កម្មសិទ្ធិបញ្ញាធ្ងន់ធ្ងរណាស់។
ឯកឧត្តមប្រឆាំងជាដាច់ខាត ចំពោះការលើកឡើងដែលថា ប្រាសាទអង្គរវត្តសាងសង់ក្នុងសម័យកាលដែលអាណាចក្រខ្មែរគោរពសាសនាហិណ្ឌូ ហើយសាសនាមួយនេះមានដើមកំណើតនៅក្នុងប្រទេសឥណ្ឌា ប្រទេសឥណ្ឌាអាចមានសិទ្ធិចម្លងបាន។ ឯកឧត្តមលើកសម្អាងថា ប្រាសាទដ៏អច្ឆរិយៈរបស់ខ្មែរ មួយនេះ មានលក្ខណៈនិងរចនាបថខ្មែរ ហើយប្រាសាទទាំងអស់នៅឥណ្ឌា ក៏គ្មានមួយណាដូចប្រាសាទនៅកម្ពុជាដែរ ដូច្នេះចំពោះការចម្លងទាំងស្រុងគឺជារឿងមិនត្រឹមត្រូវទាល់តែសោះ។
បើសិនជាមាន ប្រាសាទអង្គរវត្តនៅប្រទេសឥណ្ឌា វានឹងមិនប៉ះពាល់ដល់វិស័យទេសចរណ៍នោះទេ។ ឯកឧត្តមបានបន្ថែមដូច្នេះ។ ឯកឧត្តម បានលើ់កឡើងដូចនេះ ដោយលើកហេតុផលថា ”ប្រាសាទអង្គរវត្តជាបុរាណវត្ថុ ហើយតម្លៃរបស់វា ស្ថិតនៅលើអាយុកាល ដែលជាភាពទាក់ទាញសម្រាប់ទេសចរណ៍ បើសិនជាមានការចម្លងមែន វាគ្មានន័យអ្វីទេ ព្រោះអ្នកទេសចរគេមិនចង់ទស្សនាទេ”។ ឯកឧត្ដម បានសង្កត់ធ្ងន់ថា “វាមិនអាចវត្ថុចម្លងមានតម្លៃដូចរបស់ពិតនោះទេ ព្រោះតម្លៃ នៃបញ្ញាញាណរបស់បុព្វបុរសខ្មែរ គឺធំធេងខ្លាំងណាស់ មិនមែនចេះតែចម្លងងាយៗបាននោះទេ ហើយខ្ញុំយល់ថា ការសាងសង់នេះគ្រាន់តែឧទ្ទិសសាសនាប៉ុណ្ណោះ ចំពោះអ្នកទេសចរគេមិនឲ្យតម្លៃទេ”។ ឯកឧត្តម បានបន្តថា ក្រសួងនឹងចាត់វិធានការយ៉ាងណានោះទេ គឺទុកឲ្យអាជ្ញាធរអប្សរា ជាអ្នកដោះស្រាយបញ្ហានេះ។ Sabay មិនអាចទាក់ទង អាជ្ញាធរអប្សរាបានទេ នៅពេលរសៀលនេះ។
គេហទំព័រព័ត៌មាន BBC បានចេញផ្សាយកាលពីម្សិលមិញថា ប្រទេសឥណ្ឌាគ្រោងសាងសង់ នូវប្រាសាទមួយមានឈ្មោះ Virat Angkor Wat Ram ដែលចម្លងតាមប្រាសាទអង្គរវត្តរបស់ខ្មែរ តែមានទំហំធំជាង កម្ពស់ខ្ពស់ជាង ដើម្បីឧទ្ទិស ដល់សាសនាហិណ្ឌូ។ ប្រភពដដែលបានបន្តថា គម្រោងនេះ នឹងប្រើពេល១០ឆ្នាំ ដែលគិតជាទឹកប្រាក់ប្រមាណ២០លានដុល្លារអាមេរិក។
No comments:
Post a Comment
yes