កងទ័ពកម្ពុជា ៤៨៥ នាក់ ត្រូវបានកែសម្រួល ដកចេញពីព្រំដែនប្រាសាទព្រះវិហារ
ព្រះវិហារ: ការកែសម្រួលដកកងទ័ពកម្ពុជាលើកទី១ ចេញពីតំបន់ព្រំដែនប្រាសាទព្រះវិហារ ត្រូវប្រារព្ធឡើងនាព្រឹកថ្ងៃទី១៨កក្កដា ឆ្នាំ២០១២។ ការប្រារព្ធពិធីកែសម្រួលកងទ័ព នៅទីបញ្ជាការសន្តិភាព ៥មករា-ព្រះវិហារ នាព្រឹកនេះ ធ្វើឡើងក្រោមអធិបតីភាព លោកនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីការពារជាតិ។
តំណាងរាជរដ្ឋាភិបាលកម្ពុជា សមាជិកសភា ព្រឹទ្ធសភា អនុព័ន្ធយោធា នៃបណ្តាប្រទេសជាមិត្តនៅកម្ពុជា ចំនួន ១១ ប្រទេស ដែលរួមមានទាំងអនុព័ន្ធយោធា របស់ប្រទេសថៃ ភ្ញៀវជាតិ និងអន្តរជាតិ ជាច្រើនរូប បានចូលរួម នៅក្នុងពិធីកែសម្រួលកងទ័ព នៅព្រំដែនប្រាសាទព្រះវិហារ នាព្រឹកនេះ។
ការសម្រេចកែសម្រួលដកកងទ័ពកម្ពុជាជាឯកតោភាគីដូច្នេះ បានធ្វើឡើងបន្ទាប់ពីជំនួបរវាងសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ យីងឡាក់ ស៊ីណាវ៉ាត់ នាយករដ្ឋមន្ត្រី នៃព្រះរាជាណាចក្រថៃ កាលពីរសៀលថ្ងៃទី១៣ ខែកក្កដា ឆ្នាំ២០១២ នៅទីក្រុងសៀមរាប។ នោះគឺភាគីទាំងពីរ បានឯកភាពគ្នាដោយសុច្ឆន្ទៈកែសម្រួលកងទ័ព។
តំណាងរាជរដ្ឋាភិបាលកម្ពុជា សមាជិកសភា ព្រឹទ្ធសភា អនុព័ន្ធយោធា នៃបណ្តាប្រទេសជាមិត្តនៅកម្ពុជា ចំនួន ១១ ប្រទេស ដែលរួមមានទាំងអនុព័ន្ធយោធា របស់ប្រទេសថៃ ភ្ញៀវជាតិ និងអន្តរជាតិ ជាច្រើនរូប បានចូលរួម នៅក្នុងពិធីកែសម្រួលកងទ័ព នៅព្រំដែនប្រាសាទព្រះវិហារ នាព្រឹកនេះ។
ការសម្រេចកែសម្រួលដកកងទ័ពកម្ពុជាជាឯកតោភាគីដូច្នេះ បានធ្វើឡើងបន្ទាប់ពីជំនួបរវាងសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ យីងឡាក់ ស៊ីណាវ៉ាត់ នាយករដ្ឋមន្ត្រី នៃព្រះរាជាណាចក្រថៃ កាលពីរសៀលថ្ងៃទី១៣ ខែកក្កដា ឆ្នាំ២០១២ នៅទីក្រុងសៀមរាប។ នោះគឺភាគីទាំងពីរ បានឯកភាពគ្នាដោយសុច្ឆន្ទៈកែសម្រួលកងទ័ព។
សេចក្ដីជូនដំណឹង របស់ទីស្តីការគណៈរដ្ឋមន្ត្រី បានបង្ហាញថា រាជរដ្ឋាភិបាលកម្ពុជា សម្រេចធ្វើការកែសម្រួលកងទ័ព នាថ្ងៃទី១៨កក្កដានេះ ចំនួន ៤៨៥ នាក់ ចេញពីតំបន់គ្មានកងទ័ពបណ្តោះអាសន្ន (PDZ) តាមដីកាបង្គាប់របស់តុលាការយុត្តិធម៌អន្តរជាតិ (ICJ) ចុះថ្ងៃទី១៨ ខែកក្កដា ឆ្នាំ២០១១។
ការកែសម្រួលកងទ័ពក្នុងជំហានទី១នេះ គឺកែសម្រួលពីបរិវេណជុំវិញប្រាសាទព្រះវិហារ ចំនួន ៤ ចំនុច ដែលរួមមាន៖ ផ្សារជណ្តើរនាគ ជណ្តើរបុរាណខាងជើង ជណ្តើរបុរាណខាងកើត និងវត្តកែវសិក្ខាគីរីស្វារៈ ហើយជំនួសវិញ ដោយនគរបាលចំនួន ២៥៥ នាក់ និងសន្តិសុខអភិរក្សប្រាសាទចំនួន ១០០នាក់។
សេចក្ដីជូនដំណឹង បានឲ្យដឹងថា នៅក្នុងពេលនិងម៉ោងជាមួយគ្នានោះដែរ ក៏មានការប្រារព្ធពិធីអបអរសាទរខួបលើកទី៤ នៃការចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោក ២០០៨-២០១២។
តាមកម្មវិធី ពិធីជួបជុំនោះនឹងធ្វើឡើងនៅម៉ោង ៧ ព្រឹក។ នៅម៉ោង ៩ និង ១០ នាទី ពិធីសម្តែងសិល្បៈ ( របាំជូនពរ របាំព្រាបស និងទង់អាស៊ាន និងកន្ទ្រាំមីង )។
នៅម៉ោង ៩ និង ៤០ នាទី សុន្ទរកថាស្វាគមន៍របស់លោក ជុច ភឿន ប្រធានអាជ្ញាធរជាតិព្រះវិហារ។
នៅម៉ោង ៩ និង ៤៥ នាទី លោកនាយឧត្តមសេនីយ៍ នាង ផាត ប្រធានលេខាធិការដ្ឋានក្រុមការងារសម្របសម្រួលបទឈប់បាញ់ អានសេចក្តីសម្រេចរបស់រាជរដ្ឋាភិបាល ពាក់ព័ន្ធនឹងការកែសម្រួលកងទ័ព។
នៅម៉ោង ៩ និង ៥០ នាទី លោកនាយឧត្តមសេនីយ៍ ជា តារា អាននូវរបាយការណ៍សមរភូមិរបស់តំណាងគណៈបញ្ជាការឯកភាពសមរភូមិ កម្ពុជា-ថៃ។
នៅម៉ោង ១០ លោកឧត្តមសេនីយ៍ឯក ខេង សុមេធ អគ្គស្នងការរងនគរបាលជាតិ ទទួលបន្ទុកគ្រប់គ្រងនគរបាលនៅព្រំដែន ឡើងធ្វើការប្តេជ្ញាចិត្តរបស់តំណាងនគរបាលជាតិ និងសន្តិសុខអភិរក្ស។
នៅម៉ោង ១០ និង ៥ នាទី លោកនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឡើងថ្លែងសុន្ទរកថាអបអរសាទរនៃការកែសម្រួលដកកងទ័ព។
នៅម៉ោង ១០ និង ៣០ នាទី លោកនាយឧត្តមសេនីយ៍ ទៀ បាញ់ បំពាក់គ្រឿងឥស្សរិយយសទង់ ជូនអង្គភាពកងទ័ពកងពលធំអន្តរាគមន៍លេខ ៣ និងកងពលតូចអន្តរាគមន៍លេខ ៧។
នៅម៉ោង ១០ និង ៣៥ នាទី លោកឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣ បញ្ជាយុទ្ធដំណើរទ័ព និងប្រគល់ផែនទីអភិរក្សដល់នគរបាល និងសន្តិសុខអភិរក្សប្រាសាទព្រះវិហារ។
តាមកម្មវិធី នៅចុងបញ្ចប់ មានពិធីលែងព្រាប និងបង្ហោះប៉ឺតប៉ោងអបអរសាទរខួបលើកទី៤ នៃការចុះបញ្ជីបេតិកភណ្ឌពិភពលោក និងការទទួលធ្វើជាម្ចាស់ផ្ទះកិច្ចប្រជុំបេតិកភណ្ឌពិភពលោក លើកទី៣៧ នៅកម្ពុជា ឆ្នាំ២០១៣។
ក្នុងពិធីនោះ លោកនាយឧត្តមសេនីយ៍ ទៀ បាញ់ បានគូសបញ្ជាក់ថា "ការកែសម្រួលកងទ័ពនាពេលនេះ បញ្ជាក់ឲ្យឃើញកាន់តែច្បាស់ថា ប្រទេសកម្ពុជាគោរពករណីកិច្ចជារដ្ឋភាគីសមាជិកអង្គការសហប្រជាជាតិ និងច្បាប់អន្តរជាតិ ជាពិសេសគោរពបាននូវសិទ្ធិជាម្ចាស់ផ្ទះ ដែលមានកាតព្វកិច្ច ថែរក្សាសម្បត្តិបេតិកភណ្ឌមនុស្សជាតិ ហើយបានចាប់ផ្តើមអនុវត្តដីកាបង្គាប់របស់តុលាការយុត្តិធម៌អន្តរជាតិ លេខ ១៥១ ថ្ងៃទី១៨កក្កដា ឆ្នាំ២០១១ ដាក់ជំនួសវិញ ដោយកម្លាំងនគរបាល និងភ្នាក់ងារ ដែលមានតួនាទីបំពេញភារកិច្ចនៅទីនោះ តាមទំហំនៃការងារ ដែលតម្រូវការឲ្យមាន"។
សូមរម្លឹកថា កងទ័ពថៃបានចូលឈ្លានពានទឹកដីកម្ពុជា នៅព្រំដែនប្រាសាទព្រះវិហារ ចាប់តាំងពីថ្ងៃទី១៥កក្កដា ឆ្នាំ២០០៨ ដែលនាំឲ្យមានការតានតឹង និងប្រឈមមុខដោយអាវុធ រហូតដល់ផ្ទុះសង្គ្រាមជាញឹកញាប់។ ច្រកព្រំដែនកម្ពុជា-ថៃ នៅមុខប្រាសាទព្រះវិហារ ក៏ត្រូវបានបិទចាប់តាំងពីពេលនោះមក។
ចុងក្រោយ នៅអំឡុងដើមខែឧសភា ឆ្នាំ២០១១ កម្ពុជាបានប្តឹងទៅកាន់តុលាការយុត្តិធម៌អន្តរជាតិ ទីក្រុងឡាអេ ក្នុងរឿងជម្លោះប្រដាប់អាវុធនោះ។ តុលាការបានចេញដីកា ដោយដាក់នូវវិធានការបន្ទាន់មួយ រក្សាការពារប្រាសាទព្រះវិហារ កុំឲ្យខូចខាតដោយគ្រាប់កាំភ្លើងរបស់ថៃ កាលពីថ្ងៃទី១៨កក្កដា ឆ្នាំ២០១១ ដោយតម្រូវឲ្យកម្ពុជា និងថៃ ត្រូវដកកងទ័ព ចេញពីតំបន់ព្រំដែនទំហំជាង ១៧ គីឡូម៉ែត្រក្រឡា នៅម្តុំប្រាសាទព្រះវិហារ៕
No comments:
Post a Comment
yes