មន្ត្រីកិច្ចការព្រំដែនកម្ពុជាអះអាងថា កិច្ចចរចារវាងប្រទេសកម្ពុជា និងវៀតណាមដែលភាគីទាំងពីរបានហត្ថលេខាជាមួយគ្នារួចហើយ នឹងចាប់ផ្ដើមអនុវត្តចេញនៅពេលឆាប់ៗនេះ ពីភូមិកំណើតរបស់ លោក ហេង សំរិន ស្ថិតនៅស្រុកពញាក្រែក ខេត្តកំពង់ចាម។ ការធ្វើនេះ គ្រាន់តែដោះដូរទៅតាមផែនទីដែលប្រទេសបារាំងបានគូសអោយតែប៉ុណ្ណោះ។
២៣-មិថុនា-២០១០: បង្គោលព្រំដែនកម្ពុជា-វៀតណាមលេខ១២៥ នៅក្នុងឃុំកក់ ស្រុកពញាក្រែក ខែត្រកំពង់ចាម
លោក វ៉ា គឹមហុង ប្រធានគណៈកម្មាធិការកិច្ចការព្រំដែនកម្ពុជា បានច្រានចោលពាក្យចោទប្រកាន់ថា រដ្ឋាភិបាលបានកាត់ដីអោយប្រទេសវៀតណាម ដោយលោកពន្យល់ថា ការដោះដូរភូមិនៅតាមបណ្តោយព្រំដែនរវាងប្រទេសកម្ពុជា និងវៀតណាមនោះ ជាការអនុវត្តទៅតាមកិច្ចព្រមព្រៀងព្រំដែន ដែលកម្ពុជា និងវៀតណាមបានចុះហត្ថលេខាជាមួយគ្នា។
លោក វ៉ា គឹមហុង ប្រធានគណៈកម្មាធិការកិច្ចការព្រំដែននៅកម្ពុជាមានប្រសាសន៍ថា កិច្ចចរចាដោះដូរភូមិនៅតាមបណ្តោយព្រំដែនរវាងប្រទេសកម្ពុជា និងវៀតណាម នោះ ជិតចប់ទៅហើយ ហើយនឹងអនុវត្ត គឺភូមិលោក ហេង សំរិន គឺភូមិថ្លុកត្រាច និងភូមិអន្លុងជ្រៃ៩ ក្នុងស្រុកពញាក្រែក ខេត្តកំពង់ចាម មុនគេ។ លោកបន្តទៀតថា នៅពេលជំនាន់បារាំង ក៏គេបានគូសដីតំបន់នោះដាក់ក្នុងផែនទីបារាំង មានមួយខ្នាតលើមួយរយពាន់ របស់ក្រុមប្រឹក្សាភូមិសាស្ត្រឥណ្ឌូចិនទៅហើយ។ លោកថា បានដាក់បញ្ចូលនៅក្នុងដីប្រទេសវៀតណាម រួចរាល់ទៅហើយ គឺគ្រាន់តែពេលនោះ ដោយសារមានសង្គ្រាមនៅប្រទេសវៀតណាម ទើបធ្វើអោយប្រទេសបារាំងមិនមានការរវីរវល់អ្វីទេ ចំពោះការកំណត់ភូមិឲ្យបានជាក់លាក់ និងតាមរកភូមិនៅតាមជាយព្រំដែនសម្រាប់ដោះដូរ។
លោក វ៉ា គឹមហុង បានបន្ថែមទៀតថា ការចរចាឲ្យភូមិទាំងពីរ ដែលជាទីកន្លែងភូមិកំណើតរបស់លោក ហេង សំរិន ទៅឲ្យវៀតណាម និងរកភូមិចំនួនពីរខាងវៀតណាម មកវិញ ដោយគណនាផ្ទៃក្រឡាដីឲ្យស្នើគ្នាមកនោះ។ លោកថា ភាគីកម្ពុជា និងប្រទេសវៀតណាម បានចុះកិច្ចព្រមព្រៀងដោះដូរភូមិមួយចំនួន នៅតាមបណ្តោយព្រំដែនប្រទេសទាំងពីរ គឺដូរគ្នាទៅវិញទៅមក ដែលក្នុងនោះ មានភូមិនៅតាមព្រំដែននៃប្រទេសទាំងពីរ។ ដូច្នេះ ខេត្តខ្លះនៅជាប់ព្រំដែនគោកជាមួយវៀតណាម រួមមានដូចជា រតនគិរី មណ្ឌលគិរី ស្វាយរៀង កំពង់ចាម ព្រៃវែង កណ្ដាល តាកែវ កំពត និងក្រចេះ។
ចំពោះបញ្ហានេះដែរ លោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជានាពេលថ្មីៗនេះ បានដាក់លិខិតមួយ ស្វែងរកអន្តរាគមន៍ពីសំណាក់សមាជិកសភាកម្ពុជាទាំង ១២៣រូប នៃនីតិកាលទី៤ នេះ ឲ្យជួយកោះហៅលោក វ៉ា គឹមហុង ប្រធានគណៈកម្មាធិការទទួលបន្ទុកកិច្ចការព្រំដែន នៃរាជរដ្ឋាភិបាលឲ្យចូលមកធ្វើការឆ្លើយបំភ្លឺចំពោះសភា អំពីបញ្ហានៃការចុះកិច្ចព្រមព្រៀងជាមួយប្រទេសវៀតណាម ស្តីពីការដោះដូរភូមិនៃខេត្តតាមបណ្តោយព្រំដែនប្រទេសទាំងពីរនោះ៕
No comments:
Post a Comment
yes