គណបក្សប្រជាជនកម្ពុជា ត្រូវបានគេចោទថា បានយករថយន្តរបស់រដ្ឋទៅប្រើប្រាស់ក្នុងក្បួនឃោសនារកសំឡេងឆ្នោត។
ក្រុមអ្នកឃ្លាំមើលយុទ្ធនាការឃោសនារកសំឡេងឆ្នោត បានសង្កេតឃើញថា នៅក្នុងថ្ងៃឃោសនា រកសំឡេងឆ្នោតដំបូងនេះ គណបក្សប្រជាជនកម្ពុជា ដែលសំបូរធនធានច្រើនជាងគណបក្សផ្សេងទៀតនោះ បានយកទ្រព្យសម្បត្តិជាកម្មសិទ្ធិរបស់រដ្ឋ មានរថយន្តជាច្រើនគ្រឿងទៅប្រើប្រាស់ក្នុងយុទ្ធនាការឃោសនារកសំឡេងគាំទ្រពីម្ចាស់ឆ្នោតនៅក្នុងខេត្តបាត់ដំបង។
ប្រជាពលរដ្ឋម្នាក់នៅក្នុងខេត្តបាត់ដំបង ឈ្មោះ ហុង ហេង បានថ្លែងថា ក្បួនយុទ្ធនាការឃោសនារកសំឡេងឆ្នោតរបស់គណបក្សប្រជាជននៅក្នុងខេត្តបាត់ដំបង នៅថ្ងៃដំបូងនេះ លោកសង្កេតឃើញមានរថយន្តអត់ស្លាកលេខជាច្រើនគ្រឿងត្រូវបានគេប្រើប្រាស់។
លោក ហុង ហេង៖ «ឃើញឡានហែឃោសនាគណបក្សនយោបាយហ្នឹងអត់មានស្លាកលេខច្រើនណាស់ តើប៉ូលិសចរាចរណ៍ដែលធ្វើចរាចរណ៍នៅក្នុងខេត្តបាត់ដំបង មមាញឹកកន្លងទៅបាត់ទៅណាអស់ហើយ សូម្បីម៉ូតូតូចមួយគ្រឿងអត់មានកញ្ចក់ អត់មានមួកម្ដងដេញគ្នាប្រផាត់ប្រភីងគ្រប់ច្រករហក ឥឡូវនេះហេតុបានឲ្យឡានខុសច្បាប់អ៊ីចឹង? ធ្វើចរាចរណ៍លើផ្លូវសាធារណៈត្រូវពិចារណាមែនទែន ព្រោះយើងពង្រឹងច្បាប់ចរាចរណ៍»។
ប្រភពព័ត៌មានសុំមិនបញ្ចេញ ឈ្មោះបានបញ្ជាក់ថា រថយន្តខ្លះត្រូវគេសង្ស័យថា ជារថយន្តពាក់ស្លាកលេខក្រសួងការពារជាតិ រថយន្តខ្លះពាក់ស្លាកលេខក្រសួងមហាផ្ទៃ និងរថយន្តខ្លះទៀតពាក់ស្លាកលេខរបស់រដ្ឋ។ រថយន្តទាំងនោះត្រូវបានគេដោះស្លាកលេខចាស់ចេញ និងបំពាក់ស្លាកលេខថ្មី ស្លាកលេខឯកជន ដើម្បីបន្លំភ្នែកមហាជននៅពេលធ្វើយុទ្ធនាការឃោសនា។
ប៉ុន្តែលោក អ៊ុក វង្ស ប្រធានក្រុមប្រឹក្សាខេត្តបាត់ដំបង និងជាមន្ត្រីរបស់គណបក្សប្រជាជនកម្ពុជា មានប្រសាសន៍ថា ជាគោលការណ៍គណបក្សប្រជាជនកម្ពុជា បានណែនាំមិនអនុញ្ញាតឲ្យធ្វើអ្វីខុសច្បាប់ ប៉ុន្តែករណីនេះ លោកនៅពុំទាន់បានទទួលព័ត៌មានទេ៖ «ក្នុងនាមខ្ញុំជាមន្ត្រីគណបក្សប្រជាជនកម្ពុជានៅក្នុងខេត្តបាត់ដំបង ខ្ញុំយល់ថា បញ្ហានេះមិនមានទេ ខ្ញុំជឿថា មិនមានអ៊ីចឹងតែម្ដង។ អត់មានទេ ប៉ុន្តែជួនកាលយល់ឃើញហ្នឹងយ៉ាងម៉េចខ្ញុំមិនដឹងទេ ប៉ុន្តែខ្ញុំចាំស្ដាប់ព្រឹត្តិការណ៍ មិនហេតុការណ៍អីឮទេ»។
លោក វន ពន ប្រធានលេខាធិការដ្ឋានរៀបចំការបោះឆ្នោតខេត្តបាត់ដំបង។ លោកមានប្រសាសន៍ថា គណៈកម្មការរៀបចំការបោះឆ្នោតខេត្ត ពុំមានសមត្ថកិច្ច និងតួនាទីក្នុងការចុះត្រួតពិនិត្យឆែក មើលឯកសារស្របច្បាប់របស់រថយន្តដែលគេសង្ស័យថា ជារថយន្តរបស់រដ្ឋ ហើយត្រូវគណបក្ស ប្រជាជនយកទៅប្រើប្រាស់ក្នុងក្បួនឃោសនាទេ។ ប៉ុន្តែលោកសង្កត់ថា បញ្ហានេះស្ថិតនៅលើការត្រួតពិនិត្យរបស់ប៉ូលិសចរាចរណ៍។
លោក វន ពន៖ «អត់ស្លាកលេខ វាទាល់តែសមត្ថកិច្ចប៉ូលិស ខាងយើងខ្ញុំនេះពុំអាចធ្វើការកំណត់បានទេបញ្ហាហ្នឹង ហើយបើអត់ស្លាកលេខ អាហ្នឹងជាសមត្ថកិច្ចរបស់ប៉ូលិសទេ ហើយក៏យើងមិនអាចសន្និដ្ឋានថា ជារបស់អ្នកណាជារបស់អ្នកណាដែរ ទាល់តែប៉ូលិសបានគាត់មានឯកទេស និង បានអាចតាមដានបាន»។
វិទ្យុអាស៊ីសេរីបានទូរស័ព្ទសុំការបំភ្លឺពីលោក សាត គឹមសាន នាយការិយាល័យប៉ូលិសចរាចរណ៍ជើងគោកនៃស្នងការដ្ឋាននគរបាលខេត្តបាត់ដំបង ប៉ុន្តែពុំមានអ្នកទទួល។ ក្រុមប្រជាពលរដ្ឋនៅ ក្នុងខេត្តបាត់ដំបង ធ្លាប់រិះគន់យ៉ាងខ្លាំងទៅលើក្រុមប៉ូលិសចរាចរណ៍ ដែលបានអនុវត្តច្បាប់ចរាចរណ៍ចាប់ពួកគាត់ផាកពិន័យ និងធ្លាប់បានប្រើអំពើហិង្សាទៅលើអ្នកដំណើរឲ្យមានរបួសថែមទៀត។
ប្រធានសម្របសម្រួលអង្គការអាដហុក ប្រចាំខេត្តបាត់ដំបង លោក យិន ម៉េងលី ដែលជាអ្នករិះគន់មិនសំចៃមាត់នោះ ថ្លែងថា នៅក្នុងគោលការណ៍ច្បាប់ហាមមិនឲ្យគណបក្សនយោបាយណាមួយយកសម្ភារៈជាកម្មសិទ្ធិរបស់រដ្ឋទៅប្រើប្រាស់ក្នុងការឃោសនាទេ។ ការប្រើប្រាស់សម្ភារៈរដ្ឋក្នុងក្បួនឃោសនាបោះឆ្នោតនេះគឺខុសច្បាប់។ លោករិះគន់ថា ការអនុវត្តច្បាប់ចរាចរណ៍នៅខេត្តបាត់ដំបង ត្រូវបានគេសង្កេតឃើញថា មិនមានរថយន្តណាមួយដែលអត់មានស្លាកអាចចរាចរនៅលើថ្នល់ជាតិ និងនៅទីក្រុងបានទេ ព្រោះសមត្ថកិច្ចប៉ូលិសចរាចរណ៍បានដាក់កម្លាំងពង្រាយយ៉ាងសកម្មបំផុតក្នុងរយៈពេលប៉ុន្មានឆ្នាំចុងក្រោយនេះ។
លោក យិន ម៉េងលី៖ «នៅក្នុងរដូវឃោសនាបែរជាមានរថយន្តដែលមិនមានស្លាកចូលរួមនៅក្នុងការឃោសនារបស់គណបក្សនយោបាយ យើងអាចធ្វើការសន្និដ្ឋានថា រថយន្តនោះពិតជារបស់រដ្ឋ ហើយត្រូវបានអ្នកបំរើការនោះយកទៅចូលរួមនៅក្នុងការឃោសនាដោយដោះស្លាកចេញ ដោយសារយើងទាញហេតុផលថា មិនមានរថយន្តណាមួយធ្វើចរាចរណ៍ដោយពុំមានស្លាកនៅក្នុងខេត្តបាត់ដំបងទេ»។
នៅខេត្តបាត់ដំបង មានគណបក្សនយោបាយចំនួន ៧ កំពុងចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សា ឃុំសង្កាត់ អាណត្តិទី៣ ដែលនឹងចាប់ផ្ដើមនៅថ្ងៃទី៣ ខែមិថុនា ឆ្នាំ២០១២។
នៅថ្ងៃបើកយុទ្ធនាការឃោសនាដំបូងនេះមានតែគណបក្សចំនួនពីរទេ ដែលបានចាប់ផ្ដើមសកម្មភាពដង្ហែក្បួនឃោសនារកសំឡេងគាំទ្រពីប្រជាពលរដ្ឋ។ គណបក្ស សម រង្ស៊ី មានមនុស្សប្រហែល ២២០នាក់ ម៉ូតូ ១០០គ្រឿង និងរថយន្ត១គ្រឿង បានចាប់ផ្ដើមដង្ហែក្បួនចេញពីទីស្នាក់ការរបស់ខ្លួននៅក្នុងសង្កាត់ទួលតាឯក ជុំវិញក្រុងបាត់ដំបង និងទៅកាន់ស្រុកឯកភ្នំ ស្រុកថ្មគោល និង ស្រុកបាណន់ បន្ទាប់មកត្រឡប់មកក្រុងបាត់ដំបងវិញ។
គណបក្សប្រជាជនកម្ពុជា មានមនុស្សចូលរួម ១.២៦៤នាក់ មានម៉ូតូ ១០០គ្រឿង និងរថយន្ត ២៥គ្រឿង ចាប់ផ្ដើមដង្ហែក្បួនចេញពីសួននាគបាញ់ទឹក និងក្បួនគណបក្សប្រជាជនមួយផ្សេងទៀត មានមនុស្ស ៣.៣០០នាក់ រថយន្ត ២៣គ្រឿង និងម៉ូតូ ៥០០គ្រឿង បានចាប់ផ្ដើមដង្ហែក្បួនចេញពីស្រុកសង្កែទៅជុំវិញទីរួមខេត្តបាត់ដំបង។
មន្ត្រីរៀបចំការបោះឆ្នោតឲ្យដឹងថា បើសមត្ថកិច្ចប៉ូលិសចរាចរណ៍រកឃើញភស្តុតាងបញ្ជាក់ថា គណបក្សប្រជាជនកម្ពុជា មានយករថយន្តជាកម្មសិទ្ធិរបស់រដ្ឋទៅប្រើប្រាស់ក្នុងយុទ្ធនាការឃោសនាបោះឆ្នោតមែននោះ គណបក្សនេះនឹងត្រូវរងការផាកពិន័យតាមមាត្រាច្បាប់បោះឆ្នោត៕
No comments:
Post a Comment
yes