អ្នកភូមិបឹងកក់បាននាំគ្នាស្រែកបួងសួងឲ្យបារមីអ្នកតានៅក្នុងភូមិបឹងកក់ជួយរំដោះស្រ្តីបឹងកក់ដែលកំពុងជាប់ឃុំឲ្យមានសេរីភាពជួបជុំក្រុមគ្រួសារឡើងវិញ។
ស្រ្តីឈ្មោះ ខៃ ចន្ទ័រស្មី ដែលកំពុងអុជធូបបានឲ្យដឹងថា នេះគឺជាពិធីផ្លូវងងឹត ដើម្បីជួយអន្តរាគមន៍សង្រ្គោះស្រ្តី១៥នាក់ និងកាច់បំបាក់មន្រ្តីអាក្រក់ដែលធ្វើបាបអ្នកភូមិបឹងកក់។
លោក ចន្ទ័ ពុទ្ធិសក្ត័ ជាអ្នកភូមិបឹងកក់បានឲ្យដឹងថា ការងាកមកធ្វើពិធីបន់ស្រន់នេះ បន្ទាប់ពីអ្នកភូមិបឹងកក់បានធ្វើការតវ៉ាជាច្រើនកន្លែង ប៉ុន្ដែមិនបានលទ្ធផលដូចនេះ អ្នកភូមិបឹងកក់បានសម្រេចចិត្តមកសុំអន្តរាគមន៍ពីអ្នកតាក្នុងភូមិ។
សូមរំលឹកថា ស្រ្តីជាអ្នកភូមិបឹងកក់១៥នាក់ត្រូវបានអាជ្ញាធរចាប់ខ្លួនហើយតុលាការក្រុងភ្នំពេញ បានកាត់ទោសឲ្យជាប់ពន្ធនាគារព្រៃសចំនួន២ឆ្នាំ ៦ខែ ពីបទរំលោភទៅលើកម្មសិទ្ធិរបស់ក្រុមហ៊ុនវិនិយោគបឹងកក់។
នៅក្នុងពិធីបន់ស្រន់នេះដែរ ប្រជាពលរដ្ឋបានសំណូមពរឲ្យអាជ្ញាធរមូលដ្ឋានដោះស្រាយដីជាង១២ហិចតារ ដែលលោកនាយករដ្ឋមន្រ្តី ហ៊ុន សែន បានសម្រេចដោះស្រាយឲ្យប្រជាពលរដ្ឋបឹងកក់រស់នៅ។
លោក ចន្ទ័ ពុទ្ធិសក្ត័ បានឲ្យដឹងថា អ្នកភូមិបឹងកក់មិនបានសុខនោះទេ ចាប់តាំងពីមានក្រុមហ៊ុនចូលមកអភិវឌ្ឍនៅតំបន់នេះ។ លោកបានបញ្ចាក់ថា ប្រជាពលរដ្ឋដែលចេញទៅក៏ត្រឡប់មកវិញដែរ។
អ្នកភូមិបឹងកក់បានលើកអំពីគម្រោងបន្តការតវ៉ាទៅអនាគត ដើម្បីយុត្តិធម៌ចំពោះអ្នកភូមិបឹងកក់។ តែទោះជាយ៉ាងណាក្តីអ្នកភូមិបឹងកក់បានឲ្យដឹងថា មន្រ្តីក្រសួងយុត្តិធម៌បានសន្យាបញ្ជូនញ្ញត្តិរបស់អ្នកភូមិបឹងកក់ទៅឲ្យតុលាការក្រុងភ្នំពេញ ឲ្យលើកយកសំណុំរឿងក្តីចាប់ស្រ្តីបឹងកក់១៥នាក់នោះឲ្យពិនិត្យសើរើឡើងវិញ៕
No comments:
Post a Comment
yes