អ្នកគាំទ្រលទ្ធិប្រជាធិបតេយ្យ ប្រមាណ ៧០០ នាក់ មកជួបជុំគ្នានៅស្រុកត្រាំកក់ ខេត្តតាកែវ នៅថ្ងៃអាទិត្យ ទី២៩ ឆ្នាំ ២០១២។
ការជួបជុំគ្នានេះ គឺដើម្បីស្ដាប់សេចក្ដីរាយការណ៍ អំពីការបង្រួបបង្រួមរវាងគណបក្ស សម រង្ស៊ី និងគណបក្ស សិទ្ធិមនុស្ស ក្នុងការបង្កើតចលនាឈ្មោះថា ចលនាប្រជាធិបតេយ្យសង្គ្រោះជាតិ។
អ្នកស្រី ជូឡុង សូម៉ូរ៉ា តំណាងគណបក្ស សម រង្ស៊ី ថ្លែងថា ការបង្រួបបង្រួមគ្នា នៃគណបក្សប្រឆាំងទាំង ២ បង្កើតជាចលនាប្រជាធិបតេយ្យសង្គ្រោះជាតិ គឺទទួលនូវភាពជោគជ័យធំធេង ដោយប្រមូលយកបាន អ្នកដែលស្រឡាញ់លទ្ធិប្រជាធិបតេយ្យពិតប្រាកដ មកបោះឆ្នោតឲ្យគណបក្សប្រឆាំង នឹងធ្វើឲ្យគណបក្សប្រឆាំងកើនសំឡេងអ្នកគាំទ្រ និងចំនួនអាសនៈ ក្នុងក្រុមប្រឹក្សាឃុំ សង្កាត់ រហូតដល់សមាជិកសភា និងព្រឹទ្ធសភា។
អ្នកស្រី ជូឡុង សូម៉ូរ៉ា៖ «ទី១ គណបក្សថ្មី ដែលបង្កើតនៅក្នុងក្របខ័ណ្ឌចលនាយើងនេះ គឺនឹងមានជីវិតយូរអង្វែង ដូចគេនិយាយអ៊ីចឹង។ គូនេះ គឺជាគូពិតប្រាកដហើយ។ ទី២ ខ្ញុំហ៊ានព្យាករ ហើយហ៊ានធានាមុខបងប្អូនថា ឆ្នាំ ២០១៣ បានផ្លែផ្កាហើយ»។
ប្រធានគណបក្ស សិទ្ធិមនុស្ស លោក កឹម សុខា ថ្លែងថា គណបក្សនេះ មិនភ្លេចការឃោសនា ដែលបានសន្យាជាមួយម្ចាស់ឆ្នោត មុនបោះឆ្នោតក្រុមប្រឹក្សាឃុំសង្កាត់កន្លងទៅនោះទេ។ លោកថា ការគោរពពាក្យសម្ដីសន្យា នៃការឃោសនា ទើបធ្វើឲ្យអ្នកគាំទ្រកើនឡើង។
លោក កឹម សុខា៖ «គណបក្សទាំង ២ ត្រូវបង្កើតសារនយោបាយរួមមួយ ភាសាតែមួយ ដើម្បីយើងនិយាយភាសាដូចគ្នា។ តើសារនយោបាយរួមរបស់យើងនោះស្អីខ្លះ? នោះហើយ ជាចំណុចទី១ ត្រូវធ្វើជាបន្ទាន់»។
ពលរដ្ឋ ដែលចូលស្ដាប់ផលប្រយោជន៍ នៃការរួបរួមគ្នា រវាងគណបក្សប្រឆាំងទាំង ២ នោះ អះអាងថា ក្រោយពីការបង្រួបបង្រួមគ្នាហើយ គណបក្សទាំង ២ មិនត្រូវបែកគ្នាវិញ ដែលនាំឲ្យអ្នកគាំទ្របាត់បង់ជំនឿទេ។
សំឡេងពលរដ្ឋ៖ «យើងប្រមូលរួបរួមគ្នាហើយ សូមកុំឲ្យធ្លុះ កុំឲ្យមានប្រេះឆាទៅថ្ងៃក្រោយទៀត។ បើកាលណាមានប្រេះឆា យើងកំពប់ខ្ចាត់ខ្ចាយអស់ហើយ»។
ឆ្លើយតបបញ្ហានេះ លោក កឹម សុខា ថ្លែងថា ក្រោយពីការបង្រួបបង្រួម គណបក្ស សម រង្ស៊ី និងគណបក្ស សិទ្ធិមនុស្ស បានធ្វើចលនារួចហើយ នៅក្រៅប្រទេស ជានយោបាយសម្រាប់បរទេស។ នៅក្នុងប្រទេសកម្ពុជាបានជួបជុំគ្នាគ្រប់ខេត្ត ជាចលនាថ្នាក់ជាតិ ក្នុងការបង្រួបបង្រួម។ ចំពោះថ្នាក់ មូលដ្ឋាន គឺជួបប្រជុំជាទៀងទាត់ តាមស្រុក ឃុំ សង្កាត់ ដើម្បីពង្រឹងនូវការគាំទ្រ។
លោក កឹម សុខា៖ «យើងត្រូវធ្វើកម្មវិធីនយោបាយរួម សម្រាប់ពេលឃោសនាបោះឆ្នោត។ យើងនិយាយតែមួយ តើយើងជួយប្រជារាស្ត្រយ៉ាងម៉េច? ពេលយើងឈ្នះ ដឹកនាំរដ្ឋាភិបាលឆ្នាំ ២០១៣ នេះ តើយើងជួយគាត់ស្អីខ្លះ? យើងដោះស្រាយបញ្ហានយោបាយយ៉ាងម៉េច? បញ្ហាសេដ្ឋកិច្ចយ៉ាងម៉េច? បញ្ហាសង្គមកិច្ចយ៉ាងម៉េច?»។
ជំទប់ទី២ ឃុំរំចង់ ស្រុកសំរោង ខេត្តតាកែវ លោក ជិន រស្មី សំណូមពរឲ្យពលរដ្ឋ ទៅចុះឈ្មោះ និងពិនិត្យបញ្ជីឈ្មោះបោះឆ្នោត ដើម្បីមានឈ្មោះក្នុងបញ្ជីបោះឆ្នោត អាចទៅបោះឆ្នោតផ្ដល់សំឡេង ឲ្យចលនាប្រជាធិបតេយ្យសង្គ្រោះជាតិ កើនសំឡេងឆ្នោត នៅឆ្នាំ ២០១៣។
លោក កឹមសុខា បានសន្យានាំមេឃុំជាប់ឆ្នោតរបស់គណបក្ស សិទ្ធិមនុស្ស ទៅធ្វើទស្សនកិច្ច នៅបរទេសតាមការសន្យា និងត្រៀមចែកកុំព្យូទ័រ និងរថយន្ត តាមឃុំសង្កាត់ ដែលគណបក្សសិទ្ធិមនុស្សជាប់ឆ្នោត។ លោកណែនាំទៀតថា កុំព្យូទ័រ និងរថយន្ត ដែលចែកនោះ មិនចាំបាច់ប្រើតែមន្ត្រីរបស់គណបក្ស សិទ្ធិមនុស្ស ទេ គឺជារបស់រួម សម្រាប់បម្រើឲ្យពលរដ្ឋក្នុងមូលដ្ឋាន នៃប្រទេសកម្ពុជា។
ចលនាប្រជាធិបតេយ្យសង្គ្រោះជាតិ បានបង្កើតឡើង កាលពីថ្ងៃ ១៧ ខែកក្កដា ឆ្នាំ ២០១២ នៅទីក្រុង ម៉ានីល (Manila) ប្រទេសហ្វីលីពីន បន្ទាប់ពីគណបក្សទាំង ២ បានជាប់គាំងនយោបាយរៀងខ្លួន តាំងពីឆ្នាំ ២០០៩ ក្នុងការបង្រួបបង្រួមគ្នា។
ចលនាប្រជាធិបតេយ្យសង្គ្រោះជាតិនេះ មានគម្រោងបង្កើតគណបក្សថ្មីមួយ នៅពេលខាងមុខ ដែលមិនទាន់កំណត់ថា មានឈ្មោះអ្វីនៅឡើយ។ ប៉ុន្តែ ជាបឋម តំណាងគណបក្សប្រឆាំងទាំង ២ បានជួបជាមួយអ្នកគាំទ្រនៅមូលដ្ឋាន ដើម្បីបង្កើនការទុកចិត្ត និងប្រមូលអ្នកគាំទ្រលទ្ធិប្រជាធិបតេយ្យឲ្យបានកាន់តែច្រើន៕
No comments:
Post a Comment
yes